මුල්ලිවයික්කාල් භූමියෙන් අලුත් ආණ්ඩුවට පරණ අභියෝගයක්

පහළොස් වසරක් ගතවීත් යුක්තිය ඉටුවී නැති යුද්ධයේ අවසාන භාගයේ බරපතල මානව හිමිකම් උල්ලංඝන චෝදනා සම්බන්ධයෙන් මුහුණ දෙන්නට ඇති අභියෝගය දෙමළ පක්ෂයක් විසින් නව රජයට සිහිපත් කර දී තිබේ.

දස දහස් සංඛ්‍යාත ජීවිත විනාශ කරමින් ලේ වැකි ගිය මුල්ලිවයික්කාල් භුමියේ දී උතුරේ දෙමළ පක්ෂයක් ප්‍රතිඥා දී ඇත්තේ ශ්‍රී ලංකාව ජාත්‍යන්තර අපරාධ අධිකරණය වෙත ගෙන යෑමට දරන වෑයම තව දුරටත් උත්සන්න කරන බවටයි.

“ජනතාවගේ පුර්ණ බලය ඒකරාශි කර ජාත්‍යන්තර අපරාධ පරීක්ෂණයක් සිදු කිරීමට, විශේෂයෙන් ශ්‍රී ලංකාව ජාත්‍යන්තර අපරාධ අධිකරණය වෙත ගෙනයෑමට අවශ්‍ය පිඩනය සහ වෙනත් ජාත්‍යන්තර පරීක්ෂණ සිදු කළ හැකි සංසද වලට ශ්‍රී ලංකාව ගෙනයෑමට අපගේ ගමන තවත් තීව්‍ර වෙනවා.”

ජාතික ජන බලවේගයට පාර්ලිමේන්තුවේ තුනෙන් දෙකක බලයක් අත්කර දෙමින් පසුගියදා නිමා වු මහ මැතිවරණයේ දී ඡන්ද 15,135 ක් ලබා යළිත් වරක් දෙමළ ජනතා නියෝජිතයකු ලෙස පාර්ලිමේන්තු වරම් හිමිකරගත් දෙමළ ජාතික ජනතා පෙරමුණේ නායකයා ඒ බව ප්‍රකාශ කළේ, දෙමළ ජනයාගේ අයිතීන් දිනා දිම වෙනුවෙන් ඉදිරි වසර පහ තුළ කළ යුතු වැඩ පිළිවෙල පිලිබදව මුල්ලිවයික්කාල් වර්ග සංහාර ස්මාරකය හමුවේ ප්‍රතිඥා දීමේ අවස්ථාවට එක්වෙමිනි.

හිටපු පාර්ලිමේන්තු මන්ත්‍රී සෙල්වරාජා ගජේන්ද්‍රන් ඇතුළු දෙමළ ජාතික ජනතා පෙරමුණේ ආධාර කරුවන් පිරිසක් සමග නොවැම්බර් 19 වැනි අගහරුවාදා මුල්ලිවයික්කාල් භුමිය වෙත පැමිණි දෙමළ ජාතික ජනතා පෙරමුණේ නායක ගජේන්ද්‍ර කුමාර් පොන්නම්බලම් ඝාතනය කෙරුණු දෙමළ ජනයා මලින් පහනින් අනුස්මරණය කර තිබේ.

ඉලංගෙයි තමිල් අරසු කච්චි (ITAK) නියෝජනය කරමින් වන්නි දිස්ත්‍රික්කයෙන් මහ මැතිවරණය සදහා තරග කළ තුරෙයිරාසා රවිහරන් ද ඡන්ද 11,215 ක් ලබා ගනිමින් පාර්ලිමේන්තුව නියෝජනය කිරීමේ වරම හිමිකරගැනීමත් සමගම නොවැම්බර් 15 වැනිදා උදෑසන මුල්ලිවයික්කාල් වර්ග සංහාර ස්මාරකය හමුවේ, ඝාතනයට ලක්වු දෙමළ ජනයා සිහිපත් කර තිබුනි.

මුල්ලිවයිකාල් භුමියේ සිදු වු වර්ග සංහාරය සම්බන්ධයෙන් ජාත්‍යන්තර අපරාධ අධිකරණයේ පරීක්ෂණයක් පැවැත්විය යුතු බව ගෙවී ගිය වසර 15 තුලදී සිය පක්ෂය දැඩිව අවධාරණය කළ ආකාරය සිහිපත් කළ ගජේන්ද්‍ර කුමාර් පොන්නම්බලම් මන්ත්‍රීවරයා එක්සත් ජාතින්ගේ මානව හිමිකම් කවුන්සිලය විසින්ම සම්මත කරන ලද යෝජනා වල පවතින දුර්වලතා සිය පක්ෂය ජාත්‍යන්තරයට මෙන්ම ජනතාවට පෙන්වා දුන් ආකාරයත් නොවැම්බර් 19 දා සිහිපත් කළේය.

කෙසේ නමුත් දෙමළ ජනතාවට එදිරිව කළ වර්ග සංහාරයට එරෙහිව කිසිදු අපරාධ පරික්ෂණයක් සිදු නොකරමින් ශ්‍රී ලංකා ආණ්ඩුවට සහ ත්‍රිවිධ හමුදාවට වසර 15 ක් දිගටම කාලය ලබා දි තිබෙන බැවින් සිය ක්‍රියා මාර්ග දැඩිව ක්‍රියාත්මක කිරීමට නියමිත බවයි ගජේන්ද්‍ර කුමාර් පොන්නම්බලම් මන්ත්‍රීවරයා එහිදී මාධ්‍යවේදීන් වෙත පවසා ඇත්තේ.

ඒකීය රාජ්‍ය ප්‍රතික්ෂේප කර ජාතික පිළිගැනීමක් සහිතව ස්වයංතීරණ අයිතිය පුර්ණ ලෙස භුක්ති විඳිය හැකි ෆෙඩරල් විසදුමක් වෙනුවෙන් දෙමළ ජාතික ජනතා පෙරමුණ ඉදිරියේදී ඉතා බැරැරුම් සහගත ලෙස ක්‍රියා කිරීමේ අවශ්‍යතාවයත් ඔහු එහිදි අවධාරණය කර තිබුනේ පහත අයුරිනි.

“ඒකීය රාජ්‍ය ප්‍රතික්ෂේප කර ජාතික පිළිගැනීමක් සහිතව ස්වයංතීරණ අයිතිය පුර්ණ ලෙස භුක්ති විදිහ හැකි ෆෙඩරල් විසදුමක් හරහා පමණයි අපිට ඉදිරියට යා හැක්කේ කියන පනිවිඩය ලෝකයට පෙන්නන්න පුළුවන් විදිහට අපේ පක්ෂය ඉදිරි කාලවලදී ඉතා බැරැරුම්ව කටයුතු කිරීමට අවශ්‍යයි.”

ව්‍යවස්ථාව වෙනස් කිරීමේ බලය දිනාගත් ජාතික ජන බලවේග ආණ්ඩුවේ නියාමක පක්ෂය වන ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා මහ මැතිවරණ ජයග්‍රහනයෙන් පසු දෙමළ ජනතාවට බලය බෙදීම ගැන දැනුම් දෙමින් පවසා තිබුනේ පළාත් සභා වලට වඩා සාධාරණ විසදුමක් ඉදිරිපත් කරගන්නා තුරු පළාත් සභා අහෝසි නොකරන බවයි.