සියලූම සිරකරුවන්ට සමානව සැලකීමේ ප්‍රතිපත්තියට පයින් ගසා ආණ්ඩුවට හිතවත් සිරකරුවකු තෝරාගෙන විශේෂ වරප්‍රසාද ලබා දීම තුළ සෙසු සියලූ සිරකරුවන්ගේ මූලික අයිතිවාසිකම් උල්ලංඝනය වීම මෙන්ම නීතියේ ආධිපත්‍යට ද විශාල හානියක් සිදුවන බව සිරකරු අයිතිවාසිකම් වෙනුවෙන් පෙනී සිටින ප්‍රමුඛතම සංවිධානයක් පවසයි.
දේශපාලන හිතවත්කම් හා ධනය බලය පදනම් කරගනිමින් දුමින්ද සිල්වා නිදහස් කිරීමට විරෝධය දක්වන බව සිරකරු අයිතිවාසිකම් සුරැකීමේ කමිටුව පවසා ඇත්තේ තවත් සිරකරුවන් පිරිසක් සහන ඉල්ලා සිටිමින් විරෝධතාවක් දියත් කිරීමත් සමගය.
“සිරකරුවෙක් නිදහස් කිරිම සම්බන්ධයෙන් අප විරුද්ධ නොවුනත් එකී නිදහස් කිරිමට පදනම් වන්නේ පුද්ගලයෙකුගේ සිවිල් තත්වය, ධනය, බලය හෝ දේශපාලන හිතවත්කම අනුව නම් අප ඊට විරුද්ධ වෙමු.”
එම කමිටුව ඒ බව අවධාරණය කර ඇත්තේ “දුමින්ද සිල්වා නිදහස් කිරිම හා යුක්තියේ අපගමනය” මැයෙන් මාධ්‍ය නිවේදනයක් නිකුත් කරමිනි.
මිනීමැරීමට වරදකරු වී එල්ලුම් ගසට නියමවී සිටි හිටපු ආරක්ෂක අමාත්‍යංශ අධීක්ෂණ මන්ත්‍රී දුමින්ද සිල්වා, මහින්දාගමනය සිදුවූ පොසොන් පොහෝ දිනය නිමිත්තෙන් නිදහස් කර යැවූ ජනාධිපති ගෝඨාභය රාජපක්ෂ වෙත මේ වන විටත් දෙස් විදෙස් විරෝධයට මුහුණ පා සිටී.
සිය නිවේදනය මගින් සිරකරු අයිතිවාසිකම් සුරැකිමේ කමිටුවේ සභාපති නීතිඥ සේනක පෙරේරා සදහන් කර ඇත්තේ පසුගිය කාලය පුරාම ශ්‍රී ලංකාවේ ජනාධිපතිවරු ආණ්ඩුක්‍රම ව්‍යවස්ථාවේ 34 වගන්තිය අනුව තමන්ට ලැබුණු සමාව දීමේ බලය අවභාවිතා කළ ආකාරය දැක ඇති බවයි.
ඒ සදහා නිදසුන් කිහිපයක්ද ඔහු විසින් ඉදිරිපත් කර තිබේ.
“මරණ දඩුවම ලබා සිටි මිල්රෝයි ප්‍රනාන්දුගේ බිරිඳ, සමන් දේවාලයේ බස්නායක ඇන්ටන් තෙන්නකෝන්, රෝයල් පාර්ක් සිද්ධියේ ජූඩ් ජයමහ සහ මිරුසුවිල් සමුහ ඝාතන සිද්ධියේ සුනිල් රත්නායක යන අයවලූන්ට අයුක්ති සහගත ලෙස ගෙදර යන්න ලැබුනේ ජනාධිපතිගේ සමාව දීමේ බලමහිමය නිසාය.”
නීතිඥ සේනක පෙරේරා අවධාරණය කරන්නේ ජනාධිපතිගේ මෙම සමාවදීමේ බලය ආණ්ඩුක්‍රම ව්‍යවස්ථාවෙන් ඉවත් කළ යුතු බව හෝ යම්කිසි ස්වාධින අධිකාරියක සුපරික‍ෂණයට යටත් කළ යුතු බවට සමාජ සාකච්ඡාවක් පසුගිය සමයේ ආරම්භ කරනු ලැබුවේත් ජනාධිපතිවරයාගේ මෙම අයුක්ති සහගත ඒකාධිපති කටයුත්ත නැවැත්විය යුතු නිසා බවයි.
