“තඩි ප්‍රියන්ත”ට හා මිලින්ද මොරගොඩට තානාපති වරම්

0
Ivory Agency Sri Lanka
wedding people

හත් මසකට ඉහතදී පාර්ලිමේන්තු අවසරය නොලැබීම නිසා ජිනීවා යෑමට නොහැකි වු වර්තමාන ජනාධිපතිවරයාගේ නිල ජීවිත රචකයා ඇතුලු අට දෙනකු නව රාජ්‍ය තාන්ත්‍රික නිලධාරීන් ලෙස පත් කිරීම සදහා පාර්ලිමේන්තුවේ අනුමැතිය හිමිව තිබේ.

සිංහල ඩයස්පෝරාවේ විරෝධයට ඉලක්ක වී සිටි මිලින්ද මොරගොඩ ඉන්දියාවේ මහ කොමසාරිස් කර යැවීමටද පාර්ලිමේන්තුව එකඟ වී ඇත.

අසුව දශකය අගභාගයේ අතුරුදහන් කිරීම් සහ මිනීමැරීම් සම්බන්ධයෙන් චෝදනා ලබන ප්‍රා සංවිධානයේ නායකයකු වන “තඩි ප්‍රියන්ත” ලෙසින් ප්‍රසිද්ධ කන්දඋඩ ආරච්චිගේ ප්‍රියන්ත ප්‍රසන්න චන්ද්‍රප්‍රේම මාධ්‍යවේදියා ජිනීවා තානාපති ධුරය සඳහා තම සුදුසුකම් ඔප්පු කළ යුතු පාර්ලිමේන්තු කමිටුවට පසුගිය පෙබරවාරි මාසයේදී දෙවතාවක්ම කැඳවා තිබුණද ඊට සහභාගි නොවීය.

ජනතා විමුක්ති පෙරමුණේ දෙවැනි කැරැල්ල සමයේ ඝාතක කල්ලියක ප්‍රමුඛයකුව සිටි බවට චෝදනා ලද අයෙක් ජිනීවා නුවර නව ශ්‍රී ලංකා තානාපති ලෙස පිළිනොගන්නා ලෙස සත්‍යය සහ යුක්තිය සඳහා වන ජාත්‍යන්තර ව්‍යාපෘතිය (ITJP) හා ජේඩීඑස් සංවිධානය ඔහු පිළිබඳ වාර්තාවක් එලි දක්වමින් එවකට ස්විස් රජයෙන් ඉල්ලා තිබුනි.

ඔහු සම්බන්ධයෙන් පොලිසිය දුන් වාර්තා සත්‍යයෙන් තොර බවට JDS සංවිධානය ඒ දිනවල හෙළිදරව් කර තිබුණි.

කෙසේ වෙතත් පාර්ලිමේන්තුවේ උසස් නිලතල පිළිබඳ කාරක සභාව සැප්තැම්බර් 25 සිකුරාදා පස්වරුවේ ඔහුගේ නව පත්වීම සදහා අනුමැතිය ලබා දී තිබේ.

ඒ අනුව එක්සත් ජාතීන්ගේ සංවිධානයේ නිත්‍ය නියෝජිත ලෙස කන්දඋඩ ආරච්චිගේ ප්‍රියන්ත ප්‍රසන්න චන්ද්‍රප්‍රේම, ඉන්දියාවේ ශ්‍රී ලංකා මහ කොමසාරිස් ලෙස හිටපු අමාත්‍ය මිලින්ද මොරගොඩ, අමෙරිකාවේ ශ්‍රී ලංකා තානාපති ලෙස රවිනාථ ආරියසිංහ, දකුණු අප්‍රිකාවේ ශ්‍රී ලංකා මහ කොමසාරිස් ලෙස එස්.අමරසේකර, ඇෆ්ගනිස්ථාන තානාපති ලෙස විශ්‍රාමික අද්මිරාල් කේ.කේ.වී.පී හරිස්චන්ද්‍ර සිල්වා, ජපානයේ ශ්‍රී ලංකා තානාපති ලෙස විශ්‍රාමාල් සංජිව් ගුණසේකර, ප්‍රංශයේ ශ්‍රී ලංකා තානාපතිනි ලෙස මහාචාර්ය ක්ෂණිකා හිරිඹුරේගම සහ චීනයේ ශ්‍රී ලංකා තානාපති ලෙස ආචාර්ය පාලිත කොහොන පත් කිරීමට පාර්ලිමේන්තුවේ උසස් නිලතල පිළිබඳ කාරක සභාව අනුමැතිය ලබා දී ඇත.

ජනාධිපති ගෝඨාභය රාජපක්ෂගේ නිල ජීවිත කතාවේ රචකයා වන සී ඒ චන්ද්‍රප්‍රේම ජිනීවා යාම වැලැක්වීම සඳහා ශ්‍රී ලංකා කැම්පේන් සංවිධානය විසින් අන්තර්ජාලය හරහා පෙත්සමක් මේ වසර මුලදී ජාත්‍යන්තර වශයෙන් දියත් කර තිබු අතර මානව හිමිකම් මණ්ඩලයේ අසුන් ගෙන සභාවේ ගෞරවය පහත හෙලනු ඇති බව හා සමුළු වාර වලට සහභාගි වීම සඳහා ශ්‍රී ලංකාවේ සිට ජිනීවා යන මානව හිමිකම් ක්‍රියාධාරින්ට ඔහු තර්ජනයක් වනු ඇති බවට එමගින් අනතුරු අඟවා තිබුනි.

ඉන්දියාවේ මහ කොමසාරිස් පදවිය සදහා හිටපු අමාත්‍යවරයකු වන මිලින්ද මොරගොඩ ශ්‍රී ලංකා රජය විසින් නිළ වශයෙන් යෝජනා කිරීමටත් පෙර ඔහු එම තනතුර සදහා පත් නොකරන්නැයි ඉල්ලමින් සිංහල ඩයස්පෝරා සංවිධානයක් ජනාධිපතිවරයාට ලිපියක් යොමු කර තිබුනි.

ජාතියේ උපායමාර්ගික වැදගත්කම් සහිත තනතුරු සදහා උචිත උදවිය නම් කිරීමේ ජනාධිපති සතු පරම අයිතියට ගරුකරන අතරම, ඉංදියාවේ තානාපති ලෙස මිලින්ද මොරගොඩ වැනි පුද්ගලයෙකු පත් කිරීම ජාතියේ යහපතට විරුද්ධ ප්‍රතිඵල ළඟා කර දෙන්නක් බවයි ශ්‍රී ලංකාවේ සාමය එක්සත්කම හා මානව හිමිකම් සදහා සංසදය පවසා තිබුනේ.

ජනපතිගේ ස්ථාවරය

තමන් කරන පත්වීමකට විරුද්ධව එය වෙනස් කරන ලෙස බලපෑම් නොකරන්නැයි විශේෂ ඉල්ලීමක් කළ ජනාධිපතිවරයා පසුගියදා අවධාරණය කර තිබුනේ පත්වීම් කරනු ලබන්නේ “ගැඹුරින් සිතා බලා” බවයි.

එහිදී “ජාති හිතෛෂිබව” සුදුසු කමක් ලෙස සැලකිල්ලට ගෙන තිබේ.

උසස් නිලතල පිළිබඳ කාරක සභාව

නව වැනි පාර්ලිමේන්තුවේ පළමුවන සැසිවාරය සඳහා පත්කළ සාමාජිකයන් 18 දෙනකුගෙන් සමන්විත උසස් නිලතල පිළිබඳ කාරක සභාව කථානායක මහින්ද යාපා අබේවර්ධන විසින් සැප්තැම්බර් 8 අඟහරුවාදා නිවේදනය කර තිබුනි.

එහි සාමාජිකයන් ලෙස චමල් රාජපක්ෂ, නිමල් සිරිපාල ද සිල්වා, දිනේෂ් ගුණවර්ධන, ජොන්ස්ටන් ප්‍රනාන්දු, ඩග්ලස් දේවානන්ද, බන්දුල ගුණවර්ධන, කෙහෙලිය රඹුක්වැල්ල, උදය ගම්මන්පිල, රමේශ් පතිරණ, සුදර්ශනී ප්‍රනාන්දුපුල්ලේ, විදුර වික‍්‍රමනායක, ජෝන් සෙනෙවිරත්න, අනුර ප්‍රියදර්ශන, යාපා විජිත හේරත්, රිෂාඩ් බදියුදීන්, තලතා අතුකෝරාල, ෆීල්ඩ් මාෂල් සරත් ෆොන්සේකා යන පාර්ලිමේන්තු නියෝජිතයන් ස්ථාවර නියෝග 124 අනුව පත්කර තිබේ.

Facebook Comments