ශ්‍රී ලංකා පොදුජන පෙරමුණේ ජනාධිපති ධුර අපේක්ෂකයා මිලිටරි ආණ්ඩුවක් නිර්මාණ කිරිමට සැරසෙන බවට දේශපාලන විද්‍යාව පිළිබඳ මහාචාර්යවරයකු අනතුරු අඟවා තිබේ.
ගෝඨාභය රාජපක්ෂ ජනපති ධුරයට පත්වුහොත් ඔහු පැමිණිනෙන්නේ හමුදා නායකයන් සමඟ බවටයි මහාචාර්ය ටෙරන්ස් පුරසිංහ පෙන්වා දෙන්නේ.
“ගෝඨාභය දැන් එන්නේ හමුදා නිලධාරින් වට කරගෙන. මේ රටේ මිලිටර් ආණ්ඩුවක් හදන්න යන්නේ. එදාට උද්ඝෝෂණ කරලා ඉවරයි. දැන් සුලු සිද්ධියක් වුනත් පාරට බැහැලා උද්ඝෝෂණ කරනවා පොලිසිය බලන් ඉන්නවා. මිනිස්සු ගුටි කනවද ශිෂ්‍යයෝ පෙලපාලි ගිහිල්ලා UGC එක වට කරනවා හැබැයි එක වෙඩි උණ්ඩයක් ගියෙ නෑ. බැරිම තැන කඳුළු ගෑස් ගහලා එළවනවා. කිසිම ජිවිතයකට හානියක් වුනේ නෑ පහුගිය අවුරුදු පහ ඇතුලත.”
වත්මන් ආණ්ඩුව තුළින් සැලකිය යුතු ආර්ථික සංවර්ධනයක් සිදු නොවුන ද ජනතාවගේ නිදහස සුරක්ෂිත වු බවයි මහාචාර්යවරයා පවසන්නේ.
“මිනිස්සුන්ට කොච්චර කන්න බොන්න තිබුනත් කතා කිරිමේ නිදහස නැත්නම් ඒ මිනිහා මැරණා වගේ තමයි. අපි මෙතනට ඇවිල්ලා තියෙන්නේ අපේ කතා කිරිමේ නිදහස ආරක්ෂා කර ගන්න.” ශ්‍රී ජයවර්ධනපුර විශ්ව විද්‍යාලයේ දේශපාලන විද්‍යාව පිළිබඳ මහාචාර්ය ටෙරන්ස් පුරසිංහ පසුගියදා පැවති ජනහමුවක දී පැවසීය.
ගෝඨාභය රාජපක්ෂ පාලනයක් තුළ බලය හිමි වන මිලිටරි නායකයන් පිළිබඳ උදාහරණ දක්වමින් මහාචාර්යවරයා කියා සිටියේ “ගෝඨාභය ඉන්න රැස්වීමක දේශප්‍රේමී නලින් ද සිල්වා කතා කරනවා. මොකක්ද කියන්නේ ජනාධිපතිවරයාට 19 වන සංශෝධනය අනුව ඇමැතිවරු තීරණය කරන්න බලයක් නෑ, හැබැයි අමාත්‍යංශ ලේකම්වරු පත් කිරිමේ බලය තියෙනවා. කවුද මේ අමාත්‍යංශ ලේකම්වරු විශ්‍රාමලත් හමුදා නිලධාරින්.”
තමන් බලයට පත් වු දිනක බලය බෙදීම සම්බන්ධ කතා කළ පුද්ගලයන් හා 19 වන ව්‍යවස්ථා සංශෝධනය ගෙන එන ලද පුද්ගලයින් මරා දමන බවට තර්ජන කළ විශ්‍රාමික හමුදා නිලධාරි රියර් අද්මිරාල් සරත් වීරසේකර ද ඒ අතර වන බව මහාචාර්ය ටෙරන්ස් පුරසිංහ කියා සිටියේය.
ජේවිපී දුෂ්ඨ කම
ජනතා විමුක්ති පෙරමුණ ජනාධිපතිවරණයට ඉදිරිපත් වීම විවේචනය කළ මහාචාර්යවරයා එය “දුෂ්ඨ කමක්” බවට චෝදනා කළේය.
“ජේවිපී එකේ ජන්ද අපතේ යන්නේ. භයානක අනතුරකින් බේරෙන්න තියන රටක් මේ මැද මාවතක්, තුන් වෙනි බලවේගයක් කියලා මොකද කරන්නේ. මේ කරන්නෙ දුෂ්ඨ කමක්. අද වෙලා තියෙන්නේ අපේ පණ බේර ගන්න එක.”
අකමැත්තෙන් වුවද වත්මන් ආණ්ඩුව සමඟ ගෝඨාභය රාජපක්ෂගේ ෆැස්සිට්වාදයට එරෙහි සටන සිදු කරනු ලබන්නේ නිර්ධන පන්තියේ ජනතාව යකඩ සපත්තුවට චප්ප කර දැමීමට ඉඩ දිය නොහැකි නිසා යැයි ශ්‍රී ජයවර්ධනපුර විශ්ව විද්‍යාලයේ දේශපාලන විද්‍යාව පිළිබඳ මහාචාර්ය ටෙරන්ස් පුරසිංහ වැඩි දුරටත් අවධාරණය කළේය.
Facebook Comments
