කම්කරු නීති වෙනස් කිරීමේ ජනපති ගේ සැලසුමට අනතුරු ඇඟවීමක්

0

කම්කරුවන්ගේ ශ්‍රමය සුරා කෑමට ආයෝජකයන්ට මග පාදන ආකාරයෙන් කම්කරු නීති සංශෝධනය කිරීමේ ආණ්ඩුවේ වෑයමට වෘත්තීය සමිති විරෝධය එල්ලවී තිබේ.

මුදල් ඇමැතිවරයා ලෙසින්, ජනාධිපති රනිල් වික්‍රමසිංහ මෙවර අයවැය යෝජනා ඉදිරිපත් කරමින් කියා සිටියේ යල් පැන ගිය කම්කරු නීති වෙනුවට යාවත්කාලින කළ තනි නීතියක් හඳුන්වා දෙන බවයි.

“ව්‍යවසායකත්ව හැකියා හා ව්‍යාපාර සංවර්ධනයට බාධාවන ආකාරයට කම්කරු නීති, ප්‍රතිපත්ති හා ආයතනික වැඩ පිළිවෙලවල් ක්‍රියාත්මක නොවිය යුතුය.සමස්ත පරිසරයටම පුද්ගලයාගේ කුසලතාවයන් ප්‍රයෝජනයට ගන්නා ආකාරයට සකස් විය යුතුය.“

“යාවත්කාලින කළ සහ තනි කම්කරු නීතියක් බලාත්මක කිරීමට යෝජනා කරමි.“

වෘත්තීය සමිති විරෝධය මත හකුළා ගෙන තිබු යළි ගෙන එන මෙම යෝජනාවන්ට කිසිසේත් එකඟ විය නොහැකි බව දන්වමින් “තනි කම්කරු නීති“වෑයම අත්හැර දමන ලෙස පෞද්ගලික අංශ කම්කරුවන් බහුතරයක් නියෝජනය කරන, මෙරට පැරණිතම වෘත්තීය සමිතියක් වන ලංකා වෙළඳ, කාර්මික සහ පොදු සේවක සංගමය [CMU]ජනාධිපතිවරයාට දැනුම් දී තිබේ.

CMU වැඩ බලන ප්‍රධාන ලේකම් සෙල්ලයියා පලනිනාදන් පෙන්වා දෙන්නේ කම්කරුවන් සුරාකෑම හා අන්තනෝමතික ලෙස සේවයෙන් දොට්ට දැමීම යම්තාක් දුරකට හෝ පවතින කම්කරු නීති මගින් අහුරා ඇති හෙයින් ආයෝජකයන් ගෙන්වා ගැනීමට හෝ ඔවුන් තෘප්තිමත් කිරීමට ඒවා කිසිසේත්ම වෙනස් නොකළ යුතු බවයි.

`ව්‍යවසායකයන්ගේ හැකියාවන්ට බාධා පමුණුවන` කිසිදු නීතියක් දන්නට නොමැති බවත්, දෙස් විදෙස් ආයෝජකයන් මෙරට කම්කරු නීති පිළිගත යුතු බවත්, එසේ අනුගතවිය නොහැකි අයගේ ආයෝජනයන් බැහැර කළ යුතු බවත් ලංකා වෙළඳ, කාර්මික සහ පොදු සේවක සංගමය ජනාධිපති වික්‍රමසිංහට යොමු කළ ලිපියේ දැක්වේ.

CMU වැඩ බලන ප්‍රධාන ලේකම් පලනිනාදන් යෝජනා කරන්නේ පෞද්ගලික අංශ කම්කරුවන්ගේ වැටුප් තීරණය කිරීමට පවතින යාන්ත්‍රනය නිර්මාණශීලී හෝ යථාර්තවාදී නොවන බැවින් නීතිමය බලයක් ඇති වෘත්තිකයන්, ආර්ථික හා සමාජ විද්‍යාඥයන්ගෙන් සැදුම් ලත් ජාතික වැටුප් කොමිසමක් පිහිටුවන ලෙසයි.

දිනෙන් දින ඉහල යන ආහාර ද්‍රව්‍ය හා සේවා වල මිල නිසා මිරිකී සිටින වැඩකරන පංතියේ දුප්පතුන්ට අයවැයෙන් කිසිදු සහනයක් සළසා නොමැති බව පවසන වෘත්තීය සමිති නායකයා සිය ලිපිය මගින් ජනාධිපතිට පෙන්වා දෙන්නේ කම්කරුවන්ගේ නීතිමය අයිතීන් ක්‍රියාත්මක කිරීමට වෙනුවෙන් බැඳී සිටින කම්කරු අමාත්‍යංශයට මුදල් වෙන්කොට නොමැති බවයි.

විධිමත්, අවිධිමත් හා සංක්‍රමණික ක්ෂේත්‍රවල කම්කරුවන් හා ඔවුන්ගේ පවුල් ආණ්ඩුව විසින් නොසලකා හැරීම ඉතා කනගාටුදායක බවත්, මෙවැනි ප්‍රතිපත්ති නිසා අයවැයෙන් අපේක්‍ෂිත සංවර්ධනය කෙසේ වෙතත් රටට සෘණාත්මක ප්‍රථිපල අත්විදීමට සිදුවන බවට ඔහු ජනාධිපති වික්‍රමසිංහට අනතුරු අඟවයි.

Facebook Comments

wedding people