ආණ්ඩුවේ මැති ඇමතිවරු පසෙක සිටියදී 2013 වසරේ අග භාගයේ සිට සෑම බදාදා දිනකම එක මේසයකට වාඩිවන රාජපක්ෂවරු ආණ්ඩුවේ ප‍්‍රතිපත්ති, ආර්ථික කළමනාකරණය සහ ඉහළ තනතුරුවලට කෙරෙන පත්වීම් තීරණය කළ බව ජනාධිපතිවරයා හෙළි කර තිබේ.
“රාජපක්ෂ පවුලේ අය විතරක් එකට වාඩි වෙලා උදේට තේ බොන්නෙ හැම බදාදාම උදේට බ්‍රේක් ෆස්ට් එකට. අපි ඇමැති මණ්ඩලේ තියෙනවා. ආණ්ඩු පක්ෂේත් තියෙනවා සන්ධාන නායකයෝ ඉන්නවා. බදාදා උදේට රැ‍ස්වෙන රාජපක්ෂ පවුලේ අය තමයි ආණ්ඩුවේ ප‍්‍රතිපත්ති තීන්දු කළේ, ආණ්ඩුවේ ආර්ථික කරුණු පත්විම් තීන්දු කළේ.” යැයි ජනපති මෛත්‍රීපාල සිරිසේන කියා සිටියේය.
2015 ජනවාරී 08 වනදා පැවති රජය ජනතාවගෙන් ප‍්‍රතික්ෂේප වූයේ දූෂණය, වංචාව මෙන්ම පවුල්වාදය නිසා බව පවසන ජනාධිපති මෛත්‍රීපාල සිරිසේන යළිත් පවුල්වාදය සහ ඒකාධිපතිත්වය වැපිරීමට රට තුළ ඉඩක් නොමැති බව 30 අඟහරුවාදා කටුනායක ප‍්‍රදේශයේ පැවති ජනහමුවක් අමතමින් අවධාරණය කළේය.
ඉතිහාසයේ සිදුවූ විශාලතම මංකොල්ලය මහබැංකු බැඳුම්කර වංචාව බවට පෙන්වා දී ඇති ජනපති එයට සම්බන්ධ පසුගිය රජයේ කිසිවෙකුට හෝ වත්මන් රජයේ කිසිවෙකුට බේරිමට අවස්ථාවක් නොමැති බව මෙන්ම වංචාව, දූෂණය මෙන්ම පවුල්වාදය සහ ඒකාධිපතිත්වය රටින් තුරන් කර දැමීමේ ගමනට මේ රටේ ජනතාව දැන් පෙළගැසී අවසන් බවට විශ්වාස පළ කර තිබේ.
ජාතික දේශපාලන අරමුණක් හෝ රටේ අනාගතය පිළිබඳ දැක්මක්,ප‍්‍රතිපත්තියක් නොමැතිව පක්ෂයක් පිහිටුවාගෙන තනි පවුලක් විසින් නැවත ආණ්ඩුවක් සෑදීමට ගන්නා උත්සාහයට මේ රටේ ජනතාවගෙන් ඉඩක් නොලැබෙන බව ජනාධිපති මෛත්‍රීපාල සිරිසේන වැඩි දුරටත් පවසා ඇත.
Facebook Comments