දුමින්ද සිල්වාගේ නඩු තීන්දුව ශ්‍රේෂ්ඨාධිකරණය විසින්ද තහවුරු වී ඇති පසුබිමක ඒ සියල්ල කුණු කූඩෙට දමා මෙසේ අයුක්ති සහගතව කටයුතු කිරිම තුල අධිකරණ නියෝග ඵල රහිත බවට විශාල ජනතා අවිශ්වාසයක් ඇති වීමද නොවැලැක්විය හැකි බව නීතිඥයා පෙන්වා දෙයි.
“නීතියේ ආධිපත්‍යය පවත්වාගෙන යාමේදී මෙසේ අධිකරණය අකර්මන්‍ය බාවයට පත් කරන්නේ නම් එය ඉතා භයානක තත්ත්වයකි.”
එසේම දුමින්ද සිල්වාට දඩුවම් දීම දේශපාලන පලිගැනීමක් ලෙසට අර්ථ දක්වා ජනතාව තුල වැරදි අදහසක් ඇති කිරිමට කවුරුන් හෝ උත්සාහ කරන්නේ නම් එය ප්‍රජාතන්ත්‍රවාදී භාවිතාවක් නොවන බවත් සිරකරු අයිතිවාසිකම් සුරැකීමේ කමිටුව අවධාරණය කරයි.
“ශ්‍රී ලංකාවේ ඉතිහාසය දෙස බැලීමේදී බලයට ආ පාලකයන් තමන්ගේ හිතවතුන්ට සහ ඥාතින්ට සංග්‍රහ කිරිමට, දේශපාලන පලිගැනීම, යන වචනයට මුවා වී හොඳහැටි කටයුතු කර ඇත.”
එබැවින් 25000 කට අධික සිරකරුවන් ප්‍රමාණයක් සිටින බන්ධනාගාර පද්ධතිය තුල සහන ලබාදීමේදී මෙසේ දුමින්දලා මනුෂ්‍යයෝ, යන ප්‍රතිපත්තිය වෙනුවට, සිරකරුවෝ මනුෂ්‍යයෝය, යන ප්‍රතිපත්තිය අනුව කටයුතු කිරිමේ අවශ්‍යතාවය සිරකරු අයිතිවාසිකම් සුරැකීමේ කමිටුව විසින් අවධාරණය කර තිබේ.
මිනීමැරීමට වරදකරු වූ දුමින්ද සිල්වා ජනපති අනින් නිදහස් කිරීම ශ්‍රී ලංකා නීතිඥ සංගමයේ මෙන්ම එක්සත් ජාතීන්ගේ සහ ඇමරිකා එක්සත් ජනපදයේ හෙලා දැකීමට ලක් වී තිබේ.
සිරකරු විරෝධතා
මරණ දඞුවම හිමිවු රැඳවියන් පිරිසක් දිවයිනේ බන්ධනාගාර දෙකක ආහාර වර්ජනයේ නිරත වී සිටින බව බන්ධනාගාර දෙපාර්තමේන්තුව සඳහන් කරයි.
තමන්ට ලබා දී ඇති මරණ දඞුවම ජීවිතාන්තය දක්වා වු සිරදඬුවමක් බවට පත් කරන ලෙස ඉල්ලමින් මෙම රැඳවියන් ආහාර වර්ජනයේ නිරත වී සිටී.
මරණ දඩුවම නියමව සිටි දුමින්ද සිල්වාට ජනාධිපති විශේෂ සමාවක් ලැබිමෙන් පසු මහර සහ වැලිකඩ බන්ධනාගාරවල රැඳවියන් පිරිසක් මෙලෙස ආහාර වර්ජනයක් ආරම්භ කර තිබේ.
වැලිකඩ බන්ධනාගාරයේ වහලය මතට ද නැග රැඳවියන් පිරිසක් විරෝධතාවයේ නිරත වී සිටින බව අගනගරයේ වාර්තාකරුවෝ පවසති.
Facebook Comments
