ජීවිත ආරක්ෂාව පතා ධුරයෙන් ඉල්ලා අස්වී රටින් පලා යෑමට සිදුවු මුලතිව් මහේස්ත්‍රාත්වරයාට යුක්තිය ඉටු කරන ලෙස බලකරමින් උතුරු නැගෙනහිර දෙපළාතේ හර්තාල් ව්‍යාපාරයක් දියත් කර තිබේ.
දෙමළ ජනයාට එරෙහිව සිදු වන රාජ්‍ය මර්දනයට විරෝධය දැක්වීමත් හර්තාලයේ අරමුණක් බව සංවිධායකයෝ පවසති.
දෙමළ දේශපාලන පක්‍ෂ හතක් මුල්වී ඔක්තෝබර් 20 කැඳවා තිබු හර්තාල් ව්‍යාපාරය හේතුවෙන් උතුරු නැගෙනහිර පළාත් වල දිස්ත්‍රික්ක රැසක කඩ සාප්පු, ගොවිපල හා කම්හල්, වල වැඩ නවතා දමා ජනතාව ආණ්ඩුවට එරෙහිව සිය විරෝධය දැක්වූ බව පළාත්බද වාර්තාකරුවෝ පවසති.
උතුරු පළාතේ මෙන්ම නැගෙනහිර පළාතේද ආණ්ඩුවේ කාර්යාල හා දෙපාර්තමේන්තු විවෘතව තිබුන ද ජනතාව හර්තාලයට සහාය දැක්වීම නිසා ඒවා ජන ශුන්‍ය ප්‍රදේශ බවට පත්ව ඇත.
මේ දින වල පාසල් වාර විභාග පැවැත්වෙන බැවින් දෙපළාතේම පාසල් වල විභාග කටයුතු සාමාන්‍ය පරිදි ක්‍රියාත්මක වී තිබේ. උතුරු පළාතේ ලංකා ගමනාගමන මණ්ඩලයේ බස් රථ ධාවනයේ යෙදුනද පුද්ගලික බස් රථ නොකෙරුන බවයි වාර්තාකරුවන් වැඩි දුරටත් පවසන්නේ. නැගෙනහිර පළාතේ ලංකා ගමනාගමන මණ්ඩලයේ බස් රථ මෙන්ම පුද්ගලික බස් රථ ද සාමාන්‍ය පරිදි ක්‍රියාත්මක වී තිබේ.
මුලතිව් හා මන්නාරම් දිස්ත්‍රික්කයන්හි නීතිඥයන් අද දිනයේ වැඩ වර්ජනයේ යෙදී හර්තාලයට සහාය පළ කර ඇති අතර මන්නාරම සහ යාපනයේ මුස්ලිම් ජනයාගේ සහායද හර්තාලයට ලැබුන බව වාර්තාකරුවෝ වැඩි දුරටත් පවසති.
ඉලංගෙයි තමිල් අරසු කච්චි, තමිල් ඊළාම් විමුක්ති සංවිධානය, දෙමළ ඊළාම් ජනතා විමුක්ති සංවිධානය, ඊලාම් ජනතා විප්ලවවාදී විමුක්ති පෙරමුණ, දෙමළ ජාතික පක්ෂය, දෙමළ ජනතා සංවිධානය සහ ප්‍රජාතන්ත්‍රවාදී සටන්කාමීන්ගේ පක්ෂය ඒකාබද්ධව දියත් කළ හර්තාල මගින් මුලික ලෙස ඉල්ලා සිටින්නේ හින්දුන් මෙන්ම බෞද්ධයන් ද අයිතිය කියා පාන කුරුන්තුර්මලේ පුරා විද්‍යා භුමියේ අධිකරණ නියෝග නොකතා කුරුන්දි විහාරය ඉදිකිරීම සම්බන්ධයෙන් වන නඩුව විභාග කළ මුලතිව් දිසා සහ මහේස්ත්‍රාත් විනිසුරු ටී. සරවණරාජාට රටින් පලා යාමට සිදුවු තර්ජන සම්බන්ධයෙන් නීතිය ක්‍රියාත්මක කරන ලෙසයි.
මහේස්ත්‍රාත් විනිසුරු ටී. සරවණරාජා අධිකරණ සේවා කොමිෂන් සභාවේ ලේකම් වෙත සිය ඉල්ලා අස්වීමේ ලිපිය යොමු කරමින් පසුගියදා දැනුම් දී තිබුනේ තමන්ට එල්ල වී ඇති ජීවිත තර්ජනය හේතුවෙන් අධිකරණ විනිසුරු තනතුරින් ඉල්ලා අස්වන බවයි.
මරණ තර්ජන ඇති බව දැනුම් දෙමින් රටින් පිටවූ මුලතිව් මහේස්ත්‍රාත් ටී සරවනරාජා විසින් සැප්තැම්බර් 23 දා බාරදෙන ලද ඉල්ලා අස්වීම අධිකරණ සේවා කොමිසන් සභාව විසින් පිළිගෙන නැතැයි අධිකරණ අමාත්‍ය විජේදාස රාජපක්ෂ ඔක්තෝබර් 18 වැනිදා පාර්ලිමේන්තුවට දැනුම් දී තිබුනි.
රාජ්‍ය අනුග්‍රහයෙන් උතුරු නැගෙනහිර සිදු කරමින් පවතින බෞද්ධකරණයට, රජයේ ආයතන විසින් බලහත්කාරයෙන් දෙමළ ජනයාගේ ඉඩම් අත්පත්කරගැනිමට හා හමුදාකරණයට විරෝධය පෑමත් මඩකලපුව, මයිලත්තමඩු, මාදවනෙයි දෙමළ කිරි ගොවීන්ගේ ඉඩම් වහා නිදහස් කරන ලෙස බලකිරීමත් මෙම හර්තාලයේ අරමුණු වන බව සංවිධායකයෝ වැඩි දුරටත් පවසති.
Facebook Comments
