හිටපු ජනපතිවරුන්ගේ යෝජනා ද එක් කර ගනිමින් ජාතික ප්‍රශ්නය විසඳීමට ඒකීය රාජ්‍යයක් තුළ බලය බෙදා හැරීමේ දේශපාලන විසඳුමක් ගෙන ඒමට කැප වන බව අගමැතිවරයා ප්‍රකාශ කර තිබේ.
සිංහල,දෙමළ,මුස්ලිම් ආදී සෑම ජාතියකගේමඑකමුතුවෙන් හා එකඟත්වයෙන් ශ්‍රී ලංකාව පෙරට ගෙන යාම එක්සත් ජාතික පෙරමුණ ප්‍රමුඛ සන්ධානයේ ප්‍රතිපත්තිය බව මඩකලපුවේ පැති රැළියක දී අගමැති රනිල් වික්‍රමසිංහ පැවසු බව අගමැති මාධ්‍ය ඒකකය නිවේදනය කරයි.
“ඒකීය රාජ්‍යයක් තුළ බලය බෙදා හැරීමේ දේශපාලන විසඳුමක් සඳහා තමන් කැපවී සිටින බවත්, එම විසඳුම සකස් කිරීමේ දී රණසිංහ ප්‍රේමදාස,චන්ද්‍රිකා බණ්ඩාරනායක කුමාරතුංග සහ මහින්ද රාජපක්ෂ යන ජනාධිපතිවරුන් සකස් කර ඇති යෝජනා පදනම් කර ගන්නා බවත් අග්‍රාමාත්‍යවරයා පෙන්වා දුන්නේය.” යැයි එම නිවේදනයේ සඳහන්ව ඇත.
ශ්‍රී ලාංකීය අනන්‍යතාවය තහවුරු කරලීම සියල්ලන්ගේම අපේක්‍ෂාව වුව ද, ජාතිවාදය තහවුරු කොට බලය ලබා ගැනීමට රාජපක්ෂ කණ්ඩායම උත්සාහ දරන බවට ද අගමැතිවරයා චෝදනා කර ඇත.
එබැවින් පොදු එකඟතාවකින් යුතුව ශ්‍රී ලංකාව අනාගතය වෙත රැගෙන යාම සඳහාත්, නිදහස, ප්‍රජාතන්ත්‍රවාදය හා සංහිදියාව ආරක්‍ෂා කර ගැනීම සඳහාත් සජිත් ප්‍රේමදාස ජනාධිපති ධුරයට පත් කරන ලෙස අගමැති රනිල් වික්‍රමසිංහ වැඩි දුරටත් ඉල්ලා සිටියේය.
Facebook Comments
