ප්‍රවෘත්ති දෙපාර්තමේන්තුවෙන් කොරෝනාසාධන ප්‍රවෘත්තියක්

0
Ivory Agency Sri Lanka
wedding people

දෙවැනි කොරෝනා වසංගත රැල්ල වාර්තා කිරීමේ යෙදෙන මාධ්‍යවේදීන්ගෙන් කොරෝනා පැතිරීමේ අවදානම ගැන නිවේදන නිකුත් කරමින් සිටි රජයේ ප්‍රවෘත්ති දෙපාර්තමේන්තුව තුලින්ම එම වෛරසය ව්‍යාප්ත වීමේ අවදානමක් මතුව තිබේ.

නම හෙළි නොකරන ලෙස ඉල්ලා සිටි එම ආයතනයේ ඉහළ නිලධාරියකු මාධ්‍යවේදීන්ට දැනුම් දී ඇත්තේ අද වන විට අංශ ප්‍රධානියකු ඇතුළු සිව් දෙනකුට කොව්ඩ් 19 වෛරසය ආසාදනය වී ඇතැයි තහවුරු වී තිබෙන බවයි.

රජයේ ප්‍රවෘත්ති දෙපාර්තමේන්තුවේ සේවය කළ කාර්යාල කාර්ය සහායකවරයකුට වෛරසය ආසාදනය වී ඇති බව පසුගියදා සෞඛ්‍ය අංශ විසින් තහවුරු කර තිබුනි.

පසුව අනාවරණය වී තිබූනේ ඔහු ඔක්තෝබර් 16 දා පෑලියගොඩ මාළු වෙළෙඳ සංකීර්ණයට ගොස් ඇති බවයි.

පෑලියගොඩ මාළු වෙළෙඳ සංකීර්ණයට ගිය පුද්ගලයන්ට පීසීආර් පරීක්ෂණයකට ලක්වන ලෙස සෞඛ්‍ය බලධාරීන් නිවේදනය කර තිබුනද ඔහු තම ගමන පිලිබඳ තොරතුරු සඟවා කාර්යාලයේ එක් අංශයක රාත්‍රිය ගතකර ඇති බවත් මාධ්‍ය විසින් වාර්තා කර තිබුනි.

අංශ ප්‍රධානියා

ඔක්තෝබර් 30 සිකුරාදා වන විට වාර්තා වී ඇත්තේ ඔහු අනුයුක්තව සිටි රජයේ ප්‍රවෘත්ති දෙපාර්තමේන්තුවේ ඩිජිටල් යටිතල පහසුකම් අංශයේ ප්‍රධානියකුටත් කොරෝනා වෛරසය ආසාදනය වී ඇති බවයි.

මෙම කාර්යාල කාර්ය සහායකවරයා ලගින් ඇසුරු කළ රජයේ ප්‍රවෘත්ති දෙපාර්තමේන්තුවට යාබදව පිහිටි ජනමාධ්‍ය අමාත්‍යාශයේ තවත් කාර්යාල කාර්ය සහායකවරයකුට සහ කළමනාකරණ සහායකවරයකුට වෛරසය ආසාදිත බව අද දිනයේදී සෞඛ්‍ය අංශ බලධාරීන් තහවුරු කර තිබේ.

ජනමාධ්‍ය අමාත්‍යවරයාගේ සහ සම කැබිනට් මාධ්‍ය ප්‍රකාශකවරුන් දෙදෙනාගේ සහභාගීත්වයෙන් අවසන් වරට පැවැති කැබිනට් තීරණ දැනුම් දීමේ මාධ්‍ය හමුව දිනයේදී ඔවුනට සංග්‍රහ කර ඇත්තේ මුලින් වෛරසය ආසාදිත බව තහවුරු වු කාර්යාල කාර්ය සහායකවරයාගේ ලඟම ආශ්‍රිතයෙකි. එසේ වුවත් මේ දක්වා ඔහුගේ හෝ ඔහුගේ සමීපතමයන් සියලු දෙනාගේ PCR පරීක්ෂණ සිදු කර නොමැති බව නම හෙළි නොකරන ලෙස ඉල්ලා සිටි එම ආයතනයේ ඉහළ නිලධාරියකු මාධ්‍යවේදීන් හා වැඩි දුරටත් කියා තිබේ.

