රාජපක්ෂ පාලන සමයේ සිදුවු පැහැරගැනීම් සහ ඝාතන සම්බන්ධයෙන් සැක පිට අත්අඩංගුවට ගෙන සිටින හමුදා සාමාජිකයින්ට ආරක්ෂක අමාත්‍යංශය විසින් වැටුප් සහ නීති ආධාර සපයන බවට ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය අනාවරණය කරයි.
ලසන්ත වික්‍රමතුංග ඝාතනය, කීත් නොයාර්ට සහ උපාලි තෙන්නකෝන්ට පහරදීම මෙන්ම ප්‍රගීත් එක්නැළිගොඩ අතුරුදහන් කිරීම සම්බන්ධයෙන් චෝදනා ලැබ සිටින ආරක්ෂක අංශ සමාජිකයන් වෙනුවෙන් නීති උපදෙස් සැපයීම සහ ඔවුන් වෙනුවෙන් අධිකරණය හමුවේ පෙනී සිටීම කරන්නේ එකම නීතිඥ කණ්ඩායමක් බව පෙන්වා දෙන එම සංවිධානය අපරාධ සම්බන්ධයෙන් චෝදනා ලබා රිමාන්ඩ් බන්ධනාගාරගත කර සිටින මෙන්ම පොලිස් අත් අඩංගුවට පත්ව සිටි ආරක්ෂක අංශ සමාජිකයන්ගේ මාසික වැටුප් පවා ආරක්ෂක අමාත්‍යාංශයේ නියෝගයන් මත නියමිත පරිදි ගෙවන බව හෙළිදරව් කර සිටි.
කිත්සිරි විජේසිංහ විසින් ජේඩිඑස් වෙබි අඩවියට ලියන ලද “බිම්ගෙයි වධබිම: ගන්සයිඩ් කඳවුරේ වැළලෙන නාවුක හමුදා අපරාධ” යන ලිපිය මඟින් මෙම කරුණු හෙළිදරව් කරන ලබන අතර නම සඳහන් කිරීමට නොකැමති වු අපරාධ පරීක්ෂණ දෙපාර්තුමේන්තු නිලධාරියෙකු විසින් මෙම තොරතුරු තහවුරු කළ බව එම ලිපියේ සඳහන් වේ.
දෙමළ ජාතික ශිෂ්‍යයන් ඇතුළු පුද්ගලයන් 11 දෙනකු පැහැරගෙන ගොස් අතුරුදහන් කිරීම සම්බන්ධයෙන් චෝදනා ලැබ සිටින නාවික හමුදාවේ බලලත් නිලධාරින් ඇතුළු නාවික සෙබළුන් අත්අඩංගුවට ගෙන රැඳවුම් නියෝග යටතේ රඳවා තබා ගැනීමෙන් වළකින ලෙස දේශපාලන බලධාරින් විසින් අපරාධ පරික්ෂණ දෙපාර්තමේන්තුව වෙත බලපෑම් කරමින් සිටින බැවින් එම පරික්ෂණ ඉදිරියට ගෙන යෑමේ බරපතල අර්බුදයකට රහස් පොලිසිය මුහුණ දී සිටි.
නාවික හමුදා නිලධාරීන් අධිකරණය හමුවට ගෙන ඒම ගැන ජනාධිපතිවරයා ප්‍රසිද්ධියේ තම “අප්‍රසාදය” පල කොට තිබුණි.
දස වසරක් තිස්සේ මෙම නඩුව අධිකරණය හමුවේ දිග් ගැස්සෙමින් ඇති අතර අපරාධ පරීක්ෂණ භාර නිලධාරීන්ට අනුව මෙසේ අතුරුදහන්වුවන් ජීවත්ව සිටින බැව් කියන්නට කිසිදු සාක්ෂියක් හමුවී නොමැති මුත් නාවික අපරාධකරුවන්ගේ අපරාධය සනාථ කිරිමට අවැසි ලිඛිත සහ වාචික සාක්ෂි ඇති තරම් ඔවුන් සතුව තිබේ.
සිදුකළ ඝාතන වසන් කොට යුක්තිය ප්‍රතික්‍ෂේප කිරීම සිදුකෙරෙන බව අවධාරණය කරන ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය සිදු වූ ඝාතන පිළිබඳ නිර්බාධිත පරික්‍ෂණවලට අවශ්‍ය පසුබිම සකස්කර දීම 2015 ජනවාරි බල මාරුව හරහා එම වෙනස ලංකාවට සිදු නොවීම රාජපක්ෂ ආණ්ඩුව හා යහපාලන ආණ්ඩුව අපරාධකාරී දෙබෑයන් සේ සැළකීමට හේතුවක් බව කියා සිටි.
Facebook Comments
