රිමාන්ඩ් සිරකරුවන් වෙනුවෙන් මුස්ලිම් කවියෙක් පෙරට එයි

නීතිය උල්ලංඝනය කරමින් සිරකොට තබා ගැනීම අභියෝගයට ලක් කරමින් බන්ධනාගාර බලධාරීන්ට එරෙහිව මුස්ලිම් කවියකු විසින් පැමිණිල්ලක් ගොනු කොට තිබේ.

අනාගතයේ දී අධිකරණයෙන් ඇප නියම කරනු ලබන රිමාන්ඩ් සිරකරුවන්ට වහාම නිදහස ලබා ගැනීම සම්බන්ධයෙන්ද ඔහු ශ්‍රී ලංකා මානව හිමිකම් කොමිසමේ සහාය පතා සිටී.

කිවියර හා ගුරුවර අහ්නාෆ් ජසීම් විසින් කොමිසමට කර ඇති පැමිණිල්ලෙන් වග උත්තරකරුවන් ලෙස නම් කර ඇත්තේ කොළඹ රිමාන්ඩ් බන්ධනාගාරයේ අධිකාරී රජීව් ශ්‍රීමාල් සහ බන්ධනාගාර කොමසාරිස් තුෂාර උපුල්දෙණිය ඇතුළු පිරිසකි.

ත්‍රස්තවාදය වැළක්වීමේ පනත යොදාගෙන දහනම මාසයක් සිරකොටගෙන සිටීමෙන් අනතුරුව උසාවියෙන් ඇප දුන් පසුත් කොළඹ රිමාන්ඩ් බන්ධනාගාරයේ බලධාරීන් විසින් තමන් පැය විසිහතරකට වැඩි කාලයක් අත්තනෝමතික සහ දෝෂ සහගත ලෙස නීති විරෝධී අත් අඩංගුවේ රඳවාගෙන සිටි බව මන්නාරමුදු අහ්නාෆ් නමින් දෙමළ පාඨක ප්‍රජාව අතර ප්‍රකට කවියා පැමිණිල්ලේ දක්වා ඇත.

එමගින් තමන්ගේ පුද්ගලික ස්වාධීනත්වය, ගෞරවය හා නිදහස ඇතුළු මූලික අයිතිවාසිකම් කඩ කර ඇති බවට ප්‍රකාශයට පත් කරන ලෙස ඉල්ලා සිටින කවියා ඊට වන්දි වශයෙන් රජය සහ/ හෝ වගඋත්තරකරුවන් ගෙන් කෝටි බාගයක මුදලක් අය කර දෙන ලෙස ඉල්ලා ඇතැයි ඔහුගේ නීතිඥ සංජය විල්සන් ගුණසේකර පවසයි.

එමෙන්ම, අධිකරණ නියෝගයක් ලැබුණු විගස සැකකරුවන් නිදහස් කිරීමට ඉඩ සැලසෙන පරිපාලන යාන්ත්‍රණයක් ස්ථාපනය කිරීම සඳහා නිර්දේශයක් ලබා දෙන මෙන්ද පැමිණිල්ල මානව හිමිකම් කොමිසමෙන් ඉල්ලා තිබේ.

ත්‍රස්ත මර්දන හා විමර්ශන කොට්ඨාශය විසින් අහ්නාෆ් ජසීම් අත් අඩංගුවට ගෙන තිබුනේ 2020 මැයි 16 දා පන්ඩාරවේලියේ පිහිටි ඔහුගේ නිවසේදීය. එම අත් අඩංගුවට ගැනීම පවා නීති විරෝධී බවට අභියෝග කරමින් ශ්‍රේෂ්ඨාධිකරණයේ පවරන ලද නඩුවක්ද ඇති බව කවියා ශ්‍රී ලංකා මානව හිමිකම් කොමිසමට පෙන්වා දී තිබේ.

ඔහුට අධිචෝදනා ගොනු කරන ලද්දේ 2021 නොවැම්බර් 15 දාය. එය 2021 නොවැම්බර් 15 දා පුත්තලම මහාධිකරණයේ විභාග කිරීමට ගන්නා ලද අවස්ථාවේ සිරගත කවියා වෙනුවෙන් ඉදිරිපත් කරන ලද ඇප අයදුම්පතක්ද සැලකිල්ලට ගෙන තිබේ. එහිදී ඔහුට ඇප ලබා දීම සම්බන්ධයෙන් නීතිපති දෙපාර්තමේන්තුව එකඟතාව පළකර ඇත.

උසාවි නියමය පරිදි එදින පස්වරු 1.30 වනවිට රුපියල් පන්ලක්ෂයක ශරීර ඇප තුනක් බැඳීමෙන් සහ තමන් සතුව ගමන් බලපත්‍රයක් නැති බවට දිවුරුම් ප්‍රකාශයක් ලබා දීමෙන් නිදහස් වී යාම සඳහා අවශ්‍ය කොන්දේසි සම්පූර්ණ කළත් බන්ධනාගාර බලධාරීන් මුස්ලිම් කවියා මුදා හැර නැත.

“කෙසේවෙතත්, මා නිදහස් නොකළ CRP නිලධාරීහු එකී දෙසැම්බර් 15 පස්වරු 4.30 පමණ වනවිට අත්තනෝමතික ලෙස මා පුත්තලමේ සිට කොළඹ රිමාන්ඩ් බන්ධනාගාරය වෙත ගෙන ගියහ,” යි අහ්නාෆ් ජසීම් කොමිසමට කළ පැමිණිල්ලේ කියා ඇත.

ඔහුගේ නීතිඥවරුන් විසින් ගොනු කරන ලද මෝසමක් විමසා බැලූ කොළඹ මහේස්ත්‍රාත් උසාවිය විසින් මහාධිකරණ නියමය පරිදි ඇප දෙන ලෙස පසුදා නියෝගයක් දෙන තුරුම ඔහුට නිදහස ලබා ගන්නට හැකිවී නැත.

“අන්තිමේදී මා කොළඹ රිමාන්ඩ් බන්ධනාගාරයෙන් නිදහස් කර යවන ලද්දේ 2021 දෙසැම්බර් 16 වැනිදා පස්වරු 4.30 ට පමනය.”

මන්නාරමුදු අහ්නාෆ් නමින් දෙමළ පාඨක ප්‍රජාව අතර ප්‍රකට අහ්නාෆ් ජසීම් ත්‍රස්ත මර්දන හා විමර්ශන කොට්ඨාශය (CTID) විසින් අත් අඩංගුවට ගන්නා ලද්දේ 2017 දී ලියා පලකළ නවරසම් (நவரசம்) පද්‍ය සංග්‍රහය ගැන සහ සිය ශිෂ්‍යයන් ‘අන්තවාදී මතවාදවල’ අනුගාමිකයන් බවට පත් කිරීමේ අභිලාෂයෙන් ඔවුන් ‘අන්තවාදී’ කරුණුවලට නිරාවරණය කළ බවට චෝදනා කරමිනි.