මන්නාරමේ පස් හාරන්නට ගිය රජයේ නිලධාරීන් හිස් අතින් හරවා එවයි

ඛනිජ වැලි ටොන් ලක්ෂ ගණනක් හාරා ගැනීම සඳහා බහුජාතික සමාගමකට බලපත්‍ර නිකුත් කිරීමට මන්නාරම් භුමියේ විමර්ශන කටයුතු සඳහා පැමිණි රාජ්‍ය නිලධාරීන් ප්‍රමුඛ ආයෝජකයන්ට විරෝධය දැක්වු ගම් වැසියන් උසාවි ගෙන ගිය පොලීසිය අධිකරණයේදී පැමිණිල්ල ඉල්ලා අස්කරගෙන තිබේ.

පළාත් බද වාර්තාකරුවන් පවසන්නේ නොවැම්බර් 06 වැනි බ්‍රහස්පතින්දා මිනින්දෝරු දෙපාර්තමේන්තු නිලධාරීන්, මධ්‍යම පරිසර අධිකාරියේ නිලධාරීන්, මන්නාරම දිස්ත්‍රික්කයේ සහකාර දිස්ත්‍රික් ලේකම්, මන්නාරම ප්‍රාදේශිය සභාවේ නිලධාරීන් ඇතුළු රාජ්‍ය ආයතන 20 ට අධික ප්‍රමාණයක නියෝජිත මණ්ඩලයක් ටයිටේනියම් කැනීම වෙනුවෙන් නියැදි ලබා ගැනීමට මන්නාරම ප්‍රාදේශීය ලේකම් කොට්ඨාසයට අයත් ඕලෙයිතොඩුවායි, වලනගර් ග්‍රාමයට පැමිණි බවයි.

ඔවුන්ට විරෝධය පෑ කාන්තාවක් “ඕගොල්ලෝ මෙහෙ චෙක් කරන්න ඕනෙත් නෑ, ඕගොල්ලෝ මෙහෙ එන්න ඕනෙත් නෑ,” යනුවෙන් නිලධාරීන්ට දෙමළෙන් කියා සිටියාය.

නිලධාරීන් පැමිණ ඇත්තේ මහා පරිමාණයෙන් ඛනිජ වැලි කැනීම සඳහා බලපත්‍ර පහක් ලබා ගැනීමට ශ්‍රී ලංකා භූවිද්‍යා හා පතල් කැනීම් කාර්යාංශය විසින් අනුමැතිය ලබා දී ඇති ඕස්ට්‍රේලියාව මුලස්ථාන කොටගත් ටයිටේනියම් සෑන්ඩ්ස් බහුජාතික සමාගමේ නියෝජිතයන්ද කැටුවය.

මේ මාසය මුලදී ලැබුණු එම අනුමැතිය අනුව ශ්‍රී ලංකා ආයෝජන මණ්ඩලයේ විදේශ ආයෝජක බලපත්‍රය සඳහා අයැදුම් කිරීම සඳහා පිහිටුවාගෙන ඇති ව්‍යාපාරික ආයතනය ඔරයන් මිනරල්ස් (පුද්ගලික) සමාගමයි.

“ආයෝජන මණ්ඩලයේ මගපෙන්වීම සහ අනුග්‍රහය මේ කාර්යයට මහත් උපකාරයක් වුණා. භූවිද්‍යා හා පතල් කැනීම් කාර්යාංශයේ අනුමැතියත් ඔරයන් නමට බලපත්‍ර නිකුත් කිරීමත් කැනීම් සඳහා අයැදුම් කිරීමේ වේගයට සහායක්. ඉදිරි මාස කීපය තුලදී ලබාගන්නා ප්‍රතිපලය සමාගම සම්බන්ධ සාධනීය චිත්‍රයක් මවනු ඇත,” යි ටයිටේනියම් සෑන්ඩ්ස් කළමනාකාර අධ්‍යක්ෂ ආචාර්ය ජේම්ස් සියර්ල් පවසා තිබුණි.

