උතුරේ අක්කර තුනක් මුදා හැරීමේ කටයුතු ආරම්භ කෙරේ

දෙවසකරට ඉහතදී ප්‍රාදේශීය ඉඩම් බලධාරියා විසින්ම අයිති කරුවන් තහවුරු කළ, තුන් දශකයක් තිස්සේ යුද හමුදාව බලහත්කාරයෙන් වාඩිලා සිටින උතුරේ පෞද්ගලික ඉඩමක් නිදහස් කිරීමේ කටයුතු ආරම්භ වී තිබේ.

පළාත් බද වාර්තාකරුවන් පවසන්නේ එකම පවුලේ සහෝදරයන් තිදෙනකුට අයත් අක්කර 3 ක භුමියක් පුරා ස්ථාපිත කර තිබු පේදුරුතුඩුව කට්කෝවලම් හමුදා කදවුර ඉවත් කිරීමේ කටයුතු නොවැම්බර් 18 වැනිදා ආරම්භ වු අතර සති දෙකක කාලයක් තුළ නීත්‍යානුකුල අයිතිකරුවන්ට පැවරීමට නියමිතව ඇති බවයි.

ඒ සම්බන්ධයෙන් ප්‍රවේසම් සහගත ප්‍රතිචාරයක් දක්වන පාර්ලිමේන්තුවේ එකම රාජපක්ෂවරයා තවත් යුද කඳවුරු ‘විශාල ප්‍රමාණයක්’ ඉදිරියේදී නිදහස් කිරීමට නියමිත බව පවසයි.

1995 වසරේදී යුද හමුදාව විසින් එම භුමිය බලහත්කාරයෙන් අත්පත්කර ගැනීමෙන් අනතුරුව ශ්‍රී ලංකා සිංහ රෙජිමේන්තුවේ 4 වැනි බළඇණියට අයත් හමුදා කදවුරක් ස්ථාපිත කර තිබුනි.

පළාත් බද වාර්තාකරුවන් පවසන්නේ සිය ඉඩම ආපසු ලබා දෙන ලෙස ඉඩමේ හිමිකරුවන් විසින් දිගින් දිගටම කළ උද්ඝෝෂණ හමුවේ එම භුමියේ නිල අයිතිකරුවන් ඔවුන්මදැයි පරීක්ෂා කර දෙන ලෙස හමුදා කදවුරේ ප්‍රධානියා විසින් 2022 වසරේදී පේදුරුතුඩුව ප්‍රාදේශිය ලේකම් කාර්යාලයෙන් ඉල්ලීම් කර තිබු අතර එම ඉඩමේ හිමිකරුවන් වන්නේ එම ඉඩමට අයිතිවාසිකම් කියාපාන එම පුද්ගලයන් තිදෙනාම බව ප්‍රාදේශිය ලේකම් කාර්යාලයෙන් තහවුරු කර තිබු බවයි.

ඒ අනුව හමුදා කදවුර ඉවත් කිරීමට 2023 වසරේ අගෝස්තු 14 වැනිදා යුද හමුදාව සුදානම් වු මොහොතේ ප්‍රදේශවාසීන් ඊට විරුද්ධ වී තිබුනේ ප්‍රදේශයේ සිදු වන අනවසර වැලි ගොඩදැමීම් ඇතුළු නීති විරෝධි කටයුතු නතර වීමටනම් හමුදා කදවුර එම ස්ථානයේ පැවැතිය යුතු බව පවසමිනි.

කෙසේ නමුත් හමුදා මුලස්ථානයෙන් ලද නියෝගයකට අනුව එම හමුදා කදවුර ඉවත් කිරීමේ කටයුතු මේ වන විට ආරම්භ වී ඇති අතර යුද්ධ හමුදා ජනමාධ්‍ය හා මනෝවිද්‍යාත්මක මෙහෙයුම් අධ්‍යක්‍ෂ ජෙනරාල් සහ යුද්ධ හමුදා මාධ්‍ය ප්‍රකාශක මේජර් ජෙනරාල් රසික කුමාර ජනමාධ්‍ය වෙත පවසා තිබුනේ හමුදා කදවුර සම්පුර්ණයෙන්ම ඉවත් කිරීමෙන් පසු එම භුමිය එහි අයිතිකරුවන්ට ලබා දීමට නියමිත බවයි.

”යුද හමුදා කඳවුරේ විදුලි කණු ගලවා පිරිසිදු කිරීමේ කටයුතු සිදුකරමින් පවතිනවා. හමුදාවට දැනටමත් ලැබී ඇති ඉල්ලීම් අනුව මෙම ඉඩම් නිදහස් කිරීමට කටයුතු කර තිබෙනවා. යුද හමුදා කඳවුර සම්පූර්ණයෙන්ම ඉවත් කිරීමෙන් පසු එම ඉඩම අයිතිකරුවන්ට ලබාදීමට නියමිතය.”

ඒ අයුරින්ම තවත් යුද හමුදා කඳවුරු විශාල ප්‍රමාණයක් ඉදිරි මාසවලදී ඉවත් කිරීමටද ආණ්ඩුව සැලසුම් කර ඇතැයි කියා සිටින නාමල් රාජපක්ෂ මන්ත්‍රීවරයා ඉඩම් මුදාහැරීම සිදුකෙරෙන්නේ ආරක්ෂක අංශ සාකච්ඡා කර සමාලෝචනයකින් පසුව නම් එහි ගැටළුවක් නොමැති බව ප්‍රකාශ කරයි.

“හමුදා කඳවුරු ඉවත්කර ඉඩම් මුදාහැරීම ආරක්ෂක අංශ සමඟ සාකච්ඡා කර සමාලෝචනයකින් පසුව වගකීම් සහගතව සිදුකළ යුත්තකි. ජාතික ආරක්ෂාවට කිසියම් හෝ හානියක් මෙමඟින් සිදුනොවිය යුතු බවට අප තරයේ විශ්වාස කරමු,” යි ශ්‍රී ලංකා පොදුජන පෙරමුණේ ජාතික ලැයිස්තු මන්ත්‍රීවරයා සමාජ මාධ්‍ය ඔස්සේ සටහනක් යොදා තිබේ.

ඔහුගේ පක්ෂයේද සහායෙන් රනිල් වික්‍රමසිංහ ජනාධිපතිවරයා ආණ්ඩු කළ සමයේ පේදුරුතුඩුව කට්කෝවලම් හමුදා කදවුර පිහිටි භුමිය ආපසු පැවරීම සඳහා ඉඩමේ අයිතිය තහවුරු කරගැනීමට යුද හමුදාව ඇතුළු පළාත් පාලන බලධාරීන් පියවර ගන්නා අවස්ථාවේ ශ්‍රී ලංකා පොදුජන පෙරමුණ හෝ රාජපක්ෂ මන්ත්‍රීවරයා ඒ සම්බන්ධයෙන් ප්‍රසිද්ධියේ අදහස් පලකළ බවක් දැනගන්නට නැත.

මහ මැතිවරණය ඉලක්ක කරගනිමින් ජාතික ජන බලවේගය නොවැම්බර් 10 වැනිදා වව්නියාවේ සංවිධාන කර තිබූ ජන රැලියක් අමතමින් ජනාධිපති අනුර කුමාර දිසානායක පවසා තිබුනේ රජය පවරාගෙන ඇති උතුරේ දෙමළ ජනතාවගේ ඉඩම් යළි පවරාදීම පිළිබඳවද සැලකිල්ලට භාජනය කර ඇති බවයි.