ගැබිණි අම්මලාට කොරෝනා වසංගතයෙන් “සිදුවන හානිය අඩුයි”

ලොවම සලිත කර තිබෙන කොරෝනා වෛරස වසංගත රෝගී තත්ත්වයෙන් ගැබ්බර මව්වරුන්ට සිදුව වන හානිය අවම බව ජාත්‍යන්තර පර්යේෂණයකින් හෙළිව තිබේ.

කොවිඩ් 19 හෙවත් කොරෝනා වෛරසය ආසාදනය වු ගර්භණී මවුවරුන් පිළිබඳ කරන ලද විශේලේෂණයකින් මේ බව අනාවරණය වු බවට ඇමරිකාවේ ව්‍යධිවේදින්ගේ සංගමයේ ව්‍යාධිවේද සහ රසායනාගාර විද්‍යා සංරක්ෂිත සඟරාවේ පසුගිය සතියේ නිකුත් කරන ලද නවතම කලාපයේ පළ කර ඇත.

චීනයේ පුද්ගලයින් 81,000 පමණ කොරෝනා රෝගය වැළඳුන ද වෛරසය අසාදනය වු ගැබ්බර මව්වරුන් ප්‍රමාණය 200 කට අඩු බව එම සඟරාවේ සඳහන් කර ඇති බව ප්‍රජා වෛද්‍ය විශේෂඥ කපිල ජයරත්න කියා ඇතැයි සෞඛ්‍ය අමාත්‍යාංශය මාධ්‍ය නිවේදනයක් නිකුත් කරමින් පවසයි.

වෛරසයට ගොදුරු වු මව්වරුන් 38 දෙනෙකු මෙම විශ්ලේෂණයට යොදා ගෙන ඇති අතර ඉන් කිසිවෙකු අසාධ්‍ය තත්ත්වය පත්ව නොමැති ඇති අතර දරුණු නියුමෝනියාව වැළඳී නැත.

කිසිදු ගර්භණී කාන්තාවක් මිය ගොස් නැති අතර මවගෙන් දරුවාට රෝගය සම්ප්‍රේෂණය වී නොමැති බවට ද මෙම විශේලේෂණයේ දී හඳුනාගෙන ඇති බවයි වෛද්‍යවරයා සඳහන් කරන්නේ.

මීට අමතරව ලෝක සෞඛ්‍ය සංවිධානයේ විද්වතුන් පිරිසක් විසින් චීනය තුලද වෛරසය ආසාදනය වු මව්වරුන් 147 දෙනෙකු යොදා ගනිමින් තවත් පර්යේෂණයක දී අනවරණය වී ඇත්තේ කොවිඩ් 19 අසාදනය ගැබිනි මව්වරුන්ට දරුණු රෝගී අවදානමක් ඇති නොකරන බවයි.

මෙම අධ්‍යයනයට රෝගය වැළඳී ඇති බව තහවුරු වු මව්වරුන් 64 දෙනෙකු සහ වෛරසය ආසාදිත බවට සැක ගැබ්බර අම්මාවරු 82 ක් යොදා ගෙන තිබේ.

ඔවුන්ගෙන් රෝගී තත්ත්වය උත්සන්න වී ඇත්තේ 8% පිරිසකට පමණි.

කෙසේ වෙතත් ගර්භණි කාන්තාවන් මෙම කාලයේදී අනෙකුත් පුද්ගලයින්ට වඩා ආරක්ෂාකාරී විය යුතු බව පෙන්වා දෙන ප්‍රජා වෛද්‍ය විශේෂඥ කපිල ජයරත්න ඔවුන් හැකිතාක් නිවසට වී සිටිය යුතු බවටයි උපදෙස් ලබා දෙන්නේ.

උණ හෝ ඒ සමග සෙම්ප්‍රතික්ෂ්‍යාව, කැස්ස හා උගුරේ වේදනාව ආදී රෝග ලක්ෂණ මතුවුහොත් වහාම රජයේ රෝහලක් වෙත යොමු වන ලෙස ඉල්ලා සිටින වෛද්‍යවරයා පවුල් සෞඛ්‍ය නිලධාරිනිය හට තමන්ගේ ගැටළු හා රෝගී තත්ත්ව නිරන්තරයෙන් දැනුම් දෙන ලෙසට වැඩි දුරටත් ඉල්ලා සිටී.