නිවසක් ඉදි කර ගැනීම සදහා සහනදායි පොලී ක්‍රමයක් යටතේ කොටස් වශයෙන් දීමට පොරොන්දුවූ ලක්ෂ ගණනක් නියමිත පරිදි නොලැබීමෙන් අසරණ තත්වයට පත්ව සිටින උතුරේ යුද අනාථයන් පිරිසක් හිඟ මුදල් ඉල්ලා මුලතිව් දිස්ත්‍රික්කයේ ස්ථාන දෙකක විරෝධතා දියත් කර තිබේ.
පළාත් බද වාර්තාකරුවන් පවසන්නේ පුදුකුඩිඉරිප්පු සහ ඔඩ්ඩුසුඩාන් ප්‍රාදේශීය ලේකම් කොට්ඨාශයට අයත් ගම් වැසියන් සිය ගණනක් මාර්තු 29 සදුදා දිනයේ විරෝධතා පැවැත්වූ බවයි.
ඔට්ටුසුඩාන් ගම් වාසීන් පිරිසක් මාන්කුලම් පිහිටි නිවාස සංවර්ධන අධිකාරියේ ප්‍රාදේශිය කාර්යාලය ඉදිරිපිට විරෝධතා පවත්වද්දී පුදුකුඩිඉරිප්පු ජනතාව විරෝධතාවය දියත් කර ඇත්තේ පුදුකුඩිඉරිප්පු මධ්‍ය මහා විද්‍යාලය ඉදිරිපිට සිට පුදුකුඩිඉරිප්පු ප්‍රාදේශිය ලේකම් කාර්යාලය දක්වා විරෝධතා පා ගමනක්ද දියත් කරමිනි.
මෛත්‍රී, රනිල් පාලන සමයේ නිවාස සංවර්ධන අධිකාරිය මගින් අඩු ආදායම් ලාභී පවුල් සඳහා නිවාස ඉදිකරදීම වෙනුවෙන් ලබා දුන් ණය යොජනා ක්‍රමයේ පළමු ණය වාරිකය පමණක් ලබා දී ඉතිරි මුදල ලබා නොදීමෙන් ගම් වැසියන් සිය ගණනක් සිය නිවාස වල වැඩ කටයුතු අවසන් කර ගැනීමට නොහැකිව අසරණ තත්වයට පත්ව සිටිති.
පළාත් බද වාර්තාකරුවන් පවසන්නේ එක් නිවාසයක් ඉදිකරගැනිම වෙනුවෙන් රුපියල් ලක්ෂ හතහමාරක මුදලක් සහන පොලී ක්‍රමය යටතේ ලබා දෙන බවට පොරොන්දු ලබා දී තිබුනත් මේ වන විට ඔවුන්ට ලබා දී ඇත්තේ රුපියල් එක්ලක්ෂ පනස් දහසේ සිට දෙලක්ෂය දක්වා වන මුදලක් පමණක් බවයි.
කාන්තාවන් බහුතරයකින් සැදුම් ලත් ගම්වාසීන් එහිදී පෙන්වා දී ඇත්තේ උතුරේ දියත් වු යුද්ධය නිමා වීමෙන් පසු සිය මුල්ගම්බිම්වල නැවත පදිංචි වූ තමන් තාවකාලික නිවාසවල වසර ගණනක් ජීවත් වු පසු ස්ථීර නිවාස සාදාගැනීමට නිවාස සංවර් ධන අධිකාරිය විසින් සහනදායි පොලී ක්‍රමයක් යටතේ ලබා දෙන ණය යෝජනා ක්‍රමයේ පළමු ණය වාරිකය ලබා දුන්නද ඉතිරි ණය වාරිකයන් ලබා දීම නවතා දැමීම හේතුවෙන් ගම්වාසීන් දැඩි පීඩාවන්ට ලක්ව සිටින බවයි.
නිවාසවල වැඩ කටයුතු සම්පුර්ණ කරගැනීම සදහා ඉතිරි ණය මුදල්ද ලබා දීමට බලධාරීන් කඩිනම් පියවර ගත යුතු බවට ඔවුහු බල කර සිටිති.
ඔට්ටුසුඩාන් සහ පුදුකුඩිඉරිප්පු ප්‍රදේශිය ලේකම් කොට්ඨාශයන්ට අයත් හින්දුපුරම්, වසන්තනගර් සහ තිරුමුරුගන්ඩි ගම් වාසීන් විරෝධතා සදහා එක්ව තිබේ.
සිය ගැටළු ඉදිරිපත් කිරීම සදහා පා ගමනින් පැමිණි විරෝධතාකරුවන්ට ඇතුලු වීමට නොහැකි වන පරිදි පුදුකුඩිඉරිප්පු ප්‍රදේශිය ලේකම් බලධාරීන් කාර්යාලයේ ගේට්ටු වසා දැමීමට ද කටයුතු කර තිබේ.
කෙසේ නමුත් සිය ඉල්ලීම් ඇතුලත් සංදේශ දිස්ත්‍රික් ලේකම්වරයාට සහ නිවාස සංවර්ධන අධිකාරියේ ප්‍රාදේශිය ගණකාධිවරයාට ලබා දීමට විරෝධතාකරුවන් කටයුතු කර තිබේ.
සතියක් ඇතුලත සිය ඉල්ලීම් සම්බන්ධයෙන් සලකා බලන බවට බලධාරීන් ලබා දුන් වාචික පොරොන්දු හමුවේ විරෝධතාවය නතර කර දැමීමට ඔවුන් කටයුතු කර ඇත.
උද්ඝෝෂකයන් එහිදී බලධාරීන්ට අවධාරණය කර ඇත්තේ කඩිනමින් විසදුම් ලබා නොදුනහොත් අඛණ්ඩ විරෝධතාවයක් දියත් කරන බවයි.
යාපනය කන්කසන්තුරේ සන්දිලිප්පායි ප්‍රාදේශීය ලේකම් කොට්ඨාශයට අයත් පෙරියවිලාන් ගම්වාසීන් පිරිසක්ද නිවාස සංවර්ධන අධිකාරිය ණය වාරික නොදී සිටීමට එරෙහිව පෙබරවාරි 17 බදාදා හවස උතුරු පළාත් ආණ්ඩුකාර කාර්යාලය ඉදිරිපිට විරෝධතාවක් දියත් කර තිබුණි.
Facebook Comments
