ජාතිකත්වය මත පාසල් බිහි වීම සංහිඳියාව බිඳ වැටීමට හේතුවක් – මල්වතු මහනායක

0

සිංහල, දෙමළ සහ මුස්ලිම් වශයෙන් ජාතිකත්වය පදනම් කරගෙන පාසල් බිහි වීම ජාතීන් අතර සාමය සහ සංහිඳියාව පලුදු කිරීමට හේතු වූ බව මහා විහාරවංශික ස්‍යාමෝපාලී මහා නිකායේ මල්වතු මහා විහාර පාර්ශවයේ මහා නායක තිබ්බටුවාවේ ශ්‍රී සිද්ධාර්ථ සුමංගලාභිධාන මහා නායක හිමියන් පවසා තිබේ.

මුල් යුගයේ මෙරට පැවති අධ්‍යාපනය ක්‍රමය අනුව සිංහල, දමිළ සහ මුස්ලිම් යන සියළුම දරු දැරියන් එකම පාසලක් තුළ සාමයෙන් සහ සමඟියෙන් අධ්‍යාපන ලැබූ බවත් ඒ තුළින් ඔවුන් සංහිදියාව පිළිබද ප්‍රායෝගිකවම උගත් බව මහනායක හිමියන් බැහැ දැකීමට පැමිණි පළාත් පාලන අමාත්‍ය ෆයිසර් මුස්තාපා හට කියා ඇත.

පාසල් අධ්‍යාපනය තුළ ජාතීන් අනුව පාසල් බිහි වීම නිසා සිසු සිසුවියන් අතර පැවති මෙම එකමුතු බව සහ අනෝන්‍ය අවබෝධය බිද වැටුනු බවයි උන්වහන්සේ පෙන්වා දෙන්නේ.

එක් පාසලක් තුල සියලු ජාතින් මුසු වෙමින් සියළුම භාෂාවන් ඉගෙන ගැනීමට තිබූ හැකියාවද ජාතිකත්වය පාසල් බිහිවිම නිසා අහිමිව ගිය බව පවසා ඇති මහනායක හිමියන් ජාතීන් අතර ඇති වන විවිධ අර්බුද සදහා ද එය බලපෑ බව ප්‍රකාශ කර තිබේ.

ජාතිවාදී විෂබීජ

ලංකාවේ ජනතාව අතරින් මහනුවර දිස්ත්‍රික්කයේ සිංහල සහ මුස්ලිම් ජනතාව කාලාන්තරයක සිටම ඉතා සමගියෙන් සිටි බව පෙන්වා දී ඇති අමාත්‍ය ෆයිසර් මුස්තාපා මුස්ලිම් ජනතාව වෙනුවෙන් මහනුවර ඉදිකොට ඇති මීරාමක්කම් පල්ලිය පිහිටි භූමිය පවා දළදා මාළිගාව විසින් ලබා දීමෙන්ම ද සමගිය සහ සංහිදියා ප්‍රදර්ශනය වන බව තිබ්බටුවාවේ ශ්‍රී සිද්ධාර්ථ සුමංගලාභිධාන මහා නායක හිමියන් හට පෙන්වා දී ඇත.

අන්තවාදී පිරිසක් විසින් එම සංහිදියාව බිද දැමූ බවත් ඇතිවූ ගැටුම පුද්ගලික වුවත් අවසානයේ එය ජාතිවාදී ගැටුමක් දක්වා දුර දිග ගිය බවයි අමත්‍යවරයා සඳහන් කර ඇත්තේ.

ජාතිවාදී විෂබීජය වපුරුවා දේශපාලන වේදකාවක් සදා ගැනීමට ඇතැම් දේශපාලකයන් කටයුතු කිරීමට ගන්නා උත්සාහය පරාජය කළ යුතු බව මෙන්ම ජාතීන් සහ ආගම් අතර උද්ගතව ඇති අනවබෝධය තුරන් කිරීම සියළුම දේශාපලකයන්ගේ අරමුණ විය යුතු බවද පළාත් පාලන අමාත්‍ය ෆයිසර් මුස්තාපා වැඩි දුරටත් පවසා ඇත.

 

Facebook Comments

wedding people