පසු ගිය මහ මැතිවරණයෙන් අන්ත පරාජයක් ලැබූ ඉකුත් සභාග රජයේ ප්‍රධාන පක්ෂය දිගු නිහැඬියාවකින් පසු ආණ්ඩු විරෝධී උද්ඝෝෂණ අරඹා තිබේ.
ඉහල යන ජිවන වියදම හමුවේ පීඩාවට පත් ජනතාවට සහන ලබා දෙන ලෙස ඉල්ලා එක්සත් ජාතික පක්ෂය සංවිධානය කරන උද්ඝෝෂණයක් කොළඹ ලිප්ටන් වටරවුමේ දී අද පැවැත්වුනේ මුදල් ඇමැති බැසිල් රෝහණ රාජපක්ෂ විසින් ලබන වසර සදහා වන අය වැය යෝජනාව පාර්ලිමේන්තුවට ඉදිරිපත් කරන අතරතුරදීය.
“ජන දුක නොහදුනන දුෂිත ආණ්ඩුව පළවා හරිමු ” තේමාව පෙරටු කරගනිමින් දහසකට අධික පක්ෂ සාමාජිකයන්ගේ සහභාගිත්වයෙන් අගනගරයේ විරෝධතා දැක්වු එජාප ඉදිරි පෙළ නායකයන් පෙන්වා දුන්නේ පවතින ආර්ථික අර්බුදය හමුවේ බහුතරයක් වූ මැද පන්තික ජනයා අන්ත දුගී බවට පත් ඇති බවයි.
උද්ඝෝෂණය සදහා නායකත්වය ලබා දුන් එක්සත් ජාතික පක්ෂයේ හිටපු ජාතික ලැයිස්තු පාර්ලිමේන්තු මන්ත්‍රී සමන් රත්නප්‍රිය අවධාරණය කළේ රාජපක්ෂ ආණ්ඩුව අය වැය ඉදිරිපත් කර ආණ්ඩුවේ බංකොලොත්භාවය නැවත වරක් රට හමුවේ ප්‍රකාශ කර ඇති බවයි.
” මොළ හතක් තියනවා කියලා කියපු බැසිල් රාජපක්ෂ ඉදිරිපත් කරපු අය වැය ජනතාවට කිසිම සහනයක් නැති හිස් පුස්සක් බවට පරිවර්තනය වෙලා තියනවා. ”
රජයේ හෙද නිලධාරීන්ගේ සංගමයේ සභාපතිද වන සමන් රත්නප්‍රිය එහිදී තව දුරටත් චෝදනා කලේ කිසිදු භාණ්ඩයක මිල පාලනය කළ නොහැකි ආණ්ඩුවක් බවට රාජපක්ෂ ආණ්ඩුව පත්ව ඇති බවයි.
“ආණ්ඩුවේ කාලය ඉවරයි රාජපක්ෂ ෆේල්, ගෝඨාභය ෆේල්, මහින්ද රාජපක්ෂ ෆේල්, අපි අවසාන වශයෙන් ආණ්ඩුවට කියනවා මේ රට හැදුවේ එක්සත් ජාතික පක්ෂය, මේ රට නැති කරේ රාජපක්ෂ රෙජිමය, ඒක නිසා අපි අන්තිමට කියන්නේ අපි හැදුවා. මුං කෑවා. ගෙදර පලයව් කියන කාරණය, ” යි සමන් රත්නප්‍රිය තව දුරටත් සදහන් කළේය.
අද පැවැති විරෝධතාවය සදහා එක්සත් ජාතික පක්ෂයේ නායක ජාතික ලැයිස්තු පාර්ලිමේන්තු මන්ත්‍රී රනිල් වික්‍රමසිංහ එක්ව සිටියේ නැත.
රුවන් විජේවර්ධන, පාලිත රංගේ බණ්ඩාර, නවීන් දිසානායක, සාගල රත්නායක යන එක්සත් ජාතික පක්ෂයේ ප්‍රධාන නායකයන් විරෝධතාවයට එක්ව සිටි බව අගනගරයේ වාර්තාකරුවෝ වැඩි දුරටත් පවසති.
Facebook Comments
