ලෝකයේ ඉහලම නීති සම්පාදක මණ්ඩලයකට පළමු රාජපක්ෂ පාලන සමයේ අග්‍ර විනිශ්චයකාරවරයකු පත් කරගැනීමට දෙවැනි රාජපක්ෂ ආණ්ඩුව දැරූ උත්සාහය ජාත්‍යන්තර තලයේ පරාජයට පත් වී තිබේ.
ශ්‍රී ලංකාවේ ආණ්ඩුව විසින් එක්සත් ජාතීන්ගේ ජාත්‍යන්තර නීති කොමිසමට යුද සමයේ නීතිපතිද වූ මොහාන් පීරිස් යෝජනා කර තිබුණි. ඔහු දැනට නිව් යෝර්ක් නුවර එක්සත් ජාතීන්ගේ සංවිධානයේ ශ්‍රී ලංකාවේ නිත්‍ය නියෝජිතයාය.
කොමිසමේ ආසියා ශාන්තිකර කලාපීය ආසන අටෙන් එකක් සඳහා එකොලොස් දෙනකු හා තරග වැදුණු ඔහුට ප්‍රමාණවත් ඡන්ද ලැබුනේ නැත. ඡන්දය පැවැත්වුනේ බැසිල් රාජපක්ෂ විසින් 2022 අයවැය යෝජනා ප්‍රකාශයට පත් කෙරුණු නොවැම්බර් 12 දාය.
යුද අපරාධ හා මානව වර්ගයාට එරෙහි අපරාධ ගැන හෙළිකෙරෙන තොරතුරු සම්බන්ධයෙන් වගකිව යුත්තන්ට දේශීය වශයෙන් දණ්ඩ මුක්තිය සැලසීම පිළිබඳව විවේචනයට ලක්ව සිටින ලංකාණ්ඩුව ලත් බරපතල පරාජයක් ලෙස මෙය සැලකේ.
ඉන්දියාව, තායිලන්තය, ජපානය, වියට්නාමය, චීනය, කොරියා ජනරජය, සයිප්‍රසය සහ මොන්ගෝලියාව යන රටවල නියෝජිතයෝ ආසියා ශාන්තිකර කලාපය සඳහා තේරී පත් වූහ.
2023 ජනවාරියේ සිට අවුරුදු පහක කාලයක් සඳහා වලංගු එම පත්වීමට හිටපු අග විනිසුරුවරයා පත් කර නොගන්නා ලෙස ඉල්ලා සිටිමින් මාස හයකට ඉහතදී ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සහ සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) ජාත්‍යන්තර ව්‍යාපාරයක් දියත් කරන ලදී.
එම සංවිධාන දෙක එක්සත් ජාතීන්ගේ මහා මණ්ඩලයේ සාමාජික රටවලින් ඉල්ලා තිබුණේ “රටේ ප්‍රධාන නීති නිලධාරියා වශයෙන් සිටියදී සිදුකෙරුණු බලහත්කාරයෙන් අතුරුදහන් කිරීම්, ඝාතන, වධබන්ධන සහ ලිංගික දූෂණ සිදුකළ අපරාධකරුවන් වගඋත්තරදායකත්වයෙන් බැඳ තැබීමට අසමත් වීම නිසා අවමානයට පාත්‍ර වූවකු” ලෙස චෝදනා ලබන මොහාන් පීරිස්ට ඡන්දය නොදෙන ලෙසයි.
ශ්‍රී ලංකාවේ මාධ්‍යවේදීන් හුදෙක් රැකියාවේ යෙදීම නිසාම කුරිරු ලෙස මර්දනයට හා ඝාතනයට ලක්වූ පාලන සමයක බලයේ සිටියකු වන ඔහුගේ නාම යෝජනාවට විරුද්ධව නැගී සිටීම සඳහා සහාය දක්වන ලෙස JDS ලොව පුරා මාධ්‍ය අයිතිවාසිකම් සංවිධාන වෙත විශේෂ ආයාචනයක් ද කර තිබුණි.
එම ප්‍රකාශනය මෙතනින්.
Facebook Comments