රජයේ ප්‍රවෘත්ති දෙපාර්තමේන්තුව අනෙක් මාධ්‍ය ආයතන වලට උපදෙස් ලබා දුන්න ද සිය ආයතනයේ සෞඛ්‍යාරක්ෂාව නොතකා එම ආයතනයේ කාර්ය මණ්ඩලය අවදානමේ හෙලීම දැඩි දෝෂ දර්ශනයට ලක් වෙමින් තිබෙන බව වාර්තා වේ.

‘ද සන්ඩේ ටයිම්ස්’ පුවත්පතේ කර්තෘමණ්ඩලයේ පාර්ලිමේන්තු වාර්තාකරුට ‘කොවිඩ්-19’ වයිරසය ආසාදනය වී ඇති බව එම ආයතනය මේ වන විටත් නිල වශයෙන් පාඨකයන්ට දැනුම් දී තිබේ.

රජයේ මාධ්‍ය ආයතනයක් වන ITN නාලිකාවේ කැමරා ශිල්පියකු ට වෛරසය ආසාදනය වී ඇති බව පසුගියදා හෙළි වී තිබුනත් ඔහුගේ දෙවන PCR පරීක්ෂණ සිදු කිරීමෙන් පසු එම ආයතනය නිවේදනය කර තිබුනේ සිය සාමාජිකයාට වෛරසය ආසාදනය වී නොමැති බවයි.

අධ්‍යක්ෂ ජනරාල්ගේ උපදෙස්

මේ වන විට කොවිඩ් 19 වෛරසය හා සම්බන්ධ නවතම තත්වයන් පිළිබද ප්‍රවෘත්ති වාර්තාකරණයේදී, මාධ්‍යවේදීන් එම ආසාදිතයන් හා ඔවුන්ගේ ආශ්‍රිතයන් ප්‍රතිකාර ලබන රෝහල්, නිරෝධායන මධ්‍යස්ථාන හා එම පුද්ගලයන්ගේ වාසස්ථාන ආදී ආශ්‍රීත පරිශ්‍රයන් පසුබිම් කරගනිමින් ප්‍රවෘත්ති වාර්තා කිරීමට කටයුතු කිරීම අන්තරාදායක බවට රජයේ ප්‍රවෘත්ති දෙපාර්තමේන්තුව පසුගියදා අනතුරු අගවා තිබුනි.

“මෙම තත්ත්වය තුළ මාධ්‍යවේදීන්ගේ හා ඒ මගින් අදාළ මාධ්‍ය ආයතනයන්හි සේවය කරන සෙසු කාර්යය මණ්ඩලයන්හීද සෞඛ්‍යාරක්ෂාව සම්බන්ධව යම් අවදානමක් මතුවිය හැකිය,” යි රජයේ ප්‍රවෘත්ති අධ්‍යක්ෂ ජනරාල් නාලක කලුවැව ඔක්තෝබර් 5 දා නිකුත් කළ නිවේදනයක දැක්වේ.

මේ නිසා සෑම විටම තම සෞඛ්‍යාරක්ෂාවට ප්‍රමුඛත්වය දෙන ලෙසත් සෞඛ්‍ය අංශ විසින් නිකුත් කර ඇති සෞඛ්‍ය මාර්ගෝපදේශ උපරිම ලෙස සහ අනිවාර්යෙන්ම අනුගමනය කිරීමට කටයුතු කරන ලෙසත් කොව්ඩ් 19 සම්බන්ධව වාර්තාකරණයේ යෙදෙන මාධ්‍යවේදීන්ට උපදෙස් හා නියෝග ලබා දෙන්නැයි රජයේ ප්‍රවෘත්ති අධ්‍යක්ෂ ජනරාල්, ප්‍රවෘත්ති අංශ ප්‍රධානීන්ගෙන් ඉල්ලා තිබුනි.

“විශේෂයෙන්ම, අත්‍යාවශ්‍ය කරුණක් සදහා නොවේ නම් කොවිඩ් 19 වෛරසය ආසාදිත වුවකුගේ හෝ සැක කටයුතු තැනැත්තකුගේ ආශ්‍රිත පරිසරයකට පිවිසීම හැකිතාක් අවම කිරීමට කටයුතු කරන මෙන් අදාළ මාධ්‍යවේදීන්ට උපදෙස් ලබාදෙන්නේ නම් මැනවි. ” එම නිවේදනයේ වැඩි දුරටත් සදහන්ව තිබේ.

Facebook Comments