ශ්‍රී ලංකාවේ ප්‍රධාන අපනයන බෝගයක් වන ගම්මිරිස් අපනයන නිෂ්කාශන ක්‍රියාවලිය පැය 48 කට පෙර සිදුකිරීම සඳහා පියවර ගන්නා බව කර්මාන්ත හා වාණිජ කටයුතු අමාත්‍යවරයා පවසයි.
දැනට ඒ සඳහා සතියක් දෙකක් පමණ ගතවන අතර එය අපනයනකරුවන්ට විශාල ගැටලුවක් බව අපනයනකරුවන් ඇමැති රිෂාඩ් බදියුදීන් හට පෙන්වා දීමෙන් අනතුරුව ඇමැතිවරයා ඒ පිළිබඳව අවධානය යොමු කර බව එම අමාත්‍යංශය කියා සිටි.
විශේෂයෙන්ම ගම්මිරිස්, කුරුඳු, කරාබුනැටි, කරඳමුංගු, සාදික්කා යන කුළුබඩු වර්ග රටේ ප්‍රධාන අපනයන බෝග වන අතර ඉන් ගම්මිරිස්වලට ප්‍රමුඛ ස්ථානයක් හිමි වේ.
2016 වසරේදී ශ්‍රී ලංකාවේ කුළුබඩු අපනයන වටිනාකම ඩොලර් මිලියන 264 ක් හෙවත් රුපියල් මිලියන 39,600 (රු. කෝටි 3,960) කි. ඉන් ගම්මිරිස් අපනයනයෙන් පමණක් ඩොලර් මිලියන 72 ක් හෙවත් රුපියල් මිලියන 10,800 (රු. කෝටි 1,080) ක් උපයා ඇති බව කර්මාන්ත හා වාණිජ කටයුතු අමාත්‍යාංශය සදහන් කරයි.
ශ්‍රී ලංකාව ගම්මිරිස් අපනයන ප්‍රමාණයෙන් සියයට 60 ක්ම අපනයනය කරන්නේ ඉන්දියාවට ය.ඉතිරි සියයට 40 යුරෝපයට හා ඇමරිකාවට අපනයනය කරන බව පවසන අමාත්‍යංශය 2017 වසරේ ඉන්දියාවට අපනයනය කර ඇති ගම්මිරිස් ප්‍රමාණය මෙට්‍රික්ටොන් 8,700 ක් බව පෙන්වා දෙයි.
“සිලෝන් ගම්මිරිස්“
“සිලෝන් ගම්මිරිස්“ කීර්ති නාමය තව තවත් ඉහළට නංවමින්, කුළුබඩු අපනයනකරුවන්ට සිය අමාත්‍යාංශය හා ආයතන හරහා සහාය ලබා දීමට පියවර ගන්නා බවට පසුගිය දා කුළුබඩු හා ඒ ආශ්‍රිත නිශ්පාදකයන්ගේ සහ ව්‍යාපාරිකයන්ගේ සංගමයේ සාමාජිකයන් සමඟ පැවති සාකච්ඡාවකදී ඇමැති රිෂාඩ් බදියුදීන් පොරොන්දු වී ඇත.
කුළුබඩු හා ඒ ආශ්‍රිත නිෂ්පාදන නිෂ්පාදකයන්ගේ හා ව්‍යාපාරිකයන්ගේ සංගමය කුළුබඩු අපනයනයේදී තමන්ට පවතින ගැටලු හා බාධක අමාත්‍යවරයා හමුවේ පැහැදිළි කර ඇති අතර එහිදී අමාත්‍ය රිෂාඩ් බදියුදීන් පවසා ඇත්තේ කුළුබඩු අපනයනයේ රජු ලෙස කීර්තියක් ඇතිකරගෙන සිටින ශ්‍රී ලංකාවේ කුළුබඩුවල කීර්තිනාමය වැඩි දියුණු කරමින් ඉහළටම ගෙන යාම සඳහා,කුළුබඩු අපනයනය ආශ්‍රිත නියමු ව්‍යාපෘතියක් ආරම්භ කරන බවයි.
Facebook Comments
