එකොලොස් වසරක් ගතවීත් යුක්තිය නොලද ත්‍රි’මලේ සිසුන්

0

එකොලොස් වසරකට ඉහතදී රජයේ ආරක්ෂක අංශ විසින් සමූහ ඝාතනය කරන ලද බවට චෝදනා කෙරෙන ත්‍රිකුණාමලයේ පාසල් සිසුන් පස්දෙනා වෙනුවෙන් යහපාලන රජයෙන් හෝ යුක්තිය ඉෂ්ටවිය යුතු බව දෙමළ ජාතික සන්ධානයේ පාර්ලිමේන්තු මන්ත්‍රීවරයෙක් පවසයි.

පාර්ලිමේන්තු මන්ත්‍රී තුරෙයිරත්නසිංහම් ඒ බව ප්‍රකාශ කළේ 2006 වසරේදී පොලිස් විශේෂ කාර්ය බලකායට චෝදනා නැගෙන ඝාතනයට ලක්වු පාසල් සිසුන් පස්දෙනාගේ 11 වැනි ගුණානුස්මරණය වෙනුවෙන් ගගන සහෝදර නාලිකාව අයි.බී.සී වෙත විශේෂ ප්‍රකාශයක් කරමිනි.

මනෝහරන් රජිකර්, හේමචන්ද්‍රන් යෝගරාජා, ලෝහිතරාජා රෝහන්, තංගතුරෙයි සිවානන්දා සහ ෂන්මුගරාජා ගජේන්ද්‍රන් යන විසිවැනි වියේ පසුවූ පාසල් සිසුන් පස්දෙනා ත්‍රිකුණාමල මුහුදු තීරයේදී වෙඩිතබා ඝාතනය කර තිබුනේ 2006 වසරේ ජනවාරි 02 දිනයි.

ත්‍රිකුණාමල පංච සිසු ඝාතනය සම්බන්ධයෙන් මේ වන තෙක් යුක්තිය ඉටු නොවු බව පවසන මන්ත්‍රී තුරෙයිරත්නසිංහම් පෙන්වා දෙන්නේ මිය ගිය සිසුන්ගේ පවුල් වල සාමාජිකයන් වෙත එල්ල වු තර්ජන හමුවේ ඔවුනට රටින් පලා යාමට පවා සිදුව ඇති බවයි.

සිද්ධිය වු සමයේ පොලිස් විශේෂකාර්ය බලකාය වෙත එල්ල වු චෝදනාව පොලිස් විශේෂ කාර්ය බලකාය මෙන්ම එවකට පැවැති රජය විසින්ද ප්‍රතික්ෂේ්‍ප කරනු ලැබු බව ආවර්ජනය කරන ඔහු වැඩි දුරටත් සදහන් කර සිටියේ එම සිසුන් එල්.ටී.ටී.ඊ සාමාජිකයන් බවට එවකට රජය විසින් චෝදනා එල්ල කළ බවයි.

සිසුන් පස්දෙනා එල්.ටී.ටී.ඊ සාමාජිකයන් බවත් ඔවුන් විසින් රජයේ ආරක්ෂක අංශ වෙත ප්‍රහාරයක් එල්ල කිරීමට සුදානම් වු මොහොතේ බෝම්බයක් පුපුරායාමෙන් ඔවුන් මිය ගොස් ඇති බවට එවකට රජය චෝදනා කළත් ඉන් අනතුරුව ඒ සම්බන්ධයෙන් පැවැති පරීක්ෂණ වල කිසිදු ප්‍රගතියක් මේ දක්වා නොමැති බවයි මන්ත්‍රීවරයා වැඩි දුරටත් කියා සියියේ.

කෙසේ නමුත් පාර්ලිමේන්තු මන්ත්‍රී තුරෙයිරත්නසිංහම් පෙන්වා දුන්නේ මරණ පරීක්ෂණ වාර්තාව අනුව සිසුන් මිය ගොස් ඇත්තේ වෙඩි වැදීම් වලින් වන අතර එම වෙඩි ප්‍රහාර සමීපයේ සිට එල්ල කළ වෙඩි ප්‍රහාර බවටත් පිළිගත හැකි සාක්ෂි හෙලි වී ඇති බවයි.

ප්‍රහාරය සම්බන්ධයෙන් සැකපිට පොලිස් විශේෂකාර්ය බලකායේ සහකාර පොලිස් අධිකාරිවරයකු ඇතුලු පොලිස් නිලධාරීන් 12 දෙනකු අපරාධ පරීක්ෂණ දෙපාර්තමේන්තුව විසින් 2013.06.05 දින අත්අඩංගුවට ගනු ලැබුවත් හාර මාසයක් ඇතුලත සියලු දෙනා ඇප මත නිදහස් කර යවන ලද බවද මන්ත්‍රීවරයා සිහිපත් කළේය.

මෙම සමූහ ඝාතන පරීක්ෂණ සම්බන්ධයෙන් ප්‍රගතියක් නොමැතිවීම ගැන කනස්සල්ල පල කළ ඉකුත්දා ජිනීවා නුවර රැසවූ වධහිංසාවට එරෙහි එක්සත් ජාතීන්ගේ කමිටුව ඒ සම්බන්ධයෙන් යුක්තිය ඉටු කිරීමට කඩිනම් පියවර ගන්නා ලෙස රජයෙන් ඉල්ලා සිටියේය.

(Radiogagana)

Facebook Comments

wedding people