එම ව්‍යාපෘතියට ප්‍රදේශවාසීන් සපුරාම විරුද්ධ බව වලනගර් ප්‍රදේශවාසියකු පිටින් ආ පිරිසට ඉංග්‍රීසියෙන් කියා දුන් අවස්ථාවේ ඔරයන් මිනරල්ස් නියෝජිතයෙක් එබසින්ම ප්‍රකාශ කළේ ‘අපිට ගහගන්න ඕනේ නෑ, අපිට වාද කරන්න ඕනේ නෑ,” යනුවෙනි.

වසරකට ඛනිජ වැලි ටොන් 150,000ක් කැනීමේ ශක්‍යතාව සහිත ටයිටේනියම් සෑන්ඩ්ස් ආයෝජනයේ අපේක්ෂිත ආදායම ඕස්ට්‍රේලියානු ඩොලර් බිලියන දෙකක් බව කැනීම් සම්බන්ධ අඩසියවසකට වැඩි විශේෂඥතාවක් සහිත භූ විද්‍යාඥ ඩග් බ්‍රයිට් පවසයි. ඒ සඳහා ආයෝජනය කරනු ඇත්තේ ඕස්ට්‍රේලියානු ඩොලර් මිලියන 122කි. එමගින් ජාත්‍යන්තර පරිමාණයේ ඉල්මනයිට් නිෂ්පාදකයකු වෙමින් ප්‍රදේශවාසීන් 600කට රැකියා සම්පාදනය කෙරෙණු ඇති බවටද ඔහු අපේක්ෂාව පල කර ඇත.

මන්නාරමේ නව සුළං බලාගාරය නිසා තමන්ට අහිමි වු ජන ජීවිතය පිළිබද අත්දැකීම් ඇති ගම්වැසියන් ප්‍රදේශයේ ජනතා නියෝජිතයන්, හා ආගමික නායකයන් සමග එක්ව රාජ්‍ය නිලධාරීන්ට බාධා පමුණුවා ඇත්තේ මෙම ආයෝජනය හරහා ද තමන්ට තව දුරටත් පීඩා විදීමට සිදු වනු ඇති බවට කරුණු දක්වමිනි.

දේශීය විශේෂඥ ඥානයෙන් නියමිත දිනට පෙර වැඩ අවසන් කළ බවට රජය උදම් අනන මන්නාරමේ නව සුළං බලාගාරය නිසා තමන් මේ වන විටත් විඳින පීඩාව සම්බන්ධයෙන් ප්‍රදේශවාසී කාන්තාවන වන ඩියුට් තවරානි ජනමාධ්‍ය වෙත පවසා තිබුනේ පහත අයුරිනි.

“මේ සුළං බලාගාරය ආපුවාම කිව්වා අපි පරීක්‍ෂා කරනවා, ඔයාට කිසිම අහිතකර ප්‍රතිඵලයක් වෙන්නේ නැහැ, එහෙම අහිතකර ප්‍රතිපලයක් වෙන්න ආණ්ඩුව ඉඩ දෙන්නේ නැහැ කියලා කිව්වා. ඒක විශ්වාස කරපු අපි අද පාර මැද ඉන්නේ. අද අපේ ගමට වැස්සොත් මාස තුනක් කෝවිලේ හරි ශාලාවේ හරි ඉන්න වෙනවා. සුළං බලය සහ ඛනිජ වැලි කැණීම් නිසා අපි අද දුක් විඳිනවා.”

එවැනි තත්වයක් යටතේ කිසිදු පිටස්තරයකුට තමන්ගේ ගම්බිම්වලට පැමිණිමට ඉඩ නොදෙන බව ඩියුට් තවරානි දැඩිලෙස කියා සිටියේ ප්‍රදේශවාසීන්ගේ අනුමැතියකින් තොරව ආරම්භ කරන මහා පරිමාණ ආයෝජන ජන ජීවිතය විනාශ කිරීමට මුල පුරන ආකාරය පිළිබඳව අනතුරු අඟවමිනි.

