බැදුම්කර ගණුදෙනුවේදි වංචාවක් සිදුව ඇති දැයි සිදු කරන පරීක්ෂණයේ දී දුරකතන තොරතුරු හෙළිදරව් වීමෙන් මන්ත්‍රීවරුන්ගේ වරප්‍රසාද කඩවී දැයි සොයා බැලීමට එය පාර්ලිමේන්තු වරප්‍රසාද කමිටුව වෙත යොමු කරන බව කතානායක පාර්ලිමේන්තුවේදී ප්‍රකාශ කළේය.
කමිටුවේ මන්ත්‍රීවරුන් කීපදෙනෙකුගේ දුරකතන තොරතුරු හෙළිකිරීමෙන් මන්ත්‍රිවරුන්ගේ වරප්‍රසාද කඩ වූ බවට සභානායක අමාත්‍ය ලක්ෂ්මන් කිරිඇල්ල 20 සඳුදා සිදු කළ ප්‍රකාශයට පිළිතුරු ලබාදෙමින් කතානායකවරයා 21 අඟහරුවාදා මේ බව නිවේදනය කරන ලදී.
ඒ අනුව පක්ෂ නායක රැස්වීමක් කැඳවා මේ පිළිබඳව දීර්ඝ ලෙස සාකච්ඡා කරන බවද කතානායකවරයා පැවසී ය.
මේ අතර අගමැතිවරයාගේ රාජකාරි දුරකතනයේ තොරතුරු බාහිර පාර්ශ්වයන් වෙත පත්වීම නිසා රටේ ජාතික ආරක්ෂාවට එල්ල වන බලවත් තර්ජනය සැලකිල්ලට ගෙන ඒ පිළිබඳව පරීක්ෂා කළ යුතුව ඇතැයි ඇමතිවරු පිරිසක් රජයෙන් ඉල්ලීමක් කර ඇත.
රටේ අගමැතිවරයාගේ රාජකාරි දුරකතනයේ තොරතුරු වෙනත් පාර්ශ්වයක් විසින් පරික්ෂා කළේ කෙසේද යන්න සොයා බැලිය යුතු බවයි ඔවුන් පවසන්නේ.
නීතිපති දෙපාර්තමේන්තුවේ නියෝගයක් මත රහස් පොලිසිය අග්‍රාමාත්‍යවරයා ඇතුළු මැති ඇමතිවරුන්ගේ දුරකථන අංක පරීක්ෂා කළ බවට බැඳුම්කර ගණුදෙනු පිළිබඳ සොයා බැලීමට පත් කළ ජනාධිපති කොමිසමේදී අනාවරණය විය.
Facebook Comments
