ජනපති බලපෑමෙන් රාජපක්ෂ පාලනයේ අපරාධ අතුරුදහන් වන ලකුණු

0

රාජපක්ෂ පාලන සමයේ දකුණේ සිදුවු මිනිස් ඝාතන සහ අතුරුදහන් කිරිම් සම්බන්ධ නඩු ජනපතිගේ බලපෑම් මත අහක යනු ඇතැයි එම පරීක්ෂණ සිදු කරන නිලධාරීහු සැක පල කරති.

දෙමළ ජාතික සිසුන් ඇතුළු තරුණයන් 11 දෙනෙක් පැහැරගෙන ගොස් අතුරුදහන් කිරීම සම්බන්ධ පරික්ෂණ අතරතුර හමුවු අතුරුදහන් කිරීම් දෙකක් පිළිබඳ පරික්ෂණ කටයුතු ජනාධිපති මෛත්‍රිපාල සිරිසේන විසින් කරන ලද දැනුම් දීමක් හේතුවෙන් නවතා දමන ලද බව නම හෙළි නොකරන ලෙස ඉල්ලා සිටි ඉහල පෙළේ රහස් පොලිස් නිලධාරියකු සිලෝන් ජර්නල්ස් හා කියා සිටියේය.

2009 ජනවාරි මස 11වැනි දින පැහැර ගැනීමට ලක් වු කොටහේනේ වඩිවේල් පක්කිලිසාමි ලෝගනාදන් සහ බොරැල්ලේ රත්නසාමි පරමනාදන් සම්බන්ධ පරීක්ෂණ මෙසේ නවතා දමන්නට සිදුවී තිබේ.

අපරාධ පරික්ෂණ දෙපාර්තමේන්තුව (CID) විසින් 2016 දී අධිකරණයට දැනුම් දී ඇති පරිදි ඔවුන් දෙදෙනා පැහැරගෙන ගොස් අතුරුදහන් කර ඇති බවට සැක කෙරෙන්නේ නාවික හමුදා බුද්ධි අංශ කණ්ඩායමකි.

දෙමළ ජාතික සිසුන් 11 දෙනා පැහැර ගැනීමට සම්බන්ධ වාහනය සොය වැලිසර නාවික නෞකා ගැමුණු කඳවුරේ බුද්ධි නිලධාරින්ගේ නිවස්න පිහිටි ප්‍රදේශය 2016 පෙබරවාරි මාසයේදී පරික්ෂා කරන ලද අවස්ථාවේදී ලෝගනාදන් සහ පරමානන්දන්ගේ අතරුදහන් වු දින ගමන් කල වාහනය කොටස් 72 ක කැබලි කර තිබියදී රහස් පොලිසියට හමුවු බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය වාර්තා කර තිබුණි.

මෙම වාහනය සම්බන්ධයෙන් එවක නාවික හමුදාපතිව සිටි වසන්ත කරන්නාගොඩට සහ නාවීක හමුදාවේ හිටපු බුද්ධි අංශ ප්‍රධානි ආනන්ද ගුරුගේ හට දැනුම් දුන්නද ඔවුන් ඒ පිළිබඳව ක්‍රීයා මාර්ග නොගත් බව වැලිසර නාවික හමුදා කඳවුරේ ප්‍රධාන නිලධාරි කපිතාන් දේවේන්ද්‍ර රහස් පොලිසිය හට ප්‍රකාශයක් දී තිබේ.

ලෝගනාදන් සහ පරමානන්දන්ගේ බිරින්දැවරුන් සිය සැමියන් අතුරුදහන් වීම ගැන කොටහේන පොලිසියට කළ පැමිණිල්ලෙන් පලක් නොවු විට පොලිස්පතිට පැමිණිළි කර ඇති අතර ඒ අනුව කොළඹ අපරාධ පරික්ෂණ දෙපාර්තුමේන්තුව ආරම්භ කළ පරික්ෂණද 2010.11.15 දින නවතා දමා ඇති බව රහස් පොලිසිය හෙළි කර ගෙන ඇත.

කෙසේ වෙතත් එම වකවානුවේම පොලිස්පතිගේ මැදිහත් වීම මත රහස් පොලිසිය ආරම්භ කරන ලද පරික්ෂණ වාර්තාවට මෙතෙක් නීතිපති උපදෙස් ලැබී නැති බව ද නම සඳහන් නොකරන ලෙස ඉල්ලා සිටි රහස් පොලිස් නිලධාරියා සිලෝන් ජර්නල්ස් වෙත පැවසීය.

මාධ්‍යවේදී ඝාතන

රාජපක්ෂ පාලන සමයේ දකුණේ සිදු වු මාධ්‍යවේදීන් ඝාතන සහ අතුරුදහන් ඇතුළු අපරාධ සම්බන්ධයෙන් රහස් පොලිස් කණ්ඩායමක් විසින් පරික්ෂණ පවත්වන අතර ඔවුන් හෙළි කර ගෙන ඇත්තේ මෙම අපරාධ සිදු කර ඇත්තේ එකම හමුදා කණ්ඩායමක් විසින් බවයි.

කෙසේ වෙතත් එම පරික්ෂණ සියල්ලම අඩපණ කරන ලෙසට දේශපාලන බලපෑම් එල්ල වන බවට කී රහස් පොලිස් නිලධාරියා අපරාධ වලට සම්බන්ධ ඉහල පෙළේ නිලධාරින් ආරක්ෂා කිරිමට එය සිදු වන බවද කියා සිටියේය.

“ජනාධිපති කියලා තියෙන්නේ ඔය විදිහට හමුදාවේ අයව අල්ලන්න ගියොත් මම කොහොමද ඡන්ද කරන්නේ, මුං ඔක්කොම මට විරුද්ධව කැරලි ගහයි කියලයි,” යනුවෙන් ජේඩීඑස් හා දුරකතනයෙන් කතා කළ පොලිස් නිලධාරියා ද කියා තිබුණි.

ජනාධිපතිවරයාගේ මැදිහත් වීම මත ලෝගනාදන් සහ පරමානන්දන්ගේ පරික්ෂණ වසා දැමුවා සේම අනෙකුත් පරික්ෂණ ද වසා දමනු ඇති බවට විශ්වාසය පල කළ සිලෝන් ජර්නල්ස් සමග කතා කළ රහස් පොලිස් නිලධාරියා රාජපක්ෂ පාලන සමයේ ප්‍රබලයන් එම අපරාධ වලට සම්බන්ධ බවට ප්‍රමාණවත් සාක්ෂි මේ වන විටත් ලැබී ඇති බවද සඳහන් කළේය.

මේ අතර හිටපු ආරක්ෂක ලේකම් ගෝඨාභය රාජපක්ෂ ඇතුළු චූදිතයන්ට නඩු පවරන ලෙස නීතිපති දෙපාර්තමේන්තුව පොලිසියට උපදෙස් දී තිබුනත්, “අහක යන නඩු” නොදමන ලෙස තමන් නිර්දේශ කළ බව ජනාධිපති මෛත්‍රිපාල සිරිසේන පසුගිය සතියේ ජනමාධ්‍ය ආයතන ප්‍රධානීන්ට හෙළිකර තිබුනි.

“නීතිපති දෙපාර්තමේන්තුවෙන් ඔක්කොම ෆයිල් ආවා පොලිස්පති තුමාට නඩු පවරන්න. ඒ අතරේ හොඳ ජ්‍යෙෂ්ඨ නීතිඥයන් කිහිප දෙනෙක් බලලා, ඒ අයට නැවත බලන්න දෙන්න මේ නඩු ප්‍රතිපල දයකද අහක යනවද, මේවයේ මොනවද අඩුපාඩු තියෙන්නේ කියලා එහෙම නැතිනම් අහක යන නඩු නම් දාන්න එපා කියලා,” යි ජනපති මාධ්‍යවේදින් හා කියා තිබුණි.

Facebook Comments

wedding people