පාසල් අරින්න ජනපති නිර්දේශ ඉල්ලයි

පාසල් විවෘත කිරිම සම්බන්ධව නිර්දේශ ලබාදීම සෞඛ්‍ය සහ අධ්‍යාපන නිලධාරීන්ගෙන් සමන්විත තාක්ෂණික කමිටුවක් වෙත පැවරීමට ජනාධිපතිවරයා තීරණය කර තිබේ.

ජනාධිපති ගෝඨාභය රාජපක්ෂ මහතාගේ ප්‍රධානත්වයෙන් අද (10) පෙරවරුවේ පැවැති කොවිඩ් මර්දන විශේෂ කමිටු රැස්වීමේ දී පාසල් ඇරඹීම කෙරෙහි විශේෂ අවධානයක් යොමුවු බවයි ජනාධිපති මාධ්‍ය අංශය නිවේදනය කරන්නේ.

ඒ අනුව සිසුන් 100ට අඩු පාසල් 3,000කට අධික සංඛ්‍යාවක් ග්‍රාමීයව විහිදී පවතින බැවින් පළමුව එම පාසල් විවෘත කිරීමට ඇති හැකියාව පිළිබඳව සොයාබලා නිකුත් කරන ලෙස ජනපති තාක්ෂණික කමිටුවට නියෝග කර ඇත.

2020 සහ 2021 වසරවල පාසල් නොපැවැත්වීමෙන් ලක්ෂ 07කට ආසන්න දරුවන් පිරිසකට ප්‍රාථමික අධ්‍යාපනයත් එවැනිම දරුවන් සංඛ්‍යාවකට පූර්ව ළමාවිය අධ්‍යාපනයත් අහිමිවීමෙන් සිදුවී ඇති බලපෑම පිළිබඳව මෙම සාකච්ඡාවේදී අවධානය යොමු කෙරුණ බව ජනාධිපති මාධ්‍ය අංශය වැඩි දුරුටත් නිවේදනය කරයි.