දැනට ගැසට් කර ඇති විසිවැනි ව්‍යවස්ථා සංශෝධනය වෙනස් කර නව ගැසට් පත්‍රයක් නිකුත් කරන බවට ආණ්ඩුපාක්ෂික ඇමැතිවරයෙකු ප්‍රකාශ කර තිබේ.
ගැසට් කර ඇති කෙටුම්පතේ ඇති ඇතැම් ගැටලු සම්බන්ධව තමාද ඇතුළුව පක්ෂ නායකයන් කිහිප දෙනකුම අගමැතිවරයාගේ අවධානය යොමු කළ බව පවසන අමාත්‍ය විමල් වීරවංශ ඒ අනුව අගමැතිවරයා විසින් කමිටුවක් පත් කළ බවයි පවසන්නේ.
එම කමිටුවේ නිර්දේශ ලැබෙන තුරු දැනට නිකුත් කර ඇති ගැසට්ටුව පාර්ලිමේන්තුවට ඉදිරිපත් නොකිරීමට තීරණය කර ඇති අතර කමිටුවේ නිර්දේශ සලකා බලා නව ගැසට්ටුවක් 20 වැනි සංශෝධනය ලෙස ඉදිරිපත් කර එය පාර්ලිමේන්තුවෙන් අනුමත කර ගන්නා බවයි අමාත්‍යවරයා මාධ්‍ය වෙත පවසා ඇත්තේ.
දැනට ඉදිරිපත් කර ඇති ගැසට්ටුවේ ඇතැම් කාරණා සම්බන්ධයෙන් ආණ්ඩු පක්ෂයේ මන්ත්‍රීවරුන් යම් කනස්සල්ලක් පළ කර ඇතැයි ද ඒවා නිරවුල් වූ පසු 20 වැනි සංශෝධනයට තුනෙන් දෙකේ ඡන්දය ලබා ගත හැකි බවටයි විමල් වීරවංශ ඇමැතිවරයා විශ්වාසය පළ කරන්නේ.
අගමැතිවරයා විසින් පත් කරන ලද කමිටුව 15 අගහරුවාදා රැස්වී 20 වැනි ව්‍යවස්ථා සංශෝධනය සම්බන්ධව සමාලෝචන කටයුතු ආරම්භ කිරීමට නියමිතව ඇත.
අමාත්‍ය මහාචාර්ය ජී.එල්.පීරිස් ගේ සභාපතීත්වයෙන් යුත් කමිටුවේ සාමාජිකයන් ලෙස අමාත්‍යවරුන් වන උදය ගම්මන්පිල, අලි සබ්රි, නිමල් සිරිපාල ද සිල්වා, විමල් වීරවංශ සහ රාජ්‍ය අමාත්‍යවරුන් වන සුසිල් ප්‍රේමජයන්ත, එස්.විලේන්ද්‍රන් මෙන්ම පාර්ලිමේන්තු මන්ත්‍රීවරුන් වන ඩිලාන් පෙරේරා, ප්‍රේමනාත් සී.දොලවත්ත යන අයවලුන් පත් කර තිබේ.
Facebook Comments
