නීති විරෝධී කටයුතු වලට එරෙහිව පෙනී සිටි උතුරේ ග්‍රාම නිලධාරියකුගේ ඝාතනයට සැක පිට දෙදෙනකු අත් අඩංගුවට ගෙන තිබේ.
පොලිසිය පවසන පරිදි එසේ අත් අඩංගුවට ගෙන ඇත්තේ මන්නාරම, මාන්තෙයි බටහිර පරිපාලන ග්‍රාම නිලධාරී එස් විජයේන්ද්‍රන් මහ මගදී ඝාතනය කිරීම සම්බන්ධයෙන් සැක කෙරෙන දෙදෙනෙකි.
පළාත්බද රාජ්‍ය සේවකයන් මාධ්‍යවේදීන් හා කියා ඇත්තේ නොවැම්බර් 8 ඉරිදා මන්නාරම ඉලුප්පකඩවෙයි පොලීසිය විසින් අත්අඩංගුවට ගත් සැකකරුවන් දෙදෙනා අතර ඝාතනයට ලක් වූ ග්‍රාම නීලධාරීවරයා සමග සේවයේ නියුතුව සිටි කාන්තා ග්‍රාම නිලධාරිණියකගේ ස්වාමියා ද වන බවයි.
ඝාතනය සම්බන්ධයෙන් සිදු කරණ ලද මූලික පරීක්ෂණ වලින් පසු සැකකරුවන් දෙදෙනා අත් අඩංගුවට ගෙන ඇති අතර පොලීසිය තව දුරටත් ඔවුන්ගෙන් ප්‍රශ්න කරමින් සිටින බව මන්නාරම ජ්‍යෙෂ්ඨ පොලිස් අධිකාරි පණ්ඩුල වීරසිංහ ප්‍රදේශයේ මාධ්‍ය වේදීන් හා පවසා තිබේ.
නීතිය අකුරටම ක්‍රියාත්මක කළ රාජ්‍ය නිලධාරියෙක් බව ප්‍රදේශවාසීන් පවසන මන්නාරම මාන්තෙයි බටහිර ග්‍රාම නිලධාරීවරයා සිය රාජකාරිය අවසන් කොට නිවස බලා යමින් සිටියදී නොවැම්බර් 3 අගහරුවාදා රාත්‍රියේ මන්නාරම කල්ලිඅඩි ආත්තිමෝට්ටෙයි ප්‍රදේශයේදී ඝාතනයට ලක් කර තිබුනි.
එස්. විජයේන්ද්‍රන් ග්‍රාම නිලධාරීවරයාගේ ඝාතනයට විරෝධය පළ කරමින් මාන්තෙයි බටහිර ප්‍රාදේශීය ලේකම් කාර්යාලය ඉදිරිපිට දී නොවැම්බර් 6 සිකුරාදා දහවල් විශාල විරෝධතාවයක් ද සංවිධානය කර තිබුනි.
ප්‍රදේශයේ රජයේ සේවකයන් විසින් සංවිධානය කර තිබු විරෝධතාවයේදී ඔවුන් ආරක්ෂක අංශ වෙත බල කර තිබුනේ ග්‍රාම නිලධාරීවරයාගේ ඝාතනයට සම්බන්ධ අපරාධකරුවන් වහාම අත් අඩංගුවට ගෙන නීතිය හමුවට පමුණුවන ලෙසයි.
Facebook Comments
