සංවර්ධනයේ මුවාවෙන් උතුරු නැගෙනහිර දෙමළ ජන සංයුතිය සැලසුම් සහගතව හීන කරන බවට දිගින් දිගටම එල්ල වන චෝදනා තහවුරු කිරීම සඳහා ආණ්ඩුව විසින් ප්‍රදේශයේ ඉඩම් අත්පත් කරගැනීම සම්බන්ධ තොරතුරු පාර්ලිමේන්තුවට ඉදිරිපත් වී තිබේ.
පාර්ලිමේන්තුව නොවැම්බර් 11 රැස්වූ විට දෙමළ ජාතික ජනතා පෙරමුණේ නායක, යාපනය දිසා මන්ත්‍රී ගජේන්ද්‍ර කුමාර් පොන්නම්බලම් කියා සිටියේ උතුරු නැගෙනහිර පළාතේ පෞද්ගලික හා පොදු ඉඩම් හමුදාව සහ සිංහල ජනතාව විසින් නීති විරෝධී ආකාරයෙන් අත්පත් කරගන්නා බවයි.
“දින කිහිපයකට පෙර යාපනයේ අල්ලෙයිපිඩි ඉඩම් පර්චස් 80ක් සහ මාන්කුම්බාන් ප්‍රදේශයේ ඉඩම් පර්චස් 70ක් අත්පත් කරගෙන තියෙනවා,“යැයි ගජේන්ද්‍ර කුමාර් පැවසීය.
නැඟෙනහිර මඩකලපුවේ මයිලන්තන්නෛ දෙමළ ජනතාවගේ ඉඩම් සිංහලයන් විසින් අත්පත් කරගෙන ඇතැයිද ඔහු වැඩිදුරටත් කියා සිටියේය.
“මේ ගැන උසාවියේ විභාග වුනු නඩුවේ තීරණය වුනේ අත්පත් කරගත් ඉඩම් වලින් ඉවත් විය යුතුයි කියලා, එත් මේ එනකම් ඉඩම් වලින් අයින් වෙලා නැහැ,“යැයි පොන්නම්බලම් මන්ත්‍රීවරයා පවසයි.
මේ අතර වවුනියාව නැදුන්කේනි, කැප්පිටිකොල්ලාව සහ පදවිය යන ප්‍රදේශවල පවුල් 1030ක් නැවත පදිංචි කර තිබේ.
“ආණ්ඩුව අත්පත් කරගත්තු ඉඩම් දෙමළ ජනයාට තවම ආපහු ලබා දීලා නැහැ, එහෙම තියෙද්දී සිංහල මිනිස්සු ගෙනල්ලා ඉඩම් බෙදා දීලා මේ වෑයම් කරන්නේ තවත් ජාතියක් විනාශ කරන්න,“යැයි දෙමළ ජාතික සන්ධානයේ සිවඥානම් ශ්‍රීධරන් ද මේ ගැන කරුණු දක්වමින් ආණ්ඩුවට චෝදනා කළේය.
ඔහු වැඩිදුරටත් කියා සිටියේ “යාපනයේ 14000 ක්, කිලිනොච්චියේ 4000 ක් ජනයා ඉඩම් නොමැතිව“ දුක් විඳින බවයි.
බලහත්කාරයෙන් ඉඩම් අත්පත් කරගැනීම් හා සැලසුම් සහගත සිංහල ජනාවාසකරණය ගැන සාකච්ඡා කිරීමට චමල් රාජපක්ෂ ඇමතිවරයා කාලය ලබාදී තිබුණද, අවසන් මොහොතේ එම රැස්වීම අවලංගු කළ බවද දෙමළ ජාතික ජනතා පෙරමුණේ නායකයා පැවසීය.
උතුර නැගෙනහිර දෙමළ බහුතරයට හානි පැමිණවීමේ වෑයම් ගැන දෙපළාත නියෝජනය කරන රදගුරුවරුන් විසින් උතුරේ සංචාරයක නිරතව සිටි ස්විට්සර්ලන්ත තානාපතිවරයාටද මේ සතියේ කරුණු දක්වා තිබුණි.
Facebook Comments
