කොරෝනා ඇඳිරියෙන් සිසු දරුවන්ගේ විභාග වලට බාධා (VIDEO)

0
Ivory Agency Sri Lanka
wedding people

පුර්ණ ඇදිරිනීති තත්වයක් යටතේ සති අන්තයේදී උසස් පෙළ විභාගය සදහා පෙනී සිටින බස්නාහිර පළාතේ සිසුන්ට අවශ්‍ය ප්‍රවාහන පහසුකම් සලසා නොමැති බවට දිවයිනේ ප්‍රමුඛතම ගුරු සංගමයක් අධ්‍යාපන බලධාරීන්ට චෝදනා කරයි.

” අපි දන්නවා දැන් අනිද්දා, සෙනසුරාදා දිනයේ විශේෂයෙන්ම උසස් පෙළ විභාගය පැවැත්වෙනවා. දැන් මේ විභාගයට ගණකාධිකරණය සහ අරාබි භාෂාව තමයි එදාට තියෙන්නේ. එතකොට විශාල ළමයි ප්‍රමාණයක් එදාට එනවා.ඒ වගේම කාර්ය මණ්ඩලයේ විශාල ප්‍රමාණයක් එනවා.අපිට තියන තොරතුරු වලට අනුව තවමත් මේ පැමිණෙන ළමයිට, කාර්ය මණ්ඩල වලට ප්‍රවාහන පහසුකම් කොහොමද වෙන්නේ කියලා අධ්‍යාපන අමාත්‍යාශයවත් විභාග දෙපාර්තමේන්තුවවත් ප්‍රකාශයට පත් කරලා නෑ.”

එවැනි තත්වයක් යටතේ විභාගයට පෙනී සිටිම සදහා‌ සිසුන් පැමිණෙන්නේ කෙසේදැයි ලංකා ගුරු සංගමය ප්‍රශ්න කළේ ඔක්තෝබර් 29 බ්‍රහස්පතින්දා කොළඹදීය.

මීට පෙර දින වලදී ඇදිරිනීතිය යටතේ කොළඹ දිස්ත්‍රික්කයේ විභාගය පැවැත්වෙන මොහොතේ සිසුන්ට අවශ්‍ය ප්‍රවාහන පහසුකම් සලසා ඇති බවට අධ්‍යාපන අමාත්‍යශය ප්‍රකාශ කර තිබුනද එවැනි කිසිදු පහසුකමක් සපයා නොතිබු බවයි ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසන්නේ.

එම හේතුවෙන් විභාගය සදහා පෙනී සිටින සිසුන්ගේ ප්‍රවාහන පහසුකම් සදහා විශාල වියදමක් දැරීමට ඔවුන්ගේ දෙමාපියන්ට සිදුව ඇති බව ජ්‍යෙෂ්ඨ වෘත්තිය සමිති නායකයා එහිදී සදහන් කළේය.

විභාගය සදහා පෙනී සිටින සිසුන්ට අවශ්‍ය ප්‍රවාහන පහසුකම් සලසා දීම සදහා අධ්‍යාපන අමාතාශය වහාම වැඩ පිළිවෙලක් සකස් කළ යුතු බව ඔහු එහිදී තව දුරටත් අවධාරණය කළේය.

ඔක්තෝබර් 29 බ්‍රහස්පතින්දා මධ්‍යම රාත්‍රියේ සිට ක්‍රියාත්මක වන පරිදි නොවැම්බර් 2 සදුදා උදෑසන 5 තෙක් බස්නාහිර පළාතට නිරෝධායන ඇදිරිනීතිය ක්‍රියාත්මක කරන බව යුද හමුදාපති ලුතිනන් ජනරාල් ශවේන්ද්‍ර සිල්වා නිවේදනය කර තිබේ.

බස්නාහිර පළාතට නිරෝධායන ඇඳිරි නීතිය පැනවීම හේතුවෙන් දුම්රිය ධාවන කාලසටහන් ද සංශෝධනය කර තිබෙන අතර නිවේදනයක් නිකුත් කරමින් දුම්රිය දෙපාර්තමේන්තුව සඳහන් කළේ, ඒ අනුව රඹුක්කන සිට කොළඹ කොටුව දක්වාත් බෙලිඅත්ත, ගාල්ල, අලුත්ගම හා කළුතර සිට මරදාන දක්වාත් අවිස්සාවේල්ල සිට කොළඹ කොටුව දක්වාත් හලාවත සිට කොළඹ කොටුව දක්වාත් කිසිදු දුම්රියක් හෙට සිට ලබන 01 වැනි දා දක්වා ධාවනය නොවන බවයි.

කෙසේ වෙතත් අනිද්දා දිනයේ උසස් පෙළ විභාගයට පෙනී සිටින දරුවන් වෙනුවෙන් ධාවනය වන දුම්රියන් නියමිත වේලාවන්වලදී ධාවනය කිරීමට නියමිත බව දුම්රිය දොපාර්තමේන්තුව නිකුත් කළ නිවේදනයේ වැඩිදුරටත්ය.

Facebook Comments