පෞද්ගලික රෝහල් හෝ රසායනාගාර වල කොරෝනා රෝගය සම්බන්ධ පරීක්ෂණ පැවැත්වීමට අවසර නැති බවට අනතුරු අඟවන සෞඛ්‍ය බලධාරීහු වයිරසය හඳුනාගැනීමේ කටයුතු සිදුකෙරෙන්නේ විශේෂිත රජයේ රසායනාගාර කිහිපයක පමණක් බව පවසති.
කොවිඩ්-19 හෙවත් කොරෝනා වෛරසය පිළිබඳව වෛද්‍ය පරීක්ෂණ සිදුකරනු ලබන්නේ රජයේ රෝහල්වල පමණක් වන අතර පෞද්ගලික රෝහල්වලට ඒ සඳහා රජය මෙතෙක් අවසර දී නැති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ දැනුම් සිටී.
මේ වන විට එම පරීක්ෂණ සිදුකරනු ලබන්නේ රජයේ වෛද්‍ය පර්යේෂණ ආයතනය, ශ්‍රී ජයවර්ධනපුර විශ්ව විද්‍යාල වෛද්‍ය පීඨය, කරාපිටිය හා අනුරාධපුර ශික්ෂණ රෝහල් මගින් පමණකි.
රෝග ලක්ෂණ පහලවූ බවට සැක කරන අයෙක් වේ නම් වහාම රෝහල් කරා නොගොස් පළමු කොට රජය විසින් ප්‍රසිද්ධියට පත් කර ඇති දුරකතන අංක ඔස්සේ තම රෝගය සම්බන්ධයෙන් ගත යුතු පියවර සඳහා උපදෙස් ගන්නා මෙන් සෞඛ්‍ය බලධාරීහු නිර්දේශ කරති.
ශ්‍රී ලාංකිකයන් වැඩි වශයෙන් හඳුනන ඉන්ප්ලුවෙන්සා වෛරසයේ රෝග ලක්ෂණ කොරෝනා වෛරසයේ රෝග ලක්ෂණ වලට බෙහෙවින් සමානකම් දක්වන බැවින් කැස්ස, උණ, සෙම්ප්‍රතිශ්‍යාව වැළඳුනු පමණින් අනවශ්‍ය ලෙස කලබලයට පත් විය යුතු නැති බව සුවසැරිය සෞඛ්‍ය තොරතුරු මධ්‍යස්ථානය සදහන් කරයි.
කෙසේ නමුත් තමාට පවතින වෛරසය කුමක්දැයි කඩිනමින් සහ නිවැරදිව හදුනා ගැනීමේ වැදගත් කම එම මධ්‍යස්ථානය අවධාරණය කරයි.
අවදානම් අවස්ථා
විදෙස් රටක සංචාරයක් නිමා කර ආපසු දිවයිනට පැමිනීම, සංචාරක මාර්ගෝපදේශකයකු ලෙස කටයුතු කිරීම, සංචාරකයන් වැඩි වශයෙන් ගැවසෙන ක්ෂේත්‍රයක රාජකාරී කිරීම, කොරෝනා වෛරසය ආසාදිතයකු බවට හදුනාගත් පුද්ගලයකු සමග සමීප සම්බන්ධතා පැවැත්වීම් යනාදී සාධකත් සමග එම රෝග ලක්ෂණ පවතීනම් කඩිනමින් ඒ සඳහා වෛද්‍ය උපදෙස් ලබාගෙන ඉදිරි පියවර අනුගමනය කිරීම වැදගත් බව සුවසැරිය සෞඛ්‍ය තොරතුරු මධ්‍යස්ථානය පෙන්වා දෙයි.
ශ්‍රී ලංකාවේ දී මේ වනවිට හඳුනාගෙන ඇති කොරෝනා ආසාදිතයන් අතරින් රෝගීන් වැඩිම පිරිසක් ඇත්තේ ඉතාලියේ සිට පැමිණි ස්වදේශිකයන්ය.
කොරෝනා වෛරසය තමන්ට ආසාදනය වී ඇති බවට සැක කරන අයෙක් වේ නම් ලඟම පිහිටි රෝහල වෙත යොමු වීම නුසුදුසු බවට අනතුරු අඟවන සුවසැරිය සෞඛ්‍ය තොරතුරු මධ්‍යස්ථානයේ ප්‍රකාශකයකු අප සමග සදහන් කළේ පහත දැක්වෙන පියවර අනුගමනය කිරීම ඉතා වැදගත් බවයි.
1. ස්වයං නිරෝධායනයට ලක් වීම
2. තවෙකකුට එය බෝ වීමට ඇති අවස්ථා නැති කිරීම
3. ප්‍රතිකාර ලබා ගත හැකි බවට නම් කර ඇති රජයේ රෝහලකට දුරකතනයෙන් අමතා උපදෙස් ලබා ගැනීම
4. රෝහල කරා යෑමට පෙර තමන් එහි පැමිණෙන බවට රෝහල් කාර්යමණ්ඩලය දැනුවත් කිරීම
5. පොදු ප්‍රවාහන පහසුකම් භාවිත නොකිරීම
6. පුර්ව දැනුවත් කිරීමක් සිදු කර 1990 අමතා සුවසැරිය ගිලන් රථයක් ගෙන්වා ගැනීම
7. එහි ගමන් කිරීමේදී මුඛ ආවරණයක් (මාස්ක්) පැලදීම
8. රෝහල් භුමියට ඇතුලත් වීමෙන් පසු අනෙකුත් රෝගීන් ගැවසෙන ස්ථානය වෙත යොමු නොවීම
තම මධ්‍යස්ථානය මගින් ආරක්ෂිත පියවර සම්බන්ධයෙන් ජනතාව දැනුවත් කිරීම සදහා බෙදාහැර තිබෙන මුද්‍රිත අත්පත්‍රිකා අධ්‍යයනය කරන ලෙසත් සුවසැරිය ප්‍රකාශකයා වැඩි දුරටත් ඉල්ලා සිටියේය.
මීට අමතරව කොරෝනා වෛරස් ආසාදනයෙන් වැලැකී සිටීමට අවශ්‍ය උපදෙස් ඇතුලත් කොට ලෝක සෞඛ්‍ය සංවිධානය විසින් නිෂ්පාදනය කර තිබෙන වීඩියෝ පටයක් සිංහල, දෙමළ සහ ඉංශ්‍රීසි යන භාෂා ත්‍රිත්වයෙන්ම ප්‍රසිද්ධියට පත් කර දී තිබේ.
කොරෝනා වසංගතය සම්බන්ධයෙන් අත්‍යාවශ්‍ය දුරකතන අංක කිහිපයක්
1990 : සුව සැරිය ගිලන් රථ සේවාව
117 : ජනාධිපති කාර්ය සාධක බලකාය
011-2695112: වසංගත රෝග අංශය
011-2112705: නිරෝධායන අංශය
Facebook Comments
