ශ්‍රී ලංකාව තුළ මේ වනවිට සංක්‍රමණික ජාවාරම මැඬලීමට සහ දේශසීමා ආරක්ෂණය සඳහා නීති සැකසීම සිදුකරන අතරම ඒ සඳහා විශේෂ යාන්ත්‍රණයක් සකස් කරමින් සිටින බව අග්‍රාමාත්‍ය කාර්යමණ්ඩල ප්‍රධානී, නීතිය හා සාමය සහ දක්ෂිණ සංවර්ධන අමාත්‍යවරයා පවසයි.
ශක්තිමත් නීති නොවන්නේ නම් සංක්‍රමණික ජාවාරම මැඬලීමටද අපහසු වන බව මෙන්ම දැනට පවතින නීති ක්‍රියාත්මක කිරීමටත් අවශ්‍ය තැන්වලදී නව නීති හඳුන්වාදීමටත් රජය කටයුතු කරන බව 14 අඟහරුවාදා පැවති සංක්‍රමණික ජාවාරම මැඬලීම පිලිබඳ වැඩමුළුව අමතමින් අමාත්‍ය සාගල රත්නායක මේ බව කියා සිටියේය.
ඕස්ට්‍රේලියාවේ උපායමාර්ගික ප්‍රතිපත්ති ආයතනය දැනට ශ්‍රී ලංකාවේ සංක්‍රමණික ජාවාරම පිළිබඳ පර්යේෂණ සිදුකර ඇති අතර ඒ යටතේ කරුණු රැසක් අනාවරණය වී තිබෙන බව කී ඇමැතිවරයා ඒ යටතේ බටහිර සහ වයඹ වෙරළ තීරයේත් දකුණු වෙරළ තීරයේත් මෙම ජාවාරම ක්‍රියාත්මකවන ආකාරය පිළිබඳ තොරතුරු ලැබී ඇති බව සඳහන් කළේය.
එසේම ඔස්ට්‍රේලියාව සමඟ මෑතකදී මේ පිළිබඳ අවබෝධතා ගිවිසුමකට අත්සන් කරනු ලැබූ අතර ඒ අනුව එම රජය සමඟ මේ සම්බන්ධව මනා අවබෝධතාවයෙන් යුක්තව කටයුතු කිරීමට රජය ක්‍රියා කරන බවත් . මෙම සංක්‍රමණික ජාවාරම තනි තනිව සිදුවන අපරාධයකට වඩා අන්තර්ජාතික වශයෙන් සිදුවන සංවිධානාත්මක අපරාධයක් බවට පත්ව තිබෙන බව අමාත්‍ය සගාල රත්නායක වැඩිදුරටත් පැවසීය.
Facebook Comments
