විධායක ජනාධිපති ධුරය අහෝසි කිරීමට ජනතා විමුක්ති පෙරමුණ සමඟ සාකච්ඡා නොකරන ලෙස විමල් වීරවංශ මන්ත්‍රීවරයා ප්‍රසිද්ධියේ කරන ලද ඉල්ලීම විපක්ෂ නායකවරයා ඉවත දමා තිබේ.
ඒ අනුව ජවිපෙ සහ මහින්ද රාජපක්ෂ අතර 20 වන ව්‍යවස්ථා සංශෝධනය සම්බන්ධ සාකච්ඡා 06 බදාදා ආරම්භ වීමට නියමිතව ඇත.
විධායක ජනාධිපති ධුරය අහෝසි කිරීමට යෝජිත 20 වන ව්‍යවස්ථා සංශෝධනයට ඒකාබද්ධ විපක්ෂය සහාය දීමට තීරණය කලහොත් ඉන් ඉවත් වන බවට ජාතික නිදහස් පෙරමුණු නායකයා විමල් වීරවංශ ප්‍රසිද්ධියේම අනතුරු අඟවා තිබුණි.
මහින්ද රාජපක්ෂ විපක්ෂ නායක ධරයට පත්වන විටත් විරෝධය පෑ ජනතා විමුක්ති පෙරමුණ 20 වන සංශෝධනය ගැන විපක්ෂ නායක සමඟ සාකච්ඡා කිරීමට සුදානම් බවට කරන ලද ප්‍රකාශයට ද විමල් වීරවංශ මන්ත්‍රීවරයා සිය විරෝධය පළ කළේය.
ජවිපෙ පාර්ලිමේන්තු මන්ත්‍රී සුනිල් හඳුන්නෙත්ති පවසන්නේ විධායක ජනාධිපති ක්‍රමය අහෝසි කිරීම සම්බන්ධයෙන් තම පක්ෂය ඉදිරිපත් කළ යෝජනා පිළිබඳව මහින්ද රාජපක්ෂ පසුගිය දිනවල සුබවාදී ප්‍රතිචාර දක්වා ඇති බවයි.
ජවිපෙ නායක පාර්ලිමේන්තු මන්ත්‍රී අනුර කුමාර දිසානායක, විජිත හේරත් විපක්ෂ නායකයා සමඟ සාකච්ඡාවට සහභාගී වන බවයි එම පක්ෂය පවසන්නේ.
විමල් වීරවංශ මන්ත්‍රීවරයාට අමතරව උදය ගම්මන්පිල හා වාසුදේව නානායක්කාර යන ඒකාබද්ධ විපක්ෂ මන්ත්‍රීවරුන්ද විධායක ජනපති ධුරය අහෝසි කිරීමට ප්‍රසිද්ධියේ විරෝධය දක්වා තිබේ.
Facebook Comments
