ලෝක ව්‍යසනයක් වී ඇති කොරෝනා වෛරසය මෙරට තුල තවදුරටත් ව්‍යාප්ත වීම වළක්වාලීම සඳහා විදේශගතව සිට පැමිණෙන්නන්ට ශ්‍රී ලංකාව වසා දමන ලෙස ආණ්ඩුවට බල කරමින් මතුව එන උද්ඝෝෂණයට ලෝක පුජිත ක්‍රිකට් තරුවක් එක්ව සිටී.
රට වසා දමන ලෙස රජයට බලපෑම් කිරීමට ආරම්භ කරන ලද විරෝධයට සහාය දක්වමින් වන මහේල ජයවර්ධන සිය ට්විටර් ගිණුමේ සටහනක් තබා ඇත.
“මට පෞද්ගලිකව දැනෙන්නේ එය කළ යුතු බුද්ධිමත් දෙයයි.” ඔහු සිය සටහනින් අවධාරණය කර තිබේ.
ශ්‍රී ලංකාව වසා දමන ලෙසට විරෝධතාව දියත් වී ඇත්තේ ලාංකික සමාජ මාධ්‍ය ක්‍රියාධාරීන්ගෙනි.
එක් දිනක් තුල මෙරටින් වාර්තා වු වැඩිම කොරෝනා රෝගීන් සංඛ්‍යාව වන රෝගීන් දස දෙනකු හඳුනා ගනු ලැබු 16 සඳුදා එම විරෝධය උග්‍ර අතට හැරුන අතර ෆේස්බුක් පරිශිලකයන් තම කවර පින්තූරය හා profile පින්තූරය “#LockDownSL” ලෙස වෙනස් කර තිබෙනු දක්නට ලැබුනි.
සඳුදා පස්වරුව වන ව්ට මෙරට කොරෝනා ආසාදනය වු රෝගීන් 28 දෙනකු ප්‍රතිකාර ලබමින් සිටින බව සෞඛ්‍ය අංශ විසින් නිවේදනය කරන ලදී.
මේ අතර දැනට කැඳවා ඇති පාර්ලිමේන්තු මහ මැතිවරණය කල් දැමීමද විරෝධතා කරුවන්ගේ ප්‍රධානතම ඉල්ලීමක් වේ.
කෙසේ වෙතත් එම ඉල්ලීම වලට ජනාධිපති ගෝඨාභය රාජපක්ෂ ඇහුම් කන් දෙන වගක් පෙනෙන්නට නැති අතර මහ මැතිවරණය පවත්වන බවට ඔහු ඉරිදා සාක් කලාපීය නායකයන් හා පැවසීය.
ලොව පුරා පැතිර යන මරාන්තික කොරෝනා වෛරස හේතුවෙන් ජාත්‍යන්තර ක්‍රිඩා තරග සහ මැතිවරණ ගණනාවක් කල් දමා ඇතැයි විදෙස් මාධ්‍ය වාර්තා කර තිබුනි.
Facebook Comments
