සමස්ත රාජ්‍ය වියදම වු රුපියල් බිලියන 4450ක මුදලින් රුපියල් බිලියන 392 වන වැඩිම මුදල මෙවරත් ආරක්ෂක අමාත්‍යංශය සඳහා වෙන් කර තිබේ.
රුපියල් බිලියන 2232 ක මුදලක් ණය සේවාකරණය වෙනුවෙන් වෙන් කර ඇති බවට 2019 සඳහා වන විසර්ජන පනත් කෙටුම්පත පාර්ලිමේන්තුවට ඉදිරිපත් කරමින් මුදල් අමාත්‍ය මංගල සමරවීර කියා සිටියේය.
අභ්‍යන්තර හා ස්වදේශ කටයුතු සහ පළාත් සභා හා පළාත් පාලන අමාත්‍යාංශය වෙනුවෙන් රුපියල් බිලියන 291 ක මුදලක් වෙන් කර ඇත.
රාජ්‍ය පරිපාලන සහ ආපදා කළමනාකරණ අමාත්‍යාංශය වෙත රුපියල් බිලියන 216ක් සහ සෞඛ්‍ය හා පෝෂණ අමාත්‍යාංශය වෙනුවෙන් රුපියල් බිලියන 186 ක් වෙන් කර දී තිබේ.
මහා මාර්ග, මාර්ග සංවර්ධන සහ ඛණිජ තෙල් සම්පත් සංවර්ධන අමාත්‍යාංශය වෙත රුපියල් බිලියන 175 ක් වෙන් කර ඇති අතර අධ්‍යාපන අමාත්‍යාංශය වෙනුවෙන් මෙවර වෙන් කර ඇති මුදල රුපියල් බිලියන 104 කි.
මුදල් හා ජනමාධ්‍ය අමාත්‍යාංශ වෙනුවෙන් වෙන් කර ඇති මුදල රුපියල් බිලියන 183 ක් බව ද මුදල් අමාත්‍යවරයා සඳහන් කළේය.
නිවාස ඉදිකිරීම් හා සංස්කෘතික අමාත්‍යාංශය සඳහා රුපියල් කෝටි 1,063ක්, පාර්ලිමේන්තු ප්‍රතිසංස්කරණ අමාත්‍යාංශය සඳහා රුපියල් කෝටි 944ක්, අධ්‍යාපන අමාත්‍යාංශය සඳහා රුපියල් කෝටි 10,500ක් වෙන්කර ඇත. මහානගර හා බස්නාහිර සංවර්ධන අමාත්‍යාංශය සඳහා රුපියල් කෝටි 4,998ක මුදලක්ද, වරාය හා නාවික කටයුතු අමාත්‍යාංශය සඳහා රුපියල් කෝටි 386ක මුදලක්ද වෙන්කර ඇත.
මේ වසරේ මුල් මාස 04 සඳහා පසුගිය නොවැම්බර් මාසයේදී අතුරු සම්මත ගිණුමක් පාර්ලිමේන්තුවට ඉදිරිපත් කෙරුණු අතර, එම මුදල්ද මෙම විසර්ජන පනත් කෙටුම්පතට ඇතුළත් කර තිබේ.
Facebook Comments
