දිවයිනේ ප්‍රදේශ කිහිපයකට බලපා ඇති ගංවතුර හා නායයම් හේතුවෙන් පවුල් 163, 701කට අයත් පුද්ගලයන් 629,742 ක් පීඩාවට පත්ව ඇති මොහොතක ජනාධිපතිවරයා සිය අමාත්‍ය මණ්ඩලය නැවත වරක් සංශෝධනය කර තිබේ.
ඒ අනුව රාජ්‍ය අමාත්‍යවරුන් සිව් දෙනෙකු සහ නියෝජ්‍ය අමාත්‍යවරුන් තිදෙනෙකු අද (31) ජනාධිපති මෛත්‍රීපාල සිරිසේන ඉදිරියේ දිවුරුම් දුන්හ.
විදේශ කටයුතු නියෝජ්‍ය අමාත්‍යවරයා ලෙස කටයුතු කළ ආචාර්ය හර්ෂ ද සිල්වා ජාතික ප්‍රතිපත්ති හා ආර්ථික කටයුතු නියෝජ්‍ය අමාත්‍යවරයා ලෙස ද පාර්ලිමේන්තු කටයුතු හා ජනමාධ්‍ය නියෝජ්‍ය අමාත්‍ය ධුරයේ කටයුතු කළ කරුණාරත්න පරණවිතාන නිපුණතා සංවර්ධන හා වෘත්තීය පුහුණු නියෝජ්‍ය අමාත්‍ය ධුරයේත් දිවුරුම් දී ඇත.
රාජ්‍ය ව්‍යවසාය සංවර්ධන නියෝජ්‍ය අමාත්‍යවරයා ලෙස කටයුතු කළ ඉරාන් වික්‍රමරත්න , මුදල් රාජ්‍ය අමාත්‍යවරයා ලෙස දිවුරුම් දී තිබේ.
රාජ්‍ය අමාත්‍ය ධූරයේ මීට පෙර කටයුතු කළ ලක්ෂ්මන් යාපා රාජ්‍ය ව්‍යවසාය සංවර්ධන රාජ්‍ය අමාත්‍යවරයා ලෙස දිවුරුම් දී ඇති බව ජනාධිපති මාධ්‍ය අංශය පවසයි.
පාලිත රංගේ බණ්ඩාර වාරිමාර්ග රාජ්‍ය අමාත්‍යවරයා ලෙසත් වසන්ත සේනානායක විදේශ කටයුතු රාජ්‍ය අමාත්‍යවරයා ලෙසත් දිවුරුම් දී ඇති අතර රන්ජන් රාමනායක සමාජ සවිබල ගැන්වීම්, සුබසාධන හා කන්ද උඩරට සංවර්ධන නියෝජ්‍ය අමාත්‍යවරයා ලෙස දිවුරුම් දුන්හ.
මීට ඉහතදී මහනගර හා බස්නාහිර පළාත් සංවර්ධන නියෝජ්‍ය අමාත්‍යවරයා වශයෙන් කටයුතු ලසන්ත අලගියවන්න මුදල් හා ජනමාධ්‍ය නියෝජ්‍ය අමාත්‍යවරයා ලෙස අද (31) පස්වරුවේ ජනාධිපති මෛත්‍රීපාල සිරිසේන ඉදිරියේ දිවුරුම් දුන්නේය.
Facebook Comments
