වත්මන් රජය දුන් ප්‍රධානතම පොරොන්දු කඩ කළ බවට පිළිගෙන ඇති අගමැතිවරයා එම පොරොන්දු ඉෂ්ඨ කිරීමට නැවතත් බලය ලබාගැනීමට සහාය වන ලෙස ශ්‍රී ලංකාවේ විශාලතම දෙමළ පක්ෂයෙන් ඉල්ලා තිබේ.
ඉදිරි ජාතික මැතිවරණයෙන් බලයට පත්ව වසරක් ගතවීමට පෙර ජාතික ගැටලුවට විසඳුම් ලබාදෙන නව ව්‍යවස්ථාවක් ගෙන ඒමටත්, විධායක ජනපති ධුරය අහෝසි කිරීමට සහ නව මැතිවරණ ක්‍රමයක් හඳුන්වා දීමටත් අගමැති රනිල් වික්‍රමසිංහ දෙමළ ජාතික සන්ධානයට යළිත් වරක් පොරොන්දු වී ඇත.
ඉදිරියේදී පැවැත්වීමට නියමිත ජනාධිපතිවරණය සම්බන්ධව දෙමළ ජාතික සන්ධානය සමඟ පැවති සාකච්ඡාවේදී අගමැතිවරයා මෙම සහතිකය ලබා දී තිබේ.
ජාතික ගැටලුවට විසඳුමක් ලබා දෙන නව ව්‍යවස්ථාවක් ගෙන ඒම හා විධායක ජනපති ධුරය අහෝසි කිරීම වෙනුවෙන් පෙනී සිටින අපේක්ෂකයකුට තම සහාය ලබා දෙන බවට අගමැතිවරයා වෙත පැවසු බව සාකච්ඡාවෙන් පසුව එම්.ඒ සුමන්තිරන් මන්ත්‍රීවරයා මාධ්‍ය වෙත කියා සිටියේය.
“අපිට වැදගත්ම ප්‍රධානම ප්‍රශ්නෙ තමයි ජාතික ප්‍රශ්ණය විසඳිම. ඒකට දැනටමත් ආණ්ඩුක්‍රම ව්‍යවස්තාවක් හදන ක්‍රියාවලියක් තිබුනා. ඒක ඉවර කළේ නෑ ඒ නිසා ඒක හරියාකාරව ඉක්මනට ඉවර කරන්න ඕනෙ. ඒ ගැන අපේක්ෂකයන්ගේ ස්ථාවරය අපිට කිව්වොත් අපිට තීරණයක් ගන්න පුලුවන් වෙයි. එතුමාගේ ස්ථාවරය දැනට සකස් කරළා තියෙන ආණ්ඩුක්‍රම ව්‍යවස්ථා ක්‍රියාවලිය ඉක්මනට ඉවර කරන්න බලාපොරොත්තුවෙන් ඉන්නවා කියලා. විධායක ජනාපති ධුරය අහෝසි කරන ස්ථාවරයේ අපි ඉන්නෙ කිව්වාම අගමැතිතුමා කිව්වා ඒ යගේ පක්ෂයේ ස්ථාවරයත් ඒක කියලා,” යැයි මන්ත්‍රීවරයා පැවසීය.
කෙසේ නමුත් ජනාධිපති අපේක්ෂක වීමේ බලාපොරොත්තුවෙන් සිටින එජාප නියෝජ්‍ය නායක සජිත් ප්‍රේමදාස පවසා තිබුනේ විධායක ජනාධිපති ධුරය අහෝසි කළ යුතු දැයි “විද්‍යාත්මක සමීක්ෂණයක්” පැවත්විය යුතු බවයි.
ඉදිරි ජනපතිවරණයට ඉදිරිපත් වන සියලු අපේක්ෂකයන් සමඟ සාකච්ඡා කර සහාය ලබා දෙන පාර්ශවය තීන්දු කරන බවද දෙමළ ජාතික සන්ධාන මන්ත්‍රී එම්.ඒ සුමන්තිරන් මන්ත්‍රීවරයා වැඩි දුරටත් සඳහන් කළේය.
Facebook Comments
