සංවිධානාත්මක අපරාධ ඒකකය මඟින් අත්අඩංගුවට ගත් බොදු බල සේනා නායක ගලගොඩ අත්තේ ඥානසාර හිමිට ඇප ලබා දීම සදහා ජනාධිපතිවරයාගේ මාධ්‍ය ලේකම්වරයෙකු මැදිහත් වී ඇති බව වාර්තා වේ.
ජනාධිපති මෛත්‍රීපාල සිරිසේනගේ මාධ්‍ය ලේකම්වරයෙකු වන නිතීඥ ශිරාල් ලක්තිලකගේ මැදිහත්වීම මත ඥානසාර හිමිට අධිකරණයෙන් ඇප ලැබී ඇති බවයි සිලෝන් ජර්නල්ස් වෙත වාර්තා වන්නේ.
පොලිස් නිලධාරින්ගේ රාජකාරියට බාධා කර තර්ජනය කිරීම, ජාතීන් අතර අසමඟිය ඇති වන ආකාරයේ ප්‍රකාශ සිදු කිරීම යන චෝදනා යටතේ පොලිසිය විසින් බොදු බල සේනා නායක හිමියන් අත්අඩංගුවට ගැනීමට මෙහෙයුමක් දියත් කලද එය අසාර්ථක විය.
පොලිස් විරෝධයක් නෑ
නමුත් 21 බදාදා එම ඒකකයට පැමිණි ඥානසාර හිමිගෙන් ප්‍රකාශයක් ලබා ගැනීමෙන් අනතුරුව පොලීසිය විසින් එහිමියන් අත්අඩංගුවට ගත්තත් ඇප ලබා දීමට පොලිසිය විරුද්ධ නොවීම මත අධිකරණයෙන් විසින් ඇප නියම කරන ලදී.
කෙසේ වෙතත් ඥානසාර හිමියන් අත්අඩංගුවට ගැනීම සඳහා පොලිසිය විසින් අධිකරණයට ඉදිරිපත් කල බී වාර්තාව වෙනස් කර සමාන්‍ය අපරාධ නීතිය යටතේ එහිමියන් අධිකරණයට ඉදිරිපත් කර මෙසේ ඇප ලබා ගෙන ඇති බවයි පොලිස් ආරංචි මාර්ග පවසන්නේ.
බී වාර්තාව වෙනස් කිරීම
පෙර ඉදිරිපත් කල බී වාර්තාවේ 2007 අංක 56 දරන සිවිල් හා දේශපාලන අයිතිවාසිකම් පණත යටතේ බොදු බල සේනා නායක හිමිට එරෙහිව වරෙන්තු ලබා ගත් පොලිසිය ඥානසාර හිමි අධිකරණයට ඉදිරිපත් වීමට දිනකට පෙර මෝසමක් මඟින් එම චෝදනා සංශෝධනය කරමින් දණ්ඩ නීති සංග්‍රහය යටතේ චෝදනා ඉදිරිපත් කරමින් ඇප ලබා ගැනීමට සහය වී තිබේ.
සිවිල් හා දේශපාලන පණත යටතේ නඩු පවරන්නෙකුට ඇප දීමට මහේස්ත්‍රාත් අධිකරණයට බලයක් නොමැති අතර මහාධිකරණයෙන් ඇප ඉල්ලුම් කල හැක්කේද විශේෂ අවස්ථාවකදී පමණි.
උලපනේ සුමංගල හිමි
නිතීඥ ශිරාල් ලක්තිලකගේ සෘජු මැදිහත් වීම මත මෙම කටයුතු සිදු කර ඇති අතර බොදු බල සේනා සංවිධානය ශිරාල් ලක්තිලකට හිතවත් දුෂණ විරෝධි පෙරමුණේ උලපනේ සුමංගල හිමි හරහා මෙම සියලු කටයුතු සිදු කර ගෙන තිබේ.
රටේ පවතින තත්ත්වය හමුවේ ඥානසාර හිමියන්ට ඇප ලබා නොදුනහොත් ආණ්ඩුව අපහසුතාවයට පත්වන බව ජනාධිපතිවරයාට හුවා දක්වා ඇති ශිරාල් ලක්තිලක ඥානසාර හිමිට ඇප ලබා දෙන ලෙසට ජනාධිපතිවරයාගෙන් ඉල්ලා ඇත.
කෙසේ වෙතත් මෙම සිදුවීම හමුවේ කලකිරී සිටින ආණ්ඩුවේ මුස්ලිම් මැති ඇමතිවරුන් ජනාධිපතිවරයාට ඒ සම්බන්ධව සිය විරෝධය පල කර ඇති බවද සිලෝන් ජර්නල්ස් වෙත වැඩි දුරටත් වාර්තා වේ.
Facebook Comments
