කොරෝනා වසංගතය පැතිරීම වැලැක්වීම සදහා කඨින පිංකම් සමයේ ජනතාව එක්රොක් වන කටයුතු සිදු නොකරන ලෙස සෞඛ්‍ය අංශ වෙතින් ඉල්ලීමක් ඉදිරිපත් වී තිබේ.
සෞඛ්‍ය අමාත්‍යාංශයේ තරුණ, වැඩිහිටි හා ආබාධ සහිත පුද්ගලයන් සදහා වු ඒකකය ඉල්ලා සිටින්නේ මෙම කාලය තුළ පෙරහැර ආදී ජනතාව එක් රොක්වන කටයුතු නොකිරීම, විවිධ පරිත්‍යාග, පුජා භාණ්ඩ රැස්කිරීමට හෝ ආගමික වතාවත් පැවැත්වීමට නිවසින් නිවසට යාම නොකළ යුතු බවයි.
ඉදිරි සති කිහිපය තුළ බෞද්ධ සිද්ධස්ථාන ආශ්‍රිතව යෙදෙන කඨින පිංකම් වලදී වසංගතය පැතීරීම වැලැක්වීම පිළිබද දැඩි අවධානයක් යොමු කළ යුත බව පෙන්වා දෙන ඒම ඒකකය වැඩි දුරටත් අවධාරණය කරන්නේ මේ වන විට පවතින අවදානම් මට්ටම අනුව පුජනීය ස්ථාන තුළ සිටිය හැකි බැතිමතුන්ගේ උපරිම සංඛ්‍යාව 25 දෙනෙකුට සීමා කළ යුතු බවයි.
පුද්ගල දුරස්ථතාව ආරක්ෂා කරගැනීම සදහා දෙදෙනකු අතර අවම දුර මීටරයක පරතරය තබා ගත යුතු අතර මුඛ ආවරණ නිසි ලෙස පැළදීම ඇතුලු මෙම වසංගතය වැලැක්වීමේ සියලු නිර්දේශ සෞඛ්‍ය උපදෙස් නිරතුරුවම පිළිපැදිය යුතු බවත් එම ඒකකය අවධාරණය කර තිබේ.
විශේෂයෙන්ම නිදන්ගත රෝග සහිත ජ්‍යෙෂ්ඨ පුරවැසියන් කොව්ඩ් 19 රෝගය සදහා දැඩි අවදානම් කණ්ඩායමක් වන හෙයින්ද, සමස්ථයක් වශයෙන් සියලු දෙනාටම මෙම වෛරසය වැළදීමේ ප්‍රවනතාවයක් ඇති හෙයින්ද කඨින පිංකම් සමයෙහි රෝගය පැතිරීම වැළැක්වීම කෙරෙහි භික්ෂුන් වහන්සේලා මෙන්ම සියලු දායක දායිකාවන්ගේ විශේෂ මැදිහත් වීමක අත්‍යාවශ්‍යතාවය සෞඛ්‍ය අමාත්‍යාංශයේ තරුණ, වැඩිහිටි හා ආබාධ සහිත පුද්ගලයන් සදහා වු ඒකකය වැඩි දුරටත් අවධාරණය කර තිබේ.
Facebook Comments
