ඇමෙරිකානු රාජ්‍ය නිලධාරින් හා දෙමළ දේශපාලන පක්ෂ අතර සාකච්ජා වල ප්‍රතිපල ලබන වසර මුලදී දැක ගන්නට ශ්‍රී ලාංකිකයන්ට හැකිවනු ඇති බව උතුරේ දේශපාලනඥයකු අවධාරණය කර තිබේ.
ඉකුත් නොවැම්බර් 15-22 අතර කාලයේ එක්සත් ජනපදයේ කල් ගත කළ දෙමළ ජාතික සන්ධානයේ නියෝජිත පිරිසක් ගෝලීය දෙමළ සංසදය (GTF) හා එක්ව වොෂින්ටන් හා නිව්යෝර්ක් දෙනුවරදී එරට ප්‍රතිපත්ති සම්පාදකයන් සහ කොන්ග්‍රස් මණ්ඩල සාමාජිකයන් මුණගැසී තිබුණි.
“දෙමළ ජාතික සන්ධානය හැටියට අපි ඇමෙරිකාව ඇතුළු බටහිර රටවල කරපු සංචාරයේ ප්‍රතිපල ලබන ජනවාරි මාසයේදී හැමෝටම දැන ගන්න ලැබේවි,“යැයි දෙමළ ජාතික සන්ධානයේ මාධ්‍ය ප්‍රකාශක, පාර්ලිමේන්තු මන්ත්‍රී එම්.ඒ. සුමන්තිරන් පවසා සිටියේ,`දෙමළ ජනයාගේ ජිවත් වීමේ අයිතිය` මැයෙන් දෙසැම්බර් 18 වැනිදා යාපනයේ පැවති සම්මන්ත්‍රණයකට සහභාගි වෙමින්ය.
දෙමළ ජාතික සන්ධානය විදේශ රටවල් සමඟ සාකච්ඡා කරනුයේ කිසියම් වූ දේශපාලන ප්‍රතිපත්තියක් මත බව පෙන්වා දෙන සුමන්තිරන් මන්ත්‍රීවරයා පවසන්නේ ඇමෙරිකාව සමග හා ඉන් අනතුරුව මෙරට සිටින අනෙකුත් රටවල තානාපතිවරුන් සමග ද කතාබහ කළත්, ඒවායේ ඡායාරුප සමාජ මාධ්‍ය මගින් ප්‍රචාරය කරන්නට සුදුසු නොවන බවය.
“මේ සාකච්ජා නියමිත පරිදි අපි කරගෙන ආපු නිසා තමයි එක්සත් ජාතීන්ගේ මානව හිමිකම් කවුන්සලේදී දෙමළ ජනයාගේ ප්‍රශ්නය ප්‍රමුඛ වෙලා තියෙන්නේ. 2011දීත් අපි මෙවැනිම ගමනක් ගියා. ඊට පස්සේ තමයි මානව හිමිකම් කවුන්සලයේදී දෙමළ ජනයාගේ ප්‍රශ්නය කෙරෙහි ඇමෙරිකාව ඇතුළු බලවත් බටහිර රටවල් මගින් ආණ්ඩුවට බලපෑම් ඇතිවුනේ,“යැයි ද දෙමළ ජාතික සන්ධානයේ මාධ්‍ය ප්‍රකාශක සඳහන් කරයි.
වොෂින්ටනය සහ දිල්ලිය එකතුව දෙමළ ජනයාගේ ප්‍රශ්නයට විසදුම් ලබා දීමට සාකච්ජා පවත්වමින්, වැඩ කරන බව පවසන සුමන්තිරන් උතුරු නැගෙනහිර පළාතේ කෙරෙන චීන අතපෙවීම් දෙමළ ජාතික සන්ධානය අනුමත නොකරන බවද අවධාරණය කර තිබේ.
“අපි මේ ගැන ඉන්දියාවට හා ඇමෙරිකාවට දැනුම් දීලා තියෙනවා. අනෙක් අතට උතුරු නැගෙනහිර දෙමළ ජනයාගේ ගැටලුවලට විසදුම් දෙන්නේ නැතුව කල් ඇදගෙන යනකොට පිටරටවල් ඔලුව දාන එක වලක්වන්න බැහැ,“යැයි ද ඔහු පවසයි.
දෙමළ ජාතික සන්ධාන මන්ත්‍රීවරයාගේ ප්‍රකාශය කෙරුනේ කොළඹ සිටින චීන තානාපතිවරයාගේ උතුරේ පළමු සංචාරය නිමාවී දිනකට පසුය.
Facebook Comments