“මේ තැනට කවුරුවත් එන්න ඕනේ නෑ. ආවත් බහින්න දෙන්නේ නෑ. ආණ්ඩුව මේකට විසඳුමක් ලබාදිය යුතුයි. අපි මුලින්ම මේ ගැන පියවරක් ගත්තේ නැත්නම් ඒ අය ඇවිත් පරීක්‍ෂණයක් කරලා ගිවිසුම් අත්සන් කරනවා. ඊට පස්සේ එයාලා කියනවා, අපි ආවේ ජනතාවගේ සහයෝගයෙන් කියලා. පස් පරීක්ෂා කෙරුවා කියලා එයාලා කියනවා. අපි පරීක්ෂණයට ඉඩ දෙන්නේ නැහැ.”

පළාත් බද වාර්තාකරුවන් පවසන්නේ පස් සාම්පල ලබා ගැනිමට පැමිණි රාජ්‍ය නිලධාරීන්ට ගම් වාසීන්ගෙන් බාධා එල්ලවීම නිසා එම ස්ථානයට පැමිණි මන්නාරම් පොලිස්ථානයේ නිළධාරීන් අපරාධ නඩු විධාන සංග්‍රහයේ 106 වගන්තිය යටතේ, රජයේ නිලධාරීන්ගේ රාජකාරියට බාධා පැමිණවීම සිදු නොකරන ලෙස නියෝගයක් නිකුත් කරන්නයි ඉල්ලමින් ගම් වැසියන්ට එරෙහිව අධිකරණයට බී වාර්තාවක් හරහා කරුණු ගොනු කළ බවයි.

නීතිඥ එස්. ඩිනේෂන් පවසන්නේ නඩුව විභාග වෙමින් පවතින මොහොතේ අධිකරණ ශාලවෙන් පිටතට ගිය පොලිස් නිලධාරියෙක් ආපසු නඩුව විභාග වෙමින් පැවැති ශාලාවට පැමිණ නඩුව ඉල්ලා අස්කරගන්නා බව මන්නාරම මහේස්ත්‍රාත් වරයාට දැනුම් දුන් බවයි.

“එම නඩුව අතරතුරදී පොලිස් නිලධාරියෙක් හදිසියේම එළියට ගිහිල්ලා ආපසු ඇවිල්ලා, මට කෝල් එකක් ආවා කියලා නඩුව අවසන් වන විට මේ නඩුව ඉල්ලා අස්කර ගන්නා බව අධිකරණට දැනුම් දුන්නා. ඒ අනුව නඩුව ඉල්ලා අස්කරගෙන තිබෙනවා.”

ඕලෙයිතොඩුවායි, වලනගර් ග්‍රාමයට පැමිණි රාජ්‍ය නිලධාරීන් ඇතුළු බහුජාතික නියෝජිත පිරිස ද පසුව එම ග්‍රාමයෙන් පිටව යාමට සිදුවූ බව පළාත් බද වාර්තාකරුවෝ වැඩි දුරටත් පවසති.

රටේ නීතියක් වන 13 වැනි ව්‍යවස්ථා සංශෝධනය ප්‍රකාර පැවරිය යුතු ඉඩම් බලතල පළාත් සභාවලට ලබා දෙන ලෙස දිගින් දිගටම දෙමළ ජනතාව ඉල්ලා තිබේ.

ඉඩම් හෝ පොලිස් බලතල හෝ කිසිසේත් පළාත් සභාවලට පවරන්නේ නැති බව අනුර කුමාර දිසානායක ජනාධිපතිවරයාගේ ආණ්ඩුව ස්ථිර වශයෙන්ම අවධාරණය කර තිබේ.