රුසියාවේ හිටපු තානාපති උදයංග වීරතුංග අත්අඩංගුවට ගෙන අධිකරණයට ඉදිරිපත් කරන ලෙස දන්වා අධිකරණය විවෘත වරෙන්තු නිකුත් කර තිබේ.
මූල්‍ය අපරාධ විමර්ශන කොට්ඨාසය සිදු කළ කරුණු දැක්වීමක් සලකා බැලූ කොටුව මහේස්ත්‍රාත් ලංකා ජයරත්න අදාළ විවෘත වරෙන්තුව ජාත්‍යන්තර පොලිසිය වෙත යැවිම සඳහා ඉංග්‍රීසි භාෂාවෙන් නිකුත් කරන ලෙස 16 සිකුරාදා නියෝග කර ඇත.
රාජපක්ෂ පාලන සමයේදී ශ්‍රී ලංකා ගුවන් හමුදාවට යුක්‍රේනයෙන් මිග් 17 සහ 27 ගුවන් යානා මිලදී ගැනීමේදී අයථා ලෙස උපයා ගත් බවට හිටපු තානාපති උදයංග වෙත චෝදනා එල්ල වී තිබේ.
ගුවන් යානා මිලදී ගැනීමේදී අයථා ලෙස උපයා ගත් මුදලින් රුසියාවේ හිටපු තානාපති උදයංග වීරතුංග මිලදී ගත්තේ යැයි කියන දේපල කිහිපයක් විකිණිම හෝ පැවරීම තහනම් කරමින් අධිකරණ මීට පෙර නියෝග නිකුත් කර තිබුණි.
ඩුබායි බලධාරින් අන්දයි
මිග් යානා ගනුදෙණුවට අදාලව චෝදනා එල්ල වී ඇති උදයංග වීරතුංග පසුගිය පෙබරවාරි මස 04 වනදා ඩුබායි ගුවන්තොටුපලේදී ගුවන් තොටුපල බලධාරින් විසින් අත්අඩංගුවට ගෙන ප්‍රශ්න කර ඇති බව ද මූල්‍ය අපරාධ විමර්ශන කොට්ඨාසය අද අධිකරණයට දැනුම් දෙන ලදි.
ඩුබායි බලධාරින් උදයංග වීරතුංගගේ විදෙස් ගමන් බලපත්‍රය, පදිංචි ස්ථානය සහ දුරකතන අංකය ඇතුළු තොරතුරු ලබා ගැනිමෙන් අනතුරුව ඔහු මුදාහැර ඇති බවයි මූල්‍ය අපරාධ අධිකරණය හමුවේ කියා සිටියේ.
කෙසේ වෙතත් එසේ ලබා දී ඇති දුරකතන අංක සහ ලිපිනය ද ව්‍යාජ බව පොලිසිය අධිකරණයට වැඩි දුරටත් දැනුම් දෙන ලදි.
Facebook Comments
