එක්සත් ජාතික පක්ෂය හා එක්සත් ජාතික පෙරමුණ එක්ව ගොඩනගන නව සන්ධානය ශක්තිමත් කර, දිනූ ප්‍රජාතන්ත්‍රවාදී අයිතීන් ආරක්ෂා කරගැනීමට සියලු දෙනා එක්විය යුතු බව අග්‍රාමාත්‍යවරයා ප්‍රකාශ කර තිබේ.
“අපි ආරම්භ කරන්න යන නව ජාතික ප්‍රජාතන්ත්‍රවාදි සන්ධානයටත් එකතු වෙන්න, එකතු වෙලා මේ ආරක්ෂා කර ගත්ත නිදහස, ඔබට ලැබෙන ආර්ථික දියුණුව ආරක්ෂා කරන්න, මේ රටේ සංහිඳියාව ආරක්ෂා කරන්න, නිදහසේ ජිවත් වෙන අයිතිය ආරක්ෂා කර ගන්න අන්න ඒ වැඩ කටයුතු අපි ඉදිරියට ගෙන යන්න තියෙනවා.” යි අගමැති රනිල් වික්‍රමසිංහ පැවසීය.
සිරිකොත ගමට- එක්සත් ජාතික පක්ෂ සාමාජිකත්ව ප්‍රවර්ධන සහ දැනුවත් කිරීමේ වැඩසටහනේ සමාරම්භක උත්සවයට 10 ඉරිදා එක්වෙමින් අගමැතිවරයා මේ බව කියා සිටියේය.
රට තුල නිදහස හා සංහිඳියාව ආරක්ෂා කර ඇති බව කී අගමැතිවරයා රාජපක්ෂ පාලන සමයේ මෙන් රට තුල ජාතිවාදී ආගම්වාදී බෙදීම් නැති බව ද සඳහන් කළේය.
එක්සත් ජාතික පක්ෂයේ උප නායක අමාත්‍ය රවී කරුණානායක, පක්ෂ සභාපති අමාත්‍ය කබීර් හෂීම්, මහලේකම් අමාත්‍ය අකිල විරාජ් කාරියවසම්, ජාතික සංවිධායක නවීන් දිසානායක ඇතුළු පක්ෂයේ නියෝජිතයින් රැසක් මෙම අවස්ථාවට එක්ව සිටියෝය.
Facebook Comments
