දිවයිනට බලපා ඇති අයහපත් කාලගුණයෙන් සිදු වු ස්වාභාවික විපත් වලින් අතුරුදහන්වුවන් සෙවීමට රජය ප්‍රමුඛ ත්‍රිවිධ හමුදාව මැදිහත් වුවද යුද සමයේ බලහත්කාරයෙන් අතුරුදහන් කරවුවන් සොය දීමට රජය මැලි කමක් දක්වන බවට අතුරුදහන්වුවන්ගේ ඥාතීහු චෝදනා කරති.
යුද සමයේ අතුරුදහන් වුවන්ගේ නෑසියන් හා මව්වරුන් වසර ගණනාවක සිට පාරවල් පුරා තම ආදරණීයන් සොයමින් සිටින නමුත් රජය හෝ ත්‍රිවිධ හමුදාවට ඒ දුක නොදැනුන බවට තම අතුරුදහන් සැමියා සොයන සන්ධ්‍යා එක්නැළිගොඩ පැවසීය.
ඔවුන් සොයා දීමට මැදිහත් නොවන්නේ එම අතුරුදහන් කරවීම් වලට හමුදා සාමාජිකයින් සම්බන්ධ නිසා දැයි ඇය ප්‍රශ්න කර සිටියේ කිළිනොච්චියේ පැවති විරෝධතාවයකදීය.
තම අතුරුදහන්වුවන් සොයා දෙන ලෙස උතුරේ අතුරුදහන්වුවන්ගේ මාව්පියන් සහ නෑසියන් පෙබරවාරි 20 සිට කිළිනොච්චියේ සත්‍යග්‍රහයක් ඇරඹු අතර එයට දින 100 පිරීම නිමිත්තෙන් අතුරුදහන් වුවන්ට යුක්තිය ඉෂ්ඨ කරන ලෙස ඉල්ලා අද (30) විරෝධතාවයක් පැවැත්වෙන ලදී.
වත්මන් යහපාලන රජය පත්වුයේ අතුරුදහන්වුවන් සොය දෙන බවට පොරොන්දු වෙමින් බව සිහිපත් කල සන්ධ්‍යා එක්නැළිගොඩ ස්වාභාවික විපත් වලින් දැනෙන දුක අතුරුදහන්වුවන් වෙනුවෙන් දැනෙන්නේ නැති දැයි ජනාධිපතිවරයාගෙන් ප්‍රශ්න කළේය.
දකුණේ විපතට වුවන් සිහිපත් කරමින්
උතුරේ මෙන්ම දකුණේ අතුරුදහන්වුවන්ගේ නෑසියන් මෙම විරෝධතාවයට එක් වු අතර විරෝධතාවය ආරම්භයට පෙර දකුණේ සිදු වු ස්වාභවික ව්‍යසනයෙන් විපතට පත් වුවන් සිහිකර සර්ව ආගමික වතාවත් සිදු කර පහන් දල්වා තිබේ.
මහජන පීඩාව සිදු නොවන අයුරින් සිය විරෝධතාව දක්වන ලෙසට කිළනොච්චි අධිකරණයෙන් නියෝග කර තිබු අතර එම නියෝග කඩ කරමින් පාර අවහිර කල විරෝධතාකරුවන් ජනාධිපතිවරයා හමු වීමට අවශ්‍ය බව අවධාරණය කළේය.
විරෝධතාවය පැවති ස්ථානයට පැමිණි කිළිනොච්චියේ සහකාර දිස්ත්‍රීක් ලේකම්වරයා වෙත විරෝධතාකරුවන් සන්දේශයක් බාර දුන් අතර ලේකම්වරයා ජනාධිපතිවරයා සම්බන්ධ කර ගැනීමට දැරු උත්සාහය ව්‍යාර්ථ විය.
අගමැතිවරයා හමුවීමට අගමැති කාර්යාලයෙන් ලබන ජුනි මස 07 වන දින ලබා දීමට කටයුතු කලද විරෝධතාකරුවන් එය ප්‍රතික්ෂේප කරමින් කියා සිටියේ “අතුරුදහන්වුවන් මිය යන්නට ඇති” බවට අගමැති රනිල් වික්‍රසිංහ පාර්ලිමේන්තුවේ කල ප්‍රකාශය හේතුවෙන් අගමැතිවරයා විශ්වාස කල නොහැකි බව පවසමිනි.
උතුරේ ආණ්ඩුකාරවරයාගේ ලේකම් එස්.ඉලංගකොන් ජනාධිපතිවරයා හමුවීමට සති දෙකක් තුළ අවස්ථාව ලබා දෙන බවට දුන් ලිඛිත පොරොන්දු මත විරෝධතාකරුවන් විසිර ගොස් තිබේ.
Facebook Comments
