මහ මුහුදේ අපරාධ මැඩලීම සම්බන්ධයෙන් ශ්‍රී ලංකාවේ නාවික හමුදාවේ සහ වෙරළාරක්ෂක දෙපාර්තමේන්තුවේ නිලධාරීන් පිරිසක් එක්සත් ජාතීන්ගේ සංවිධානයේ විශේෂ උපදේශක පුහුණුවක් ලබාගෙන තිබේ.
එක්සත් ජාතීන්ගේ මත්ද්‍රව්‍ය සහ අපරාධ සම්බන්ධ කාර්යාලයේ සාගරික අපරාධ සම්බන්ධ ගෝලීය වැඩසටහන මගින් ශ්‍රී ලංකා නාවික හමුදාවේ සහ වෙරළාරක්ෂක දෙපාර්තමේන්තුවේ නිලධාරීන් සඳහා නෞකා වෙත ප්‍රවිෂ්ටවීම, සෝදිසි කිරීම සහ අත්අඩංගුවට ගැනීමේ ක්‍රමෝපායන් සම්බන්ධයෙන් පවත්වනු ලබන උපදේශක පාඨමාලාවේ ආරම්භක උත්සවය 2020 සැප්තැම්බර් 21 වන දින ත්‍රිකුණාමලය විශේෂ යාත්‍රා බලඝණ මූලස්ථානයේදී පැවැති බව නාවික හමුදාව නිවේදනය කර තිබේ.
ඉන්දීය සාගර කළාපයේ එම පුහුණුව ලබාදීම සඳහා ඇත්තේ සීසෙල්ෂ් රාජ්‍යයේ සහ ශ්‍රී ලංකාවේ ත්‍රිකුණාමලය විශේෂ යාත්‍රා බලඝණ මූලස්ථානයේ පමණක් යැයි නාවික හමුදාව වැඩි දුරටත් පවසයි.
ත්‍රිකුණාමලය විශේෂ යාත්‍රා බලඝණ මූලස්ථානයේදී පළමු වරට පවත්වනු ලබන මෙම විශේෂ උපදේශක පුහුණු පාඨමාලාව සඳහා ශ්‍රී ලංකා නාවික හමුදාවේ සහ වෙරළාරක්ෂක දෙපාර්තමේන්තුවේ නිලධාරීන් හතර දෙනෙකු සහභාගී වේ.
මෙම පාඨමාලාව මගින් නෞකා වෙත ප්‍රවිෂ්ටවීමේ ක්‍රියාපටිපාටිය සම්බන්ධව ශ්‍රී ලංකා නාවික හමුදාවේ සහ වෙරළාරක්ෂක දෙපාර්තමේන්තුවේ උපදේශක රාජකාරි නියුතු නිලධාරීන්ගේ දැනුම මුවහත් කිරීම අපේක්‍ෂා කෙරෙන බව නාවික හමුදාව සදහන් කරයි.
“ඒ අනුව ඉදිරියේදී මෙම පුහුණුවන නිලධාරීන් විසින් නාවික හමුදාවේ සහ වෙරළාරක්ෂක දෙපාර්තමේන්තුවේ නාවික පුද්ගලයන් වෙත එම දැනුම ලබා දීමට කටයුතු කෙරෙනු ඇත.”
මෙම උපදේශක පාඨමාලා ආරම්භ කිරිමේ අවස්ථාව සඳහා විශේෂ යාත්‍රා බලඝණයේ පුහුණු විධායක, එක්සත් ජාතීන්ගේ මත්ද්‍රව්‍ය සහ අපරාධ සම්බන්ධ කාර්යාලයේ නිලධාරීන් හා උපදේශකයන් සහ විශේෂ යාත්‍රා බලඝණයේ පුහුණු උපදේශකයන් පිරිසක් සහභාගී වී සිටි බව නාවික හමුදාව වැඩි දුරටත් සදහන් කරයි.
ඔවුන්ගේ නම් නාවික හමුදාවේ පුවත් වෙබ් අඩවිය මගින් අනාවරණය කර නොමැත.
Facebook Comments
