“ජාතික ප්‍රශ්නය” ගැන සංහිඳියා ඇමැතිගෙන් පැහැදිලි කිරීමක්

0

ශ්‍රී ලංකාවේ පවතින ජාතික ප්‍රශ්නය භාෂා අතර වෙනස්කම් පිළිබඳ ගැටළුවක් ලෙස හඳුන්වා දීම වැරදි මතයක් බව සංහිඳියාව සම්බන්ධ රජයේ අමාත්‍යවරයෙකු පෙන්වා දෙයි.

ජාතික ප්‍රශ්නය විසඳීමට ඇත්තේ දේශපාලන බලය බෙදීම තුල බව මන්ත්‍රා ලයිෆ් සහ ජාතික සංහිඳියාව සඳහා වන තරුණ සමුළුව විසින් ඇතුල්කෝට්ටේ පවත්වන ලද සර්වාගමික සාකච්ඡා සභාව අමතා ජාතික සහජීවනය, සංවාද හා රාජ්‍ය භාෂා අමාත්‍ය මනෝ ගනේෂන් අවධාරණය කළේය.

“ජාතික ප්‍රශ්නයේ ප්‍රධාන අංගය භාෂාව නොවේ. වාර්ගික ප්‍රශ්නය විසඳීමට පිවිසුමක් ලෙස භාෂා ප්‍රශ්නය විසඳමු. වාර්ගික ප්‍රශ්නය විසඳීමට අපට නිසියාකාර දේශපාලන බලය බෙදීමක් අවශ්‍යයි. අපි ඒ ප්‍රශ්නය සාකච්ඡා නොකර පැනලා යනවා.” යි අමාත්‍යවරයා කියා සිටියේය.

ජාතික ප්‍රශ්නය විසඳීම සඳහා බලය බෙදීම සඳහා ඇති කාලය ඉක්ම යන බවට ජාතික සහජීවනය, සංවාද හා රාජ්‍ය භාෂා අමාත්‍ය මනෝ ගනේෂන් අනතුරු ඇඟවීය.

රට තුල බහු විවිධත්වය පිළි නොගතහොත් සමගිය හා සමානාත්මතාව ඇති නොවන බව පෙන්වා දෙන ඇමැතිවරයා එසේ වුවහොත් රට ඉදිරියට නොවන බවයි අවධාරණය කරන්නේ.

ප්‍රභූ පැලැන්තිය

ශ්‍රී ලංකාවේ මෙතෙක් පැවති සියලුම ආණ්ඩු තුල වාඩිලාගෙන ඉන්නා කොළඹ පදනම් කරගත් ප්‍රභූ පැලැන්තිය ජනතාවට කිසිදු බලයක් අත්වීම වලක්වන බවට චෝදනා කළ අමාත්‍ය මනෝ ගනේෂන් “රතු වේවා, කොළ වේවා නිල් වේවා හැම ආණ්ඩුවක්ම අරක්ගත් කොළඹ පෙලැන්තියක් ඉන්නවා,” යි චෝදනා කළේය.

බලය බෙදීම යනු සිංහල බලය දෙමළ අයට යාම හෝ දෙමළ අයගේ බලය මුස්ලිම් ප්‍රජාව වෙත හුවමාරු වීම නොවන බව අවධාරණය කළ ඇමැතිවරයා කොළඹ සංකේන්ද්‍රණය වී තිබෙන බලය දිස්ත්‍රික්ක වලට, පළාත් වලට යා යුතු යැයි වැඩි දුරටත් කියා සිටියේය.

Facebook Comments

wedding people