අරගලකරුවන්ට එරෙහිව ගෙනයන මර්දනකාරිත්වය හෙළා දකින අතරේ ජනාධිපතිවරයාගේ සර්ව පාක්ෂික ආණ්ඩුවට සහාය පළ කරන බවට දෙමළ ජාතික සන්ධානය සහතික වී තිබේ.
“සර්ව පාක්ෂික ආණ්ඩුවක් පිහිටුවීම ගැන රැස්වීමකට ජනාධිපති රනිල් වික්‍රමසිංහ අපිටත් ඇරයුම් කරලා තියෙනවා.අපි ඒ රැස්වීමට සහභාගිවෙනවා පමණක් නොවේ සර්ව පාක්ෂික ආණ්ඩුවට සහාය දෙනවා,” යැයි දෙමළ ජාතික සන්ධානයේ නායක ආර්.සම්බන්ධන් පවසයි. සර්ව පාක්ෂික ආණ්ඩුවක් පිහිටුවීමට ඇරයුම් කරමින් ජනාධිපති රනිල් වික්‍රමසිංහ දේශපාලන පක්ෂවලට සහ පාර්ලිමේන්තු මන්ත්‍රීවරුන් වෙත යොමු කර ඇති ලිපිය ගැන දෙමළ මාධ්‍ය වෙත අදහස් දක්වමින් දෙමළ ජාතික සන්ධාන නායකයා මේ බව සඳහන් කර ඇත.
දෙමළ ජනතාවගේ ජාතික ප්‍රශ්නයට විසදුම් ලබා ගැනීමට නම් සර්ව පාක්ෂික ආණ්ඩුවක් අවශ්‍ය බව සම්බන්ධන් මන්ත්‍රීවරයාගේ විශ්වාසයයි.
අරගලකරුවන්ට එරෙහිව ගෙනයන ආණ්ඩුවේ මර්දනයට විරුද්ධව සෙසු පාර්ශව සමග එක්ව සටන් කරන බව දෙමළ ජාතික සන්ධානයේ මාධ්‍ය ප්‍රකාශක, පාර්ලිමේන්තු මන්ත්‍රී එම්.ඒ.සුමන්තිරන් කියා සිටියේ වෘත්තීය සමිති, බහුජන සංවිධාන හා දේශපාලන පක්‍ෂ එක්ව කොළඹදී ඊයේ [01] පැවති මාධ්‍ය හමුවකට එක්වෙමිනුයි.
“රනිල් වික්‍රමසිංහ ජනාධිපතිකම බාර ගත් ගමන් සාමකාමී අරගලකරුවන්ට එරෙහිව මිලේච්ජ ලෙස මර්දනය දියත් කළා. මැයි 9 වැනිදා මහින්ද රාජපක්‍ෂ ඉවත් වෙන වෙලාවේ අරගලකරුවන්ට පහර දීම හෙළා දැකලා වික්‍රමසිංහ මාධ්‍යයට ප්‍රකාශ දුන්නා. දැන් හදිසිය නිතිය පනවලා අරගලකරුවන්ට පහර දෙනවා, අත්අඩංගුවට ගන්නවා. මර්දනයෙන් පාලනය ගෙනියන්න හිතනවා නම් ඒක කවදාවත් හරි යන්නේ නැහැ.”
සර්ව පාක්ෂික ආණ්ඩුවක් පිහිටුවීමේ ජනාධිපතිවරයාගේ යෝජනාව ප්‍රසංශාවට ලක් කරමින් දෙමළ ජාතික සන්ධානයේ මාධ්‍ය ප්‍රකාශක දින කීපයකට පෙරාතුව වව්නියාවේදී පුවත්පත් වලට අදහස් දක්වා තිබිණි.
“සර්ව පාක්ෂික ආණ්ඩුවක් පිහිටුවීමට රනිල් වික්‍රමසිංහ විසින් යෝජනා කිරීම ගැන අපි ප්‍රශංසා කරනවා. ඒත් ශ්‍රීලංකා පොදුජන පෙරමුණ යටතේ මේ සර්ව පාක්ෂික ආණ්ඩුව තියෙනවා නම් ඉන් වැඩක් වෙන්නේ නැහැ.”
මේ අතර දෙමළ ජාතික සන්ධානයේ වන්නි දිස්ත්‍රික් පාර්ලිමේන්තු මන්ත්‍රී සිවඥානම් ශ්‍රීධරන් කිලිනොච්චි,රාමනාදන්පුරම් පැවති රැස්වීමකදී කියා සිටියේ දෙමළ ජනතාවගේ ප්‍රශ්නයට අදාලව ජනාධිපති කවුරුන් වුවද තම පක්‍ෂය සාකච්ජාවට සුදානම් බවයි.
“මහින්ද රාජපක්‍ෂ ජනාධිපතිවරයාත් එක්ක අපි 19 වතාවක් කතා කළා. ගෝඨාභය රාජපක්‍ෂ සමග එක් වතාවක් කතා කළා. ඒ වගේම රනිල් වික්‍රමසිංහ ජනාධිපතිවරයා එක්කත් අපි කතා කරනවා.”
එල්ටීටීය බෙදූ රනිල්
“දෙමළ ජන සංහාරයට සහාය පළ කරලා, අපේ නිදහස් අරගලය කුමන්ත්‍රණකාරී විදිහට බෙදා වෙන්කරපු කෙනා හැටියට රනිල් වික්‍රමසිංහ දන්නවා මේ ආර්ථික අර්බුදයට පිළියම් යොදන්න නම් දෙමළ ජාතික ප්‍රශ්නයට විසදුම් දෙන්න ඕනෑ කියලා.”
සාම සාකච්ඡා පවත්වන අතරවාරයේ එල්ටීටීඊ සංවිධානය බේද කොට නැගෙනහිර නායක කරුණා අම්මාන් රජයේ හමුදා සමග එක්ව සටන් කිරීමට කටයුතු කිරීම සම්බන්ධයෙන් රනිල් වික්‍රමසිංහ දෙමළ ජාතිකවාදීන්ගේ උදහසට ලක්වී සිටී.
දෙමළ ජාතික සන්ධානයේ නායක ආර්.සම්බන්ධන් විසින් ඉකුත් සතියෙදී දෙමළ මාධ්‍ය මගින් ප්‍රශ්න කර සිටියේ දෙමළ ජනයා වෙනුවෙන් ලබා දුන් පොරොන්දු කිසිවක් ඉටු නොකළ රාජපක්‍ෂලාගේ සහයෙන් පත්වූ ජනපති හා අගමැති විසදුම් ලබා දෙනු ඇති බවට විශ්වාස කළ හැකිද යන්නයි.
“තමන්ගේ ධූර කාලේදී දෙමළ ජනයාගේ ප්‍රශ්නයට දේශපාලන විසදුම් දෙනවා කියලා ජනාධිපති වික්‍රමසිංහ කියලා තියෙනවා. දෙමළ ජනයාගේ ප්‍රශ්න වලට විසදුම් ලබා ගන්න ජනාධිපතිවරයා කෙරෙහි ටී.එන්.ඒ. විශ්වාසයක් ඇති කරගන්න ඕනේ කියලා අගමැති දිනේෂ් ගුණවර්ධන කියනවා. ජනාධිපති සහ අගමැති දෙන්නාම මේ පුටුවලට ඇවිත් තියෙන්නේ ඉන්නේ, කවදාවත් දෙමළ මිනිස්සුන්ට වෙච්ච පොරොන්දු එකක් වත් ඉටු කළේ නැති රාජපක්‍ෂලාගේ උදව්වෙන්. ඉතිං මේ ජනාධිපති සහ අගමැති දෙමළ ජනතාවගේ ප්‍රශ්න වලට විසදුම් දෙයි කියලා අපි කොහොමද විශ්වාස කරන්නේ.”
දෙමළ මාධ්‍යවෙත අදහස් දක්වමින් දෙමළ ජාතික සන්ධාන නායකයා පවසන්නේ රාජපක්ෂලා මැතිවරණ සමයේදී සිංහල ජනතාවට ලබා දුන් පොරොන්දු කිසිවක් ඉටු කිරීමට සමත්වී නොමැති බවයි.
“රාජපක්ෂලා දුන් පොරොන්දු ඉටු කළේ නැති නිසි සිංහල ජනතාව ඔවුන්ව පළවා හරින්න විදී බැස්සේ. ජනතා උද්ඝෝෂණ නිසා රාජපක්ෂලාට ජනාධිපතිකම් අගමැතිකම් අත් හරින්න සිදු වුණා. අරගලකරුවන් නිසයි වික්‍රමසිංහ -ගුණවර්ධන ඔය තනතුරු වලට එන්න අවස්ථාව ලැබෙන්නේ.”
දශක ගණනාවක් පුරා දෙමළ ජනයා මුහුණ දෙමින් සිටින ගැටලුවලට දේශපාලන විසදුමක් ලබා දෙන්නට අගමැති හා ජනාධිපතිගේ ප්‍රකාශ යතාර්ථයක් බවට පත් කිරීමේ ශ්‍රීලංකා පොදුජන පෙරමුණේ සහයෝගය ලැබේවිද යන්න ගැටළුවක් බව සම්බන්ධන් පෙන්වා දෙයි.
“ජනාධිපති වික්‍රමසිංහ සහ අගමැති ගුණවර්ධන වැඩ කරන දිහා අපි නිරීක්ෂණය කරමින් ඉන්නේ. රටේ සුබ සිද්ධිය වෙනුවෙන්,ජනතාවට යහපතක් වෙන විදිහට ඒගොල්ලෝ වැඩ කරනවා නම් අපි ඔවුන්ට සහාය පළ කරනවා.”
Facebook Comments
