උතුරේ යුද්ධයේදී අතුරුදහන් වු තිදෙනකුට හරියාකාරව යුක්තිව ඉටු වුවහොත් අතුරුදහන් වුවන් පිළිබඳව වු කාර්යාල (OMP) පිළිගැනීමට සුදානම් බව අතුරුදහන් වුවන් ඉල්ලා විරෝධයේ නිරතව සිටින දෙමළ අම්මාවරුන් රජයේ ප්‍රබලතම අමාත්‍යවරයකු හට පවසා ඇත.
අතුරුදහන් කරවන ලද සිය දරුවන් පිළිබඳ තොරතුරු සොයා දෙන ලෙස ඉල්ලමින් දින 389ක් තිස්සේ මුලතිව් දිස්ත්‍රික් ලේකම් කාර්යාලය ඉදිරිපිට විරෝධතාවක නිරතව සිටින අම්මාවරුන් බැහැ දැකීමට උතුරේ සංචාරයක නිරත මුදල් හා ජනමාධ්‍ය අමාත්‍ය මංගල සමරවීර 31 සෙනසුරාදා ගිය අවස්ථාවේදී ඔවුන් මේ බව කියා තිබේ.
අතුරුදහන් වුවන් පිළිබඳව කාර්යාලය නුදුරේදීම කටයුතු ආරම්භ කරන බැවින් අම්මාවරුන්ගේ විරෝධතාවය නවතා දමන ලෙස ඇමැතිවරයා කරන ලද ඉල්ලීම ඉවත දමා ඇති ඥාතීන් “ඔය කාර්යාලයෙන් අපේ නැති වෙච්ච දරුවෝ තුන් දෙනකුට වෙච්ච දේ කියන්න එතකොට අපි ඒ කාර්යාලය පිළිගන්නම්,” යි ඥාතීන් මංගල සමරවීර අමාත්‍යවරයා හට පැවසු බව අප වාර්තාකරු පවසයි.
තමන් පුද්ගලිකව අතුරුදහන් වුවන් පිලිබඳව යුක්තිය ඉටු කර ගැනීමට මැදිහත් වන බවට ඇමැතිවරයා ඥාතීන් හට පොරොන්දු වී ඇති අතර දේශපාලනික හෝ හමුදාමය වශයෙන් අතුරුදහන් වුවන් පිළිබඳ කාර්යාලයේ කටයුතු සඳහා මැදිහත් වීමක් සිදු නොකරන බව ද අවධාරණය කළේ ය.
අමාත්‍ය මංගල සමරවීර ජවිපෙ කැරැල්ල සමයේ දකුණේ අතුරුදහන් කිරිම් වලට එරෙහිව ගොඩනංවන ලද මව්වරුන්ගේ පෙරමුණේ මුල් පෙළේ නායකයෙකු වේ.
Facebook Comments
