ශ්‍රී ලංකා ආරක්ෂක හමුදා පාලනය යටතේ පැවති අධි ආරක්ෂක කලාපයක් තුලදී මරා දමා වසර විසි තුනක් ගතවීත් යුක්තිය නොලද දෙමළ මාධ්‍යවේදියකු උතුරු හා නැගෙනහිරදී සමරා තිබේ.
නිබය, සරල මාධ්‍යවේදියකු ලෙස නම් දැරූ වෙඩිල්ලෙන් නිහඬ කෙරුනු නිමලරාජන් මයිල්වාගනම් මලින්, පහනින් ඔක්තෝබර් 19 බ්‍රහස්පතින්දා සමරා ඇත්තේ යාපනය මාධ්‍ය සමාජය, මුලතිව් මාධ්‍ය සමාජය සහ මඩකලපුව මාධ්‍ය සමාජය විසිනි.
ශ්‍රී ලංකාවේ ඝාතනයට ලක් වු මාධ්‍යවේදීන් අනුස්මරණය උදෙසා මඩකලපුව ගාන්ධි උද්‍යානය ඉදිරිපිට ස්ථාපිත කර තිබෙන ස්මාරකය අසලදී නිමලරාජන් මයිල්වාගනම් මාධ්‍යවේදීයා අනුස්මරණය කිරීමට මඩකලපුව මාධ්‍ය සමාජය කටයුතු කර තිබේ.
යාපනය මාධ්‍ය සමාජයත්, මුලතිව් මාධ්‍ය සමාජයත් සිය කාර්යාල තුලදී නිමලරාජන් අනුස්මරණය කළ අතර මුලතිව් මාධ්‍ය සමාජයේ ප්‍රධානියා වන මාධ්‍යවේදී ෂන්මුගම් තවසීලන් සදහන් කළේ දෙමළ ජනතාවගේ අයිතීන් වෙනුවෙන් පෑන හසුරුවන මාධ්‍යවේදීන්ට සිදු වන හිරිහැර තවමත් නතර වී නැති බවයි.
“ශ්‍රී ලංකාවේ මාරුවෙන් මාරුවට බලයට පත් වූ ආණ්ඩු දෙමළ ජනතාවගේ අයිතීන් වෙනුවෙන් පෑනෙන් සටන් කළ අයව පාලනය කරලා තියනවා. ඒක දැනටත් පවතිනවා. මේ ආකාරයෙන් දෙමළ මාධ්‍යවේදීන් 40කට වැඩි පිරිසක් ඝාතනය කළත් ඔවුන්ට තවමත් යුක්තිය ඉටු කරලා නෑ. යුද්ධයෙන් පස්සේ ඝාතනය හෝ පැහැරගෙන ගොස් අතුරුදහන් කරවීම් සිදු නොවුනත් ජනතාවගේ හඩක් වන මාධ්‍යවේදීන් මර්දනය කිරීම අද දක්වාම නතර කරලා නැ.”
දකුණේ කිසිදු මාධ්‍ය සංවිධානයක් වැඩි වශයෙන්ම සිංහලෙන් උතුර වාර්තා කළ නිමලරාජන් සැමරූ බවක් දැනගන්නට නැත.
විනාශකාරී යුද්ධයත්, එයින් පීඩා විඳින උතුරේ දෙමළ ජනකායත් පිළිබඳව යුද පීඩිත භූමියේ සිට දෙස් විදෙස් මාධ්‍ය ඔස්සේ ලෝකයේ අවධානය යොමු කිරීමට මාධ්‍යවේදි නිමලරාජන් මයිල්වාගනම්ට හැකිවිය.
හරය, බීබීසී සහ වීරකේසරී ඇතුළු ආයතන වෙත දෙමළ සිංහල දෙබසින්ම වාර්තා සැපයීමේ නිරත නිමලරාජන් 2000 ඔක්තෝබර් 19 රාත්‍රියේ යාපනයේ සිය නිවසේදී වෙඩි තබා මරා දමන ලද්දේ යුද පීඩිත ජනයා පිළිබඳව වීරකේසරී පුවත්පතට ලිපියක් ලියමින් සිටියදීය.
හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පාලන සමයේ සිදුකළ එම ඝාතනය සම්බන්ධයෙන් අදත් යුක්තිය ඉටුවී නැත.
මයිල්වාගනම් නිමලරාජන්ට සිය නිවස තුලදී අත් බෝම්බ ගසා වෙඩිතබා ඝාතනය කිරීම සම්බන්ධයෙන් චෝදනා එල්ල වුනු රජය සමග එක්ව සිටි ඊපීඩීපී අතුරු හමුදා කල්ලි සාමාජිකයන් 2003 දී වව්නියාවේ අධිකරණය විසින් නිදහස් කර යවන ලදී.
එම ඝාතනය සම්බන්ධයෙන් සෘජුවම සැකකෙරෙන ඊපීඩීපී ප්‍රබලයකු වන නැපෝලියන් යනුවෙන් ප්‍රකට සෙබස්තියන් පිල්ලේ රමේෂ් පොලිස් ප්‍රශ්න කිරීමකින් තොරවම රටින් පලාගොස් බ්‍රිතාන්‍යයේ රැකවරණ ලබා සිටින බව වාර්තා විය.
ශ්‍රී ලංකාවේ සිදුවූ පැහැරගැනීම්, නඩු නැති ඝාතන, වධහිංසා සහ අතුරුදහන් කිරීම් ඇතුළු බරපතල මානව හිමිකම් උල්ලංඝන සම්බන්ධයෙන් රට තුල යුක්තිය ඉටුවන බවට කිසිදු විශ්වාසයක් නැති දෙමළ ජනතාව ඉල්ලා සිටින්නේ ජාත්‍යන්තර යුක්ති විනිශ්චයකි.
Facebook Comments
