අපරාධ පරීක්ෂණ දෙපාර්තමේන්තුවේ නිලධාරියකු ලෙස තමන් හදුන්වා දුන් අයකු විසින් සිදු කළ ප්‍රශ්න කිරීම් හේතුවෙන් කඳුකරයේ දෙමළ ජනතාවගේ සංස්කෘතික ක්‍රියාකාරකම් වල යෙදෙන කණ්ඩායමක් පීඩාවට පත්ව සිටි.
ජනතාවට විනෝදාස්වාදය ලබාදීමේ අරමුණින් කලා නිර්මාණයේ යෙදෙන තමන්ට පරීක්ෂණ නාමයෙන් දිගින් දිගටම තර්ජන සිදු වන බවයි කඳුකරයේ තියටර් මේට්ස් (Theatre Mates) නාට්‍ය කණ්ඩායම පවසන්නේ.
“දිගින් දිගටම මෙහෙම කරන එක අපට ඔලුවේ කැක්කුමක්නේ. මේ වගේ කලාවක් කරන එකටවත් නිදහසක් නැද්ද”
තියටර් මේට්ස් නාට්‍ය කණ්ඩායම පසුගිය වසරේ බොගවන්තලාව, කොටියාගල ප්‍රදේශයේ රඟ දැක්වීමට නියමිතව තිබු ‘ලයත්තු කෝළිගල්’ නාට්‍යයට ද යුද හමුදාව හා පොලිස් STF බලකාය වතු පාලනාධිකාරිය සමග එක්වී වලක්වාලීමට කටයුතු කර තිබුනි.
පළාත් බද වාර්තාකරුවන් පවසන්නේ තියටර් මේට්ස් නාට්‍ය කණ්ඩායම ‘කෝටි ගණන්’ (கோடியோரக் கூடல்) නාට්‍ය සෑම මසකම තුන්වැනි ඉරිදා දරුවන් වෙනුවෙන් විවිධ ප්‍රදේශ වල රඟ දක්වන අතර නොවැම්බර් 17 වැනි ඉරිදා එය රග දක්වනු ලැබුවේ බොගවන්තලාවේදී බවයි.
නාට්‍ය රග දක්වමින් සිටියදී එතනට පැමිණි පුද්ගලයකු තමන් අපරාධ පරීක්ෂණ දෙපාර්තමේන්තුවේ නිලධාරියකු බව පවසමින් “ඔයාලා මෙතන කරන්නේ මොකක් ද, මේ වැඩේ සංවිධානය කළේ කවුද?” ආදී ප්‍රශ්න විමසමින් සදහන් කර ඇත්තේ අපරාධ පරීක්ෂණ දෙපාර්තමේන්තුව මෙම නාට්‍ය රග දැක්වීම සම්බන්ධයෙන් විමර්ශනයක් සිදු කිරීමට තමන් එම ස්ථානයට එවු බවයි.
එවිට ඔහුගෙන් නාට්‍ය කණ්ඩායමේ සාමාජිකයන් විමසා ඇත්තේ නාට්‍ය බැලීම සදහා අපරාධ පරීක්ෂණ දෙපාර්තමේන්තුවේ නිලධාරින්ටද එක්විය හැකිව තිබියදී තම කණ්ඩායම පසුපසු පැමිණෙන්නේ ඇයිද යන්නයි.
“අපි මෙතන නාට්‍යයක් කරනවා. මෙතන ඉඳගෙන නාට්‍යය බලන්න ඔයාටත් පුළුවන්. CID අයටත් එන්න කියන්න. එයාලටත් මේ නාට්‍ය බලන්න පුළුවන්. ඇයි සීඅයිඩී ය අපේ පස්සෙන් එන්නේ?
සිය නාට්‍ය සම්බන්ධයෙන් සොයනවාට වඩා අපරාධ පරීක්ෂණ දෙපාර්තමේන්තුවට බොගවන්තලාවේ සොයා බැලීමට වැදගත් බොහෝ දෑ පවතින බව පවසමින් ඒ සම්බන්ධයෙන් සොයා බලන්නැයි නාට්‍ය කණ්ඩායමේ පිරිස අපරාධ පරීක්ෂණ දෙපාර්තමේන්තුවේ නිලධාරියෙකු ලෙසට තමන්ව හදුන්වා දුන් පුද්ගලයාට පැවසීමත් සමග දෙපිරස අතර බහින්බස් වීමක් සිදුව තිබේ.
ඔහුගේ අනන්‍යතාවය තහවුරු කිරීම සදහා නිල හැදුනුම්පත පෙන්වන ලෙස නාට්‍ය කණ්ඩායමේ පිරිස සිදු කළ ඉල්ලීම ප්‍රතික්ෂේප කළ එම පුද්ගලයා පසුව එම ස්ථානයෙන් පිටව ගිය බව පළාත් බද වාර්තාකරුවෝ පවසති.
වතු කම්කරුවන්ගේ ජීවිතය විදහා දක්වන දෙමළ නාට්‍යයක් වේදිකා ගත කිරීම වලක්වාලීමට රජයේ ආරක්ෂක අංශ වතු හාම්පුතුන් සමග එක්වී දැරු උත්සාහයක් සම්බන්ධයෙන් තියටර් මේට්ස් (Theatre Mates) නාට්‍ය කණ්ඩායම පසුගිය වසරේ ජුලි මාසයේ දී පැමිණිලි කළේය.
2023 වසරේ ජුලි මස 09 වැනිදා සවස බොගවන්තලාව, කොටියාගල ප්‍රදේශයේ රඟ දැක්වීමට නියමිතව තිබු ‘ලයත්තු කෝළිගල’ නාට්‍යය යුද හමුදාව හා පොලිස් STF බලකාය වතු පාලනාධිකාරිය සමග එක්වී වලක්වාලීම සම්බන්ධයෙන් ජුලි 26 වැනිදා ශ්‍රී ලංකා මානව හිමිකම් කොමිසමට පැමිණිල්ලක් ඉදිරිපත් කරමින් නාට්‍යයේ අධ්‍යක්ෂවරයා අනාගතයේ නිර්මාණකරණයේ යෙදීමේදී ආරක්ෂාව තහවුරු කරගැනීමට ඇති හැකියාව පිළිබඳව බිය පල කර තිබුනි.
Facebook Comments
