බ්‍රැන්ඩික්ස් පොකුරින් ආරම්භ වු ශ්‍රී ලංකාවේ දෙවැනි වසංගත රැල්ලට රාජ්‍ය ආයතන සංකීර්ණයකින් තවත් කොවිඩ් පොකුරක් එකතු වීමේ අවදානම පිළිබඳ බියක් පලවී තිබේ.
සමෘද්ධි සංවර්ධන දෙපාර්තමේන්තුව හරහා තවත් කොවිඩ් -19 ආසාදිත “සමෘද්ධි පොකුරක්” රට තුල නිර්මාණය වීමේ අනතුර පෙන්වා දී ඇත්තේ සමෘද්ධි සංවර්ධන නිලධාරීන්ගේ සංගමය විසිනි.
සමෘද්ධි, ගෘහ ආර්ථික, ක්ෂුද්‍ර මුල්‍ය, ස්වයං රැකියා, සංවර්ධන හා ඌන උපයෝජන, රාජ්‍ය සම්පත් සංවර්ධන රාජ්‍ය අමාත්‍යාංශයේ ලේකම්වරයා වෙත ඔක්තෝබර් 30 සිකුරාදා ලිපියක් යොමු කරමින් එම සංගමයේ ප්රධාන ලේකම් ඉල්ලා ඇත්තේ එම අනතුර වලක්වා ගැනීමට පියවර ගන්නා ලෙසයි.
බත්තරමුල්ල සෙත්සිරිපාය 4 වන මහලේ පිහිටි සමෘද්ධි සංවර්ධන දෙපාර්තමේන්තුවෙහි ප්රධාන කාර්යාලයෙහි පාලන අංශයේ සේවය කරන ලද නිලධාරිනියකට වෛරසය ආසාදනය වී ඇති බවට ඔක්තෝබර් 28 දින තහවුරු වීමත් සමඟ එහි සේවය කරන සමස්ත කාර්යමණ්ඩලයම බරපතල සෞඛ්‍ය අවදානමකට ලක්ව ඇති බව සමෘද්ධි සංවර්ධන නිලධාරීන්ගේ සංගමයේ ප්රධාන ලේකම් චාමර මද්දුමකළුගේ පෙන්වා දෙයි.
එසේ තිබියදීත් සමස්ත කාර්යමණ්ඩලයම කඩිනමින් PCR පරීක්ෂණ සිදු කර වෛරසය ව්‍යාප්ත වීම පාලනය කිරීම උදෙසා කටයුතු කිරීමේ වැදගත් කමක් පවතින තත්වයක අදාල PCR පරීක්ෂණ සිදු කිරීමට පාලනාධිකාරිය මෙතෙක් කටයුතු කර නොමැති බවටත් වෘත්තිය සමිති නායකයා චෝදනා කරයි.
“වෛරසය ආසාධිත යැයි තහවුරු වී ඇති නිලධාරිනියගේ සිය ස්වාමියා මාළු වෙළඳසැලෙහි සේවය කරන බව දැනගෙන සිටියදීත් අදාල නිලධාරිනිය සමෘද්ධි සංවර්ධන දෙපාර්තමේන්තුවෙහි සේවයට යොදවා ගැනීම ආයතන ප‍්‍රධානීන් විසින් වගකීම් විරහිතව කටයුතු කර ඇති බව මනාව පෙන්නුම් කරයි.”
තවද බත්තරමුල්ල සෙත්සිරිපාය 4 මහලේ පොදු පහසුකම් හි පවතින ගැටළු මත 3 මහලේ පොදු පහසුකම් සේවකයන් වෙත පරිහරණය සඳහා සලසා ඇති බවත්, ගොඩනැගිල්ලෙහි ආයතන ගණනාවක සමස්ත සේවකයන් පොදු සෝපානය පරිහරණය කිරීම තුළ මෙහි අවධානම තවත් වැඩි වී ඇති බවත් සිය ලිපිය මගින් චාමර මද්දුමකළුගේ පෙන්වා දී තිබේ.
යුධහමුදාපති, ලූතිනන් ජනරාල් ශවේන්ද්‍ර සිල්වා වෙතත් පිටපත් යොමු කර තිබෙන එම ලිපිය මගින් ඔහු වැඩි දුරටත් ඉල්ලා ඇත්තේ වගකීම් විරහිත මෙවැනි ක‍්‍රියාදාමයන් තුලින් සේවකයන් විශාල ප‍්‍රමාණයක් හා ආයතන විශාල ප‍්‍රමාණයක් පිහිටි සෙත්සිරිපාය ආශ‍්‍රිත කරගනිමින් සමෘද්ධි පොකුරක් ව්‍යප්තවීමේ ඉඩකඩක් පවතින බැවින් විශේෂ අවධානය යොමු කර සමස්ත සේවකයන්ගේ සෞඛය ආරක්ෂාව තහවුරු කිරීමට පියවර ගන්නා ලෙසයි.
Facebook Comments
