දෙමළ ජනයා මුහුණ පා සිටින දේශපාලනික ගැටලු වලට විසඳුම් ලබා නොදී සංහිඳියාව යාථාර්ථයක් කර ගත නොහැකි බව ගුරු සංගම් නායකයෙකු පෙන්වා දෙයි.
ආණ්ඩුව විසින් එම ගැටලු සම්බන්ධ සාකච්ඡාවක් ඇති කර සධාරණ යුක්තියක් ඉටු කල යුතු බවයි ලංකා ගුරු සංගමයේ නායක ජෝශප් ස්ටර්ලින් පවසන්නේ.
2015 වසරේ දී බහුතරයක් දෙමළ ජනයා යහපාලන රජයට ඡන්දය ලබා දුන්නේ එම අභිලාෂයන් ඉටු කර ගැනීම වෙනුවෙන් බවට කී ගුරු සංගම් නායකයා එම අපේක්ෂා මෙතෙක් ඉටු වී නොමැති බව සිලෝන් ජර්නල්ස් වෙත කියා සිටියේය.
“මේ ආණ්ඩුව 2015 ජනවාරි 8 වෙනිදා ආවාම බහුතරයක් ඡන්දෙ දුන්නේ උතුරු නැගෙනහිර ජනතාව ඔවුන් අපේක්ෂා කරපු කාරණා කිහිපයක් තියෙනවා තමන්ගේ ඉඩම් නැවත ලබා ගැනීම, අතුරුදහන් වුවන් වෙනුවෙන් යම් කිසි යුක්තියක් ඉටු කරවා ගැනීම, දේශපාලන සිරකරුවන් නිදහස් කිරීම, බලය බෙදා ගැනීම” බව පවසන ජෝශප් ස්ටර්ලින් වත්මන් රජය එම ගැටලු ගැන කිසිවක් නොකියන බවට චෝදනා කළේය.
සංහිඳියාව යථාර්ථයක් කර ගත හැක්කේ මෙම ගැටලු වලට විසඳුම් ලබා දීමෙන් පමණක් බවට ඔහු අවධාරණය කර සිටියේ ආණ්ඩුව විසින් 2017 වසර සංහිඳිය වසර ලෙස නම් කිරීම පිළිබඳව සිලෝන් ජර්නල්ස් වෙත විශේෂ ප්‍රකාශයක් ලබා දෙමිනි.
අ‍ාණ්ඩුව වර්ගවාදී වෙලා
දෙමළ ජනයාගේ එම ගැටලු වලට විසඳුම් ලබා දෙනවා වෙනුවට ආණ්ඩුව වර්ගවාදී ආකාරයට කටයුතු කරමින් සිටින බවට ගුරු සංගම් නායකයා චෝදනා කරයි.
“ව්‍යවස්ථාව සම්බන්ධ කාරණාව ගත්තත් ආණ්ඩුව පැහැදිලිවම කටයුතු කරමින් ඉන්නේ මේ ව්‍යවස්ථා විරෝධී බලය බෙදීමට විරුද්ධ අයගේ ඉල්ලුම් ඉටු කිරීම සඳහා” යැයි ජෝශප් ස්ටර්ලින් කියා සිටියේය.
රාජපක්ෂ සමයේ සකසන ලද උගත් පාඩම් සහ ප්‍රතිසන්ධාන කොමිසම් වාර්තාවේ නිර්දේශ පවා ක්‍රීයාත්මක කිරීමට වත්මන් රජය සුදානම් නොමැති බවට චෝදනා කරන ලංකා ගුරු සංගමයේ නායක ජෝශප් ස්ටර්ලින් 2015 සිංහල දෙමල සියලු ජනයා එක්වී යහපාලන රජය බිහි කරනු ලැබුවේ ජනවාර්ගීක ප්‍රශ්නයට විසඳුමක් ලබා ගැනීමේ අරමුණෙන් බව ප්‍රකාශ කළේය.
ගැටලු වලට භෞතික විසඳුම් ලබා නොදී සංකල්පය වශයෙන් කතා කීම ඵලක් නොමැති සේම එය සාමය යුක්තිය අපේක්ෂා කරන ජනතාව රැවටීමක් බව ලංකා ගුරු සංගමයේ නායක ජෝශප් ස්ටර්ලින් සිලෝන් ජර්නල්ස් වෙත කියා සිටියේ.
Facebook Comments
