බෞද්ධ භික්ෂුවක් ඇතුළු සිංහල ප්‍රචණ්ඩ කණ්ඩායමකගෙන් නැගෙනහිරදී බහු-ආගමික කණ්ඩායමකට මරණ තර්ජන

මඩකලපුව දිස්ත්‍රික්කයේ දී ප්‍රචණ්ඩ සිංහල කණ්ඩායමක් විසින් 22 වන අඟහරුවාදා ගවපාලනයේ නියුතු ගොවීන්ට සහ බහු-ආගමික කණ්ඩායමකට මරණ තර්ජන කර ඇති අතර පැය තුනකට අධික කාලයක් ඔවුන්ව රඳවා තබාගත් බව දෙමළ ජාතික ජනතා පෙරමුණේ නායක සහ යාපනය දිස්ත්‍රික් පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම් ට්විටර් පනිවිඩියක් තබමින් සඳහන් කර තිබේ.

ඒ, යාබද දිස්ත්‍රික්කය වන පොලොන්නරුව දිස්ත්‍රික්කයේ සිංහල ජනතාව නීතිවිරෝධී ලෙස ඉඩම් අල්ලාගන්නා බවට වන චෝදනා පිලිබඳ සොයාබැලීමට මඩකලපුව දිස්ත්‍රික්කයේ දෙමළ ගම්මානයක් වන මයිලත්ත මඩු වෙත එම කණ්ඩායම ගිය අවස්ථාවේදී යි.

“150 කගෙන් පමණ යුතු කඩුගත් කණ්ඩායමක් බහු-ආගමික කණ්ඩායම වටකරගත්තා. පූජකයෙක්ට පහර කෑමට සිදුවුණු අතර, අනෙකුත් පිරිස පැය තුනකට අධික කාලයක් බලෙන් රඳවාගෙන සිටියා,” යැයි මන්ත්‍රීවරයා නිකුත් කළ ට්විටර් පනිවිඩයේ සදහන්ය.

මෙම සිදුවීම සිදු ව ඇත්තේ මයිලත්තමඩු පාලම සමීපයේ යුධ හමුදා මුරපොළ අසන්නයේදීය.

මන්ත්‍රීවරයා තවදුරටත් සඳහන් කළේ, ජනාධිපති ලේකම්ට මේ පිලිබඳ දැන්වූවත් රටේ පොලිස් ප්‍රධානියා වන පොලිස්පතිවරයා ඔහුගේ දුරකථන ඇමතුම්වලට ප්‍රතිචාරයක් නොදැක්වු බවයි.

“යුධ හමුදාපතිට සහ මහජන ආරක්ෂක ඇමතිවරයාට මේ පිලිබඳ සොයාබලන ලෙස දන්වා ඇති බව ජනාධිපති ලේකම් මට පැවසුවා,” ඔහු සිය ට්විටර් පනිවිඩයේ සදහන් කර තිබේ.

භයානක අවිආයුධ භාවිත කරමින් පහරදීම සහ තර්ජනය කිරීම හැරුණුකොට, බහු-ආගමික කණ්ඩායම එම ප්‍රදේශයට ගමන්ගත් වාහන දෙකේ යතුරුද සිංහල ප්‍රචණ්ඩ කණ්ඩායම ලබාගෙන ඇත.

කෙසේ නමුත්, බහු-ආගමික කණ්ඩායමේ සිටි පූජ්‍යපක්ෂයට අයත්වන සාමාජිකයන් තුන්දෙනෙකුගෙන් ප්‍රකාශ සටහන් කරගැනීමෙන් අනතුරුව එම වාහනවල යුතුරු ආපසු ලබාදී ඇත.

මෙම සිදුවීම පිලිබඳ ට්විටර් සටහන් ගණනාවක් පළකරමින් පහු පැවසුවේ “කරදියනාරු පොලිසියේ ස්ථානාධිපතිවරයා සහ තවත් නිලධාරීන් දෙදෙනෙකු අදාළ ස්ථානයට ගොස් ප්‍රචණ්ඩ කණ්ඩායම සමග කථාකළා. නමුත් ඔවුන් විසිර යන ලකුණක්වත් තිබුණේ නැහැ.” යනුවෙනි.

මෙම බහු-ආගමික කණ්ඩායම මඩකලපු බහු-ආගමික සංගමයේ කොටසක් වන අතර, ඊට කතෝලික පියතුමන් දෙදෙනෙක්, එක් හින්දු පූජකතුමෙක් සහ මුස්ලිම් මවුලවිතුමෙක් අතුලත් විය. මාධ්‍යවේදීන් දෙදෙනෙකුද මෙම කණ්ඩායමට ඇතුළත් ය.

කණ්ඩායමේ සාමාජිකයෙක් වූ පූජ්‍ය ජෙගදාස් පියතුමාට අනුව, එම කණ්ඩායම එහි ගොස් තිබුණේ ගවපාලනය කරන ගොවීන් මුහුණපාන ගැටළු සාකච්ඡා කිරීමට එම ගොවියන්ගෙන් ලැබුණු ආරාධනයක් මතයි.

“අපි නැවත පැමිණෙමින් සිටියදී එහි බලෙන් සහ නීතිවිරෝධී ලෙස පදිංචි වී සිටි සිංහල ජනයා සහ භික්ෂුවක් අපේ වාහන අවහිර කළා. භික්ෂූන් බලහත්කාරයෙන් අපේ යතුරු ගත්තා විතරක් නෙමෙයි, අප වාහන තුළම ගිනිතියන බව කියමින් අපට තර්ජනය කළා. අපි ඩයස්පෝරාවෙන් මුදල් ගන්නා බවත්, ඔවුන්ගේ නියෝග අනුව කටයුතු කරන බවත් ඔහු පරුෂ වචනයෙන් පැවසුවා.”

එම භික්ෂුව තමන් ඉදිරියෙන් සිටගෙන වීඩියෝ කළ බවත්, එම අවස්ථාවේදී (බහු-ආගමික) කණ්ඩායම එහි ගොස් තිබුනේ පිටරටින් ලැබුණු මුදල්වලින් ශ්‍රී ලංකාව තුළ ගැටළුකාරී තත්වයන් ඇතිකිරීමට සහ ඔවුන්ට පිටත්ව යාමට නොදී නැවැත්වූ බවට පැවසූ බවද ඔහු පැවසුවේය.

“ඉන්පසු, එම ප්‍රදේශයේ වෙසෙන සිංහල වැසියන්ද එතැනට එකතු වුණා, සියලුම ඡායාරූප සහ වීඩියෝ පට මකාදමන ලෙසත් ඔවුන් මාධ්‍යවේදීන්ට බල කළා. මෙම සිදුවීම පිලිබඳ කිසිවෙකුට දැනුම්දෙන්නේ හෝ ඒ පිළිබඳ කතා කරන්නේ නැතැයි සුදුපාට කඩදාසියකට අපේ අත්සන තැබීමට බලකළ අතර, පැය තුනකට අධික කාලයක් අපව රඳවාතබාගෙන තර්ජනය කළා. කරදියනාරු පොලිසිය පැමිණියේ අපව රඳවාතබා ගත්තාට පසුයි. පොලීසිය පැමිණියාට පසු භික්ෂුව පැවසුවේ අපි පාර්ලිමේන්තු මන්ත්‍රී ශානක්‍යයන්ගේ නියෝජිතයන් බවටත්, අප එහි ගොස් තිබුණේ එම මන්ත්‍රීවරයා වෙනුවෙන් තොරතුරු එකතු කිරීමට බවත්,” යනුවෙන් පැහැදිලි කරමින් පූජ්‍ය ජෙගදාස් තවදුරටත් පැවසුවේ භික්ෂුවගේ ප්‍රචණ්ඩ හැසිරීම ඉතා ඉහළ මට්ටමක තිබූ බවයි.

“හින්දු පූජකයාව කොණ්ඩයෙන් අල්ලාගෙන පහරදීමට සුදානම්වෙද්දීම කවුරුන් හෝ මැදිහත් වී එය නතර කළා. අපව රඳවා තබාගත්තේ ප්‍රාණ ඇපකරුවන් වගේ. මෙම ගැටලුව නිසි ලෙස විසඳනවා වෙනුවට, පොලිසිය කළේ ප්‍රචණ්ඩ කණ්ඩායම් පැවසූ දේ මත පදනම්ව කටයුතු කිරීමයි. මාධ්‍යවේදීන්ගේ කැමරා ලබාගත් අතර, සියලුම පටිගත කිරීම් විනාශ කළා.”

මහවැලි නදියේ වම් ඉවුරේ පිහිටා ඇති මයිලත්ත මඩු – මාදවනෙයි ප්‍රදේශයේ විශාල තණබිම් පිහිටා ඇති අතර, ගවයන්ට තණ කැවීම සඳහා දෙමළ ගම්වැසියන්ට අක්කර 100ක පමණ බිමක් වෙන්කොට දී ඇත. කෙසේනමුත්, අවට ප්‍රදේශවල සිංහල ජනතාව විසින් නීතිවිරෝධී ලෙස ජනපද පිහිටවීම සහ බලහත්කාරයෙන් ඉඩම් අල්ලාගැනීම වසර ගණනාවක් පුරා සිදුවී ඇත. මෙම කරුණ 2022 මාර්තු 7 වැනිදා නීතිපති දෙපාර්තමේන්තුව විසින් අභියාචනාධිකරණයේදී පිළිගෙන ඇත.

ගවයන්ට තණකැවීම සඳහා වෙන්කොට තිබූ අක්කර 100 ක් බඩඉරිඟු වගාකිරීම සඳහා පෞද්ගලික පාර්ශවවලට ලබාදීමට මහවැලි සංවර්ධන අධිකාරිය තීරණය කිරීමත් සමග දෙමළ ජාතික සංධානයේ පාර්ලිමේන්තු මන්ත්‍රීවරුන් වන ශානක්‍යයන් රාසමානික්‍යන් සහ ගෝවින්දන් කරුණාකාරම් විසින් රිට් පෙත්සමක් ඉදිරිපත් කරන ලදී.

මෙම නඩුවේදී පාර්ලිමේන්තු මන්ත්‍රී නීතීඥ එම්.ඒ. සුමන්තිරන් පැවසූවේ නීතිවිරෝධී නැවත පදිංචි කිරීම් සහ බලහත්කාරයෙන් සිදුවන ජනපදකරණය මෙම වෙන්කොට ඇති තණබිම්වල සිදුවන බවයි. අතිරේක සොලිසිටර් ජනරාල් පැවසූවේ නීතිවිරෝධී ලෙස නැවත පදිංචි කළ පිරිස් ඉවත් කිරීමට පියවර ගනිමින් ඇති බවයි.

ප්‍රදේශයේ ගවයන් ඇතිකරන ගොවීන් පවසන්නේ දියර කිරි ඇතුළු කිරි නිෂ්පාදන අලෙවිකිරීම සිය එකම ආදායම් මාර්ගය වන පසුබිමක, ඔවුන්ට වෙන්කොට ඇති තණබිම් බලහත්කාරයෙන් අල්ලාගැනීම තුළින් ඔවුන්ගේ ජීවිකාවට තර්ජනයක් එල්ල වී ඇති බවයි.

ඉහත කී කණ්ඩායමේ සිටි නිදහස් මාධ්‍යවේදියකු වන සෙල්වකුමාර් නිලන්තන් පවසන්නේ කිසිඳු අඩුවකින් තොරව මාධ්‍ය මර්ධනය සිදුවන අතර මාධ්‍ය කටයුතු වාර්තා කිරීමට යාමට තමන් බියක් දක්වන බවයි.

“මම දැඩි ලෙස කම්පනයට පත්වෙලා ඉන්නේ. මම ගත් වීඩියෝපට හෝ ඡායාරූප මැකුවේ නැත්නම් මා මරාදමන බවට කෙලින්ම කිව්වා. සිංහල මැරයන් හින්දු පූජකතුමාව කොණ්ඩයෙන් අල්ලාගත් විට මම කම්පනයට පත්වුණා. ඒක හරිම නින්දා සහගතයි, ඒ වගේම ඒ ක්‍රියාව ඔහුගේ සංස්කෘතියට සහ සම්ප්‍රදායන්වලට සෘජුව එල්ලවුණු ප්‍රහාරයක්. මේ සිදුවීම මට දැඩි මානසික බලපෑමක් ඇති කරලා තියෙනවා.”

ප්‍රදේශවාසීන් පවසන්නේ බහු-ආගමික කණ්ඩායමට පහරදුන් බෞද්ධ භික්ෂුව සහ ප්‍රචණ්ඩ කණ්ඩායම ළඟ ඇති අම්පාර දිස්ත්‍රික්කයේ අය වන අතර, එවැනි තර්ජන නිරන්තරයෙන් සිදුවන බවයි.

ගවයන් ඇතිකරන ගොවීන් පවසන්නේ මඩකලපුව දිස්ත්‍රික්කයේ ආර්ථිකය රඳාපවතින්නේ කිරි කර්මාන්තය මත බවයි.

මයිලත්තමඩු – මාදවනෙයි කිරි ගවයන් ඇතිකරන ගොවීන්ගේ සංගමයේ සභාපති සීනිතම්බි ත්‍යාගරාජාට අනුව, එවැනි ගොවීන් 2,000ක් පමණ ප්‍රදේශයේ ජීවත්වන අතර, ගවයන්ට තණ කැවීම සඳහා රජය විසින් ලබාදී ඇති අක්කර 100 මත ඔවුන්ගේ වෘත්තිය රඳා පවතී.

“දිස්ත්‍රික්කයේ ආර්ථිකය රඳාපවතින්නේ ගවයන් ආශ්‍රිත කෘෂිකර්මාන්තය මතයි. සිංහල ජනතාව අක්කර 10-15ක පමණ භුමි ප්‍රමාණයක් තබාගනිමින් ගවයන් කුසගින්නේ තබා අපට තර්ජනය කරනවා. ගවයන් ආහාරගන්නා තණබිම් සහ කැලෑ ප්‍රදේශ ගිනිතබද්දී මහවැලි සංවර්ධන අධිකාරිය නිහඬව සිටිනවා. වනජීවී නිලධාරීන් අපිට යකඩ කැබැල්ලක්වත් තබාගන්න දෙන්නේ නැති බව කියනවා, ඒ වගේම එහෙම කලොත් අත්අඩංගුවට ගන්නා බවත් කියනවා. නමුත් සිංහල ජනයා ආයුධ සන්නද්ධව ඇවිත් අපිට පහර දුන්නත් කිසිවෙක් අත්අඩංගුවට ගන්නේ නැහැ. මඩකලපුව සහ වාලච්චේන අධිකරණ ඇතුළු අධිකරණ ගණනාවක් මේ ප්‍රදේශයේ ගවයන් ඇතිකිරීමට අවසරදී තිබෙනවා. රජය විසින් වෙන්කොට ඇති බිම්වල ආහාරගන්න අපේ ගවයන්ව ගෙනයන්න බැරිනම්, අපි කොහේද යන්නේ ? අපි මොනවද කරන්නේ?”