ශ්‍රී ලංකාවේ ත්‍රස්ත මර්දන පොලිසියේ පනස් දෙනකුට වැඩි පිරිසක් ස්ත්‍රී දුෂණ සහ ලිංගික අඩන්තේට්ටම් ඇතුළු හිංසා කළ වධකයන් ලෙස නම් කරන ජාත්‍යන්තර මානව හිමිකම් සංවිධානයක් එම පොලිස් භටයන්ට එරෙහිව දඬුවම් කරන තුරු එම ඒකකයට තහනමක් පනවන ලෙස ජාත්‍යන්තරයෙන් ඉල්ලා තිබේ.
එක්සත් ජාතීන්ගේ මානව හිමිකම් මණ්ඩලයේ 42 වැනි සැසි වාරය මුළුදෙන ජිනීවා නුවරදී එලි දක්වන ලද ත්‍රස්තවාදී විමර්ශන කොට්ඨාශයේ 58 දෙනකුගේ නම් සහිත එම වාර්තා නිකුත් කර ඇත්තේ ශ්‍රී ලංකාවේ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP)යි.
“චුදිත අපරාධකරුවන්ට නඩු පවරන තුරු, ජාත්‍යන්තර පුහුණු වැඩ සටහන්, එක්සත් ජාතීන්ගේ සාමසාධනය සහ වෙනත් ආකාරයේ ජාත්‍යන්තර ආධාර TID සාමාජිකයන්ට සලසා දීම තහනම් කළ යුතුය. ආරක්ෂක අංශයේ මේ ඒකකයේ කුණුවීම පුහුණු වැඩ සටහන් මගින් පමණක් විසඳා ගත නොහැකිය,” යි ITJP අධ්‍යක්ෂිකා යස්මින් සූකා පවසයි.
තමන්ට සම්මුඛ සාකච්ඡා ලබා දුන් වධබන්ධනයට පාත්‍ර වූ 73 දෙනකු විසින් ලබා දුන් තොරතුරු ඒ හෙළිදරව්වට පාදක වුනු බව ITJP පවසයි.
එම සංවිධානය කියන පරිදි එක්සත් ජාතීන්ගේ සංවිධානයේ දශකයකට වඩා පැරණි වාර්තා වලින් නම් කර තිබෙන පොලිස් නිලධාරීන්ද ඒ අතර වෙයි. ඉන් අයකු එක්සත් ජාතීන්ගේ සාමසාධක නිලධාරියකු ලෙස පවා රාජකාරි කර ඇත්තෙකි.
ආරක්ෂක අංශ ප්‍රතිසංස්කරණය කරන බවට ජගත් ප්‍රජාව හමුවේ ප්‍රතිඥා දී ඇති වර්තමාන ආණ්ඩුවේ පාලනය යටතේද වධකයන් ලෙස චෝදනා ලබන නිලධාරීන් දඬුවම් නොලබා ගැලවී සිටීම ගැන ITJP සංවිධානය ජාත්‍යන්තර අවධානයට යොමු කර තිබේ.
“වධහිංසාවලට සම්බන්ධ බවට චෝදනා ලබන TID නිලධාරීන් 2007 දී එජා විශේෂඥයකු විසින්ද, දශක ගණනාවක් තිස්සේ ශ්‍රී ලාංකික රාජ්‍ය නොවන සංවිධාන සහ මානව හිමිකම් නීතිඥයන් විසින් ද, දැන් වධහිංසාවෙන් වින්දිතයන් ආරක්ෂා කරගැනීමේ පනත යටතේ හිටපු ආරක්ෂක ලේකම් ගෝඨාභය රාජපක්ෂ ට එරෙහිව පවරා ඇති නඩුවට ආධාර පිණිස ITJP විසින් කැලිෆෝනියාවේ අධිකරණයට භාර දී ඇති ලියවිලි වලින්ද නම් කොට තිබේ. එහෙත්, කවදාවත් කිසිදු පියවරක් ගෙන නොමැත. චූදිත වධකයෝ සෑම ආණ්ඩු මාරුවකදීම ගැලවීම ලබති.”
ත්‍රස්ත විමර්ශන ඒකකය විසින් පසුගිය දශකය පුරා රඳවාගෙන සිටි ගැහැනුන්ට සහ මිනිසුන්ට සංවිධිතව පමුණුවන ලද කුරිරු වධබන්ධන සහ ලිංගික ප්‍රචණ්ඩතා අලුත්ම ITJP වාර්තාවෙන් විස්තර කෙරෙන අතර එහිදී කොළඹ TID කාර්යාලය සහ බූස්ස රැඳවුම් කඳවුර කෙරේ වැඩි අවධානයක් යොමු කොට ඇත.
Facebook Comments